مٹی دی محبت

بیدار سرمدی

پاکستان وچ تے اقتدار دی کشمکش وچ ہر پاسیوں بہت کجھ کہیا جا رہیا اے تے اک پاسے سیاست نہیں ریاست بچان لئی سیاسی سرمائے نوں قربان کر دین دیاں گلاں ہو رہیاں نیں ت دوجے پاسے کہیا جا رہیا اے کہ ملک اتے ایہہ نازک ویلا ایس لئی آیا اے کہ اوہناں دی حکومت سازش نال ختم کیتی گئی۔ اصل حقائق جو وی ہون پاکستان ایس ویلے بھارت تے بنگلہ دیش سنے بہت سارے ملکاں دے شہریاں ولوں تنقید دا نشانہ بنیا ہویا اے۔ مودی سانوں کٹورا لے کے منگن اتے مجبور کر دین تے ساڈی اکڑ کڈ دین دیاں گلاں کرن لگے نیں تے بنگلہ دیشی قیادت پاکستانی روپے تے بنگلہ دیشی ٹکے دے فرق نوں ماضی دے واقعات نال جوڑ کے سوشل میڈیا اتے اپ لوڈ کر رہی اے۔ ساڈے ایتھے اک پاسے الیکشن آئین دے مطابق کران تے دوجے پاسے کسی نہ کسی طرحاں الیکشن نوں ٹالن لئی تاش دے پتیاں دے نہلے اتے دہلے دا سلسلہ جاری اے۔اک طرحاں توں شطرنج دی بساط اتے سارے قابل احترام آئینی عہدیاں نوں بٹھا کے تماشا جیا لگا دتا گیا اے۔ تے ایس پس منظر وچ جدوں غیر ملکی تے خاص طور تے فنانشل ٹائمز جئے اخباراں دیاں خبراں نوں ویکھیا جاوے تے واقعی تشویش ہون لگدی اے۔ امریکی اخبار فنانشل ٹائمز نے کہیا اے کہ پاکستان دی معیشت دیوالیہ ہون دے کول پہنچ چکی اے۔ رپورٹ دے مطابق پاکستان وچ زرمبادلہ دے ذخائر گھٹ ہو گئے نیں۔ جنوری دی 23تریخ نوں ہون والے بجلی دے ملک گیر بریک ڈائون نے مشکلاں وچ وادھا کر دتا اے۔ پاکستان نوں زرمبادلہ دی شدید قلت دا سامنا اے تے کاروبار نوں جاری رکھنا اوکھا ہو گیا اے۔ ملک وچ زرمبادلہ دے ذخائر 5بلین ڈالراں توں وی گھٹ رہ گئے نیں جہڑے اک مہینے دی امپورٹ توںوی گھٹ نیں۔ رپورٹ وچ ہو رکہیا گیا اے کہ شہباز شریف دی حکومت تے ائی ایم ایف وچ 7بلین ڈالر دے امدادی پیکیج اتے مذاکرات تعطل دا شکار ہو گئے نیں۔ تجزیہ کاراں دے مطابق پاکستان دی معاشی صورتحال سنگین ہو گئی اے تے پاکستان دا حال وی سری لنکا جیا ہون دا خدشہ اے۔ فنانشل ٹائمز دے مطابق پاکستان وچ بجلی دی بندش تے غیر ملکی زرمبادلہ دی شدید کمی نال کاروبار دا چلانا اوکھا ہو گیا اے۔ عوام تے فیض دی ز بان وچ کہہ رہے نیں کہ:
مٹی کی محبت میں ہم آشفتہ سروں نے
وہ قرض اتارے ہیں جوواجب بھی نہیں تھے
لیکن ساڈے کج رہنماواں دا ایہہ حال اے کہ اوہ معاملات نوں سلجھان دی کوشش وی کر رہے تے نال ای بہت سارے نویں بحران وی پیدا کیتے جا ہرے نیں۔ کسی قوم اتے جدوں انج دا ویلا خواہ کسی وی وجہ نال آ جاوے تے پوری قوم نوں اکٹھا ہوکے سوچنا پیندا اے مگر ساڈے ایتھے سیاست دی برکات نال قوم ہورحصیاں وچ ونڈدی جا رہی اے۔چونکہ ایسے حالات وچ بوہتی ذمہ واری حکومت وقت دی ہوندی اے ایس لئی ایس ویلے حکمران اتحاد پی ڈی ایم دے موہنڈھیاں اتے بوہتی ذمہ واری عائد ہوندی اے۔ وزیراعظم شہباز شریف نے موجودہ گھمبیر صورتحال دے حوالے نال کہیا اے کہ سانوں اک اک روپیہ بچان دی کوشش کرنی چاہیدی اے۔ جدوں حالات انج دے نیں تے اوہدا آغاز سرکاری بچتاں نال ہووے تے دوجیاں نوں بوہتی ترغیب ملے گی۔ اوہناں نوں ستر اسی وزیر تے کئی مشیر ایس لئی رکھنا پیندے نیں کہ حکومت وچ حصہ لیتے بغیر کوئی اتحادی خوش نہیں رہ سکدا۔ کیہ پی ڈی ایم وچ شامل 13جماعتاں وچوں کوئی انج دا نہیں جہڑا ایہہ کہے کہ وزیراعظم صاحب اسیں وزارت سفارت یا کوئی عہدہ لیتے بغیر حکومت دے نال واں۔ ایہہ کیسی حب الوطنی اے کہ خزانے توں خالی اک ریاست وج ساریاں نوں وزارت عہدے گڈی بنگلیاں دے ذریعے سرخ رو ہون دا لالچ اے۔وزیراعظم نوں ہمت کر کے کابینہ نوں دس بار وزرا تک مختصر کرنا چاہیدا اے۔ وقتی طور تے سرکاری ٹرانسپورٹ دا بوہتا حصہ کھڑا کردتا جاوے۔ وزیر خارجہ بلاول بھٹو پیپلز پارٹی دے کوٹے توں حصہ دار نیں تے ضروری نہیں کہ اوہ مسلسل خود۔ چٹھی میرے ڈھول نوں پہچاویں وے کبوترا بن کے بیرون ملک پروازاں کردے رہن۔ اوہناں اتے اغیار ولوں ائیر فورس دے طیارے دے بہت زیادہ استعمال دا وی طنز کیتا اے۔ کیہ پڑوسی ملک بھارت یا بنگلہ دیش دے وزیر خارجہ وی ایسے طرحاں ائیر فورس دے طیارے اتے مسلسل دوریاں اتے رہے نیں۔قوم وچ بچت دا احساس اوس ویلے پیدا ہووے گا جدوں لیڈر بچت کردے نظر آن گے۔ باقیاں نوں نصیحت تے خود میاں فصیحت ایسے حوالے نال کہیا جاندا اے۔ ہن جد کہ آئی ایم ایف سنے سارے اکھاں وکھا رہے نیں تے امریکہ تک نے پاکستان نوں 200ملین ڈالر دی امداد اتے چیک اینڈ بلینس رکھن دا اعلان کردیاں ایہہ کہہ دتا اے کہ امداد دے استعمال دے معاملے نوں سنجیدگی نال ویکھنے آں۔ امریکی محکمہ خارجہ دے ترجمان نیڈ پرائس نے میڈیا بریفنگ وچ کہیا کہ پاکستان نوں 200ملین ڈالرز دی امداد اتے چیک اینڈ بلینس رکھاں گے۔ امریکی ترجمان دا کہنا اے کہ امریکی امداد دے مانیٹرنگ لئی مختلف تھاواں دے دورے کیتے جاندے نیں۔ امریکی ڈیزاسٹرسنٹر نے پاکستان دے کئی علاقیاں دا دورہ کیتا جتھے اقوام متحدہ تے غیر سرکاری تنظیماں دے نال رل کے کم کر رہے نیں۔ ایس توں پہلاں سعودی عرب دی قیادت ولوں ایہہ کہیا جا چکیا اے کہ اوہناں دا ملک پاکستان دی مدد کرے گا مگر دو طرفہ ذمہو اری دے نال۔ ایسے حالات وچ دو گلاں ضروری نیں اک تے حقیقی معنیاں وچ بچت کیتی جاوے تے بھاری بھرکم وزارتاں ختم کیتیاں جان درجناں افراد دے نال غیر ملکی دورے تے مہنگے ترین مقاماں اتے ٹھہر کے خزانے نوں لٹان دا سلسلہ ترک کر کے قوم دے اعتماد نوں بحال کیتا جاوے تے دوجا ہور اہم ترین ایہہ کہ قوم نوں باہمی تصادم توں بچان لئی بے جا محاذ آرائی دا ماحول ختم کیتا جاوے۔ الیکشن کمیشن انتخابات نوں ویلے اتے کران دی ذمہ واریاں پورے کرے تے حکومت بے جا گرفتاریاں تے اک دوجے دی کنڈزمین اتے لان دی روایت نوں جاری رکھن توں ہتھ کھچ لووے۔ا یس طرحاں قومی یکجہتی دی کوئی صورت پیدا ہو سکدی اے۔ کیہ ہن اوہ ویلا نہیں آ گیا کہ سارے اختیارات والے اپنے اپنے اندر جھانکن تے اک دوجے دے خلاف ذاتی پرکاش دے زنگ نوں کھرچ کے اپنے ولوں اللہ نال وعدہ کرن کہ اوہ قوم تے ملک نال مخلص ہو کے اپنا کردار ادا کرن گے تے سب توں اخیر وچ ایہہ کہ کاش ایہہ چٹھی وی کسی ڈھول تک پہنچ جاوے۔