لُوں لُوں رَچیاں پیڑاں دی مکھ وکھالی

آفاق بٹ

جناب مدثر اقبال بٹ دا شمار پنجابی نال پیار کرن والیاں آگواں وچ ہوندا اے۔ اوہ ہمیشہ ماں بولی نوں اوہدا حق دوان دی لڑائی وچ اگلیاں صفاں وچ کھلوتے نظر آئوندے نیں۔ اوہ ساریاں نفیاں تے نقصاناں نوں اک پاسے رکھ کے پنجابی دی سیوا نوں نوکراں وانگ اپنی نوکری سمجھ کے پوری توانائی دے نال ٹردے جا رہے نیں تے اوہناں نوں ایس خدمتگاری دا بدلہ اساں انسان کیہ دینا اے۔ اوہ جانن تے اوہناں دا ضمیر جانے جہدے آکھے لگ کے اوہ سارے پنجابیاں دی پنڈ نوں اپنے سر تے چک کے ٹری جا رہے نیں۔ اللہ کرے اوہناں دا ایہہ ٹورا ٹردا رہوے تے تاں جے پنجابی زبان دی کدھرے وی کنڈ نہ لگے۔
بٹ صاحب نے پنجاب‘ پنجابی تے پنجابیاں نال ہمیشاں ای بڑا پیار کیتا اے۔ پشلے دناں وچ اوہناں نے پنجابی یونین دی طرفوں بھلیکھا دی چھتر چھاویں پنجاب ہائوس لہور وچ گوجرانوالہ دے اک بڑے ای نامور پنڈ فیروزوالا نال تعلق رکھن والے معروف شاعر پنج کتاباں دے لکھاری قیصر محمود گورائیہ دی پنجابی غزلاں دی کتاب ’’لوں لوں اچیاں پیڑاں‘‘ دی تقریب رونمائی کروائی۔
تقریب دی نظامت گوجرانوالہ دے بڑے اچے لکھاری جناب احسان اللہ طاہر ہوراں کیتی۔ صدارت جان کاشمیری صاحب نے کیتی۔ اچیچے پروہنیاں وچ جناب محمد اقبال نجمی گوجرانوالہ‘ جناب امجد حمید محسن گوجرانوالہ‘ عدل منہاس لاہوری‘ محترمہ صائمہ الماس لاہور دے ناں سن۔ مہمانان اعزاز انور ندیم علوی (نواب شاہ)‘ لطیف ساجد (حافظ آباد)‘ اشرف کنول (گوجرہ)‘ محترمہ ڈآکٹر زرقا نسیم غالب (لاہور)‘ محترمہ حسن بانو دے ناں شامل نیں۔ ایس توں اڈ ہور بڑے اُچ کوٹی شاعر فراست بخاری‘ محترمہ رضا ہاشمی‘ صدام ساگر‘ محمد فیصل تے حسیب راجپوت نیں جنہاں محفل نوں چار چن لائے۔
تقریب نوں تناں حصیاں وچ وَنڈیا گیا۔ پہلے حصے وچ تقریب دے صدر جناب جان کاشمیری ہوراں نے اگے بیٹھے ہوئے شاعراں نوں کئی ادبی بجھارتاں پائیاں تے اوہناں وچ بڑے بڑے قیمتی انعام ونڈے۔
دوجے حصے وچ قیصر محمود گورائیہ ہوراں دی کتاب ’’لوں لوں رچیاں پیڑاں‘‘ اتے گل کتھ کردیاں ہویاں سبھ توں پہلاں احسان اللہ طاہر ہوراں نے قیصر گورائیہ دے ’’لوں لوں رچیاں پیڑاں‘‘ دیاں سراں تے ہُوکاں دی گل کردیاں ہویاں پوری کتاب پھول کے اوہدے وچ ورتیاں گئیاں اصطلاحواں دے اکھرکڈ کے باہر رکھ دتے۔ سامنے بیٹھے ہوئے لوکاں نوں ساری کتاب دی سیر کروا دتی۔
ایس توں مگروں گوجرانوالہ توں آئے استاد شاعر جناب امجد حمید محسنی صاحب ہوراں نے وی قیصر دی شاعری نوں فنی تے فکری طور تے پکی پیڈی شاعری کہہ کے لوں لوں رچیاں پیڑاں نوں خراج تحسین پیش کیتا تے فیر قیصر گورایہ تے لکھی ہوئی بڑی ای شاندار پنجابی نظم پڑھی جہدی چس ساریاں سنن والیاں نے لئی۔
فیر ڈاکٹر زرقا نسیم غالب ہوراں وی لوں لوں رچیاں پیڑاں تے گل بات کیتی تے اوسے کتاب وچوں اک غزل اپنے مٹھے تے سریلے انداز وچ پڑھی۔ ایناں توں مگروں گوجرانوالہ توں آئے اک بڑے سلکھنے کالم نگار تے شاعر جناب صدام ساگر ہوراں نے لوں لوں رچیاں پیڑاں تے بڑا سوہنا چھوٹا جیا تبصرہ کیتا تے فیر اک منظوم خراج عقیدت پیش کیتی۔
گوجرانوالہ توں صدر انجمن پٹواریان جناب صاحبزادہ حامد امین پٹواری ہوراں نے وی قیصر گورایہ تے اوہناں دی کتاب بارے بڑا بھرواں تے نویکلا خطاب کیتا تے بڑی چوکھی داد وصولی۔ محترمہ جناب صائمہ الماس ہوراں لکھیا کہ میں سمجھنی واں کہ کتاب دی تقریب تے موقع تے اپنے شعر سنان دی بجائے شاعر دی کتاب نے ای گل بات کرنی چاہی دی ا ے تے بڑی سوہنی گل بات کیتی۔ ایس توں مگروں تقریب دے اُچیجے پروہنے اقبال نجمی ہوراں نے لوں لوں رچیاں پیڑاں نوں سوہنا تے سلکھنا غزل پراگا متھدیاں ہویاں آکھیا کہ قیصر گوجرانوالہ دا نمائندہ شاعر اے۔
اخیر تے جناب صدر جان کاشمیری ہوراں نے لوں لوں رچیاں پیڑاں تے گل کردیاں آکھیا کہ قیصر محمود گورائیہ پنجابی رہتل دا نمائندہ شاعر اے تے اوہدی شاعری وچوں پنجابی وسیب ڈھلکاں مار رہیا اے۔
تقریب دے تیجے حصے وچ سارے شاعراں نے مشاعرہ پڑھیاتے بھرویں داد وصولی۔ اخیر تے قیصر محمود گورایہ ہوراں نے اپنی کتاب لوں لوں رچیاں پیڑاں وچوں واہوا غزلاں سنایاں تے سنن والیاں نے کھل کے داد دتی۔ ادارے ولوں قیصر محمود گورایہ نوں ایوارڈ نال نوازیا گیا تے ایس طرحاں تقریب اپنے اختتام تے اَپڑی۔ ساریاں پروہنیاں نوں جناب مدثر اقبال بٹ ہوراں پرتکلف لنگر کروایا تے ساریاں نوں پنجابی کتاباں تے کئی ہور قیمتی تحفے دے کے ٹوریا۔