بابا گورونانک یونیورسٹی شعبہ پنجابی دا پہلا کہانی دربار

ڈاکٹر سید غضنفر بخاری

ایہہ کیہ اے ؟
کلاس وچ وائٹ بورڈ اپر کجھ شبد لکھن مگروں ڈاکٹر اسلم نے اوہناں شبداں وَل اشارہ کردیا پچھیا ۔
سر ایہ شبد نیں آصف بولیا ایہہ شبد نہیں ایہہ لاشاں نے جو میں اپنی ماں بولی دے قبرستان وچوں تہاڈے لئی لے کے آیا ہاں
دکھ بھرے لہجے وچ ڈاکٹر نے جواب دتا
سر ایہہ لاشاں کیویں نے جاذبہ نے کاہل نال پچھیا
ایہہ لاشاں نکمے پتراں کر کے نیں کدے ایہہ لفظ وی ساڈی ماں بولی دے ویڑھے دا سوہنپن سن ایناں دی رلت لئی وی ماں بولی دے انبراپر چمکن والے تاریاں وچ سی پر ساڈے بھیڑے ورتارے پاروں ایناں ساہنوں چھڈ دتا۔ ڈاکٹر اسلم دی واج وچوں دکھ صاف نظری آرہیا سی سر ایناں لاشاں نوں تسی ساڈے ساہمنے کیوں لے کے آئے
او ذیشان نے پچھیا
ایس کر کے تاں جے تسیں جان سکو اسی کنے امیر ورثے دے مالک ساں پر اسیں اپنی ماں بولی نال متریئاں والا ورتارا کیتا اے۔جس پاروں ایہہ لفظ اتے ایناں دے ہزاراں ہور بھین بھرا چڑھائی کر گئے ڈاکٹر اسلم دیاں اکھاں وچ ہنجوسن اتے بی ایس پنجابی دی ساری کلاس نوں اداسی نے سکندر یونانی دیاں فوجاں واکن گھیریا سی۔سرکیہ اج وی کئی شبد مر رہے نیں انیسا نے ہولی جئی واج وچ پچھیا
ہاں جی اج وی لفظاں دے مرن دا کارچڑھا تے ہے اجوکے سمے اندر وی ساڈی ماں بولی دے ہزاراں شبد وینٹی لیٹر اتے پئے نیں جنہاں دیاں قبراں اسیں ماں بولی دے پتر اپنے ہتھاں نال کھٹ رہے ہاں ڈاکٹر اسلم نے جواب دتا
تسیں اج وعدہ کرو آپاں سب مل کے اوہناں شبداں نوں مرن نہیں دیواں گے اوہناں نوں وَرتاں گے اوہناں نال سمبندھ بناواں گے اوہ ساڈے سر دا تاج نیں اسیں اوہناں نوں آدر دیاں گے اوہناں نوں لاگیلاواں گے۔ڈاکٹر اسلم اکو ساہ وچ بہت کجھ آکھ گیا، اپنیاں گلیاں اکھاں صاف کردا کلاس دا بوہا باہر نوں ٹپ گیا۔ ساری کلاس وچ چپ دا ڈیرہ سی ہر بندہ اپنے من وچ متاپکا رہیا سی پئی اسیں اپنی ماں بولی دے اوہناں اَکھراں نوں وینٹی لیٹر توں لاہن دا جتن کراں گے حقی گل تے ایہہ پئی ماں بولی دے کجھ پتر اپنی ماں بولی نال انتاں دا پریت کرن والے نیں اوہ ہبے ویلے اپنی ماں بولی دا ناں اُچا کرن دے آہر وچ رجھے رہندے نیں۔پنجابی بولی توں دور ہونے والے بھیناں بھراواں نوں ماں بولی دے نیڑے لیاون دا پربندھ کردے نیں۔حقی گل تے ایہہ پئی ساڈا اپنی ماں بولی نال رشتا دنوں دن ماڑا ہوندا جا رہیا اے اسیں اپنی وسیب رہتل ماں بولی توں دور ہوندے جارہے ہاں ایسراں دے حالاتاں وچ ماں بولی دے پرچار لئی پروگرام کرناات لوڑیدا اے تاں جے نویں پیڑھی دا رشتا ماں بولی نال جوڑیا جا سکے۔تاں جے مرن لاگے اَپڑے اکھراں نوں ورت کے ماں بولی نوں جیوت رکھیے۔
وینٹی لیٹر اپر پئے پنجابی دے اکھراں نوں لاہن لئی ہی اک اُچیچے پروگرام دا اپرالا بابا گورونانک یونیورسٹی دے شعبہ پنجابی نے کیتا۔یونیورسٹی وچ کہانی دربار دا پربندھ کیتا گیا جیس وچ بی ایس پنجابی دی کلاس دے پڑھیاراں نے اپنیاں لکھیاں کہانیاں پڑھ کے سنائیں۔بابا گورو نانک یونیورسٹی دے وائس چانسلر پروفیسر ڈاکٹر محمد افضل جی ہوراں دی پردھانگی وچ کہانی دربار دا انعقاد کیتا گیا۔ہائر ایجوکیشن پنجاب دی میٹنگ کارن ڈاکٹر صاحب تشریف لے گئے۔زوالوجی ڈیپارٹمنٹ دی ہیڈ ڈاکٹر مریم اقبال اتے فائن آرٹس شعبہ دی ہیڈ شاہنیلا میم نے پنجابی کہانی دربار چ اُچیچی رلتی کیتی۔
بی ایس پنجابی دے پڑھیار جازبہ مختار،ذیشان علی،قمر عباس محمد آصف سحر بشارت نے اپنیاں لکھیاں کہانیاں پڑھیاں۔مقابلے دے جیتو ذیشان علی رہے جنہاں نے مسیت دے سرناویں ہیٹھ لکھی کہانی پڑھی اوہناں نوں ڈاکٹر مریم اقبال اتے میم شاہنیلا جی ہوراں نے شعبہ پنجابی وَلوں دمودرداس کھتری ایوارڈ دان کیتا۔میری جاچے ایہہ نکا جیہا اپرالا ساڈی نویں پیڑھی نوں پنجابی وَل پریرن لئی اچیچا کردار ادا کرے دا۔
یونیورسٹی دے وائس چانسلر جناب پروفیسر ڈاکٹر محمد افضل جی ماں بولی نال پریت کرن والی ہستی نیں اوہناں دا ایہہ منن اے پئی جے اسیں ماں بولی توں مکھ موڑاں گے تے فیر ماں بولی وی ساڈے توں دوراڈی ہوجائوے گی کیوں جے ماں بولی وچ انتاں دی انا ہوندی اے اوہ اپنی موت جرلووئے گی پر ساڈے اگے ترلے منتاں نہیں کرے گی پئی مینوں لکھو مینوں ورتو۔جناب وائس چانسلر ڈاکٹر افضل جی ہوراں نے چوکھی واری ایس گل دا اظہار کیتااوہناں دے دل دی سدھر اے پئی لفظاں نال پڑھیاراں دا انگ ساک پکا پیڈا بنایا جائے اوہ لکھن اتے پڑھن دے آہر وچ کھب کے رجھن تاں جے ساڈی ماں بولی دا سنجھاویڑھا فیر اک وار آباد ہوسکے۔پروگرام دے اخیر وچ ڈاکٹر مریم اقبال جی نے پنجابی کہانی اتے ایدی اجوکے سمے وچ اہمیت بارے چانن پایا ایس توں اَڈ اوہناں نے پنجابی بولی دے ودھا لئی پڑھیاراں نوں سجھا دِتے۔شعبہ پنجابی آن والے سمے اندر ہور ایسراں دے پروگرام کرن دا ارادہ رکھدا اے جس وچ جگت پدھر دے کہانیکاراں نوں رلتی دا سدا دتا جائوے دا ۔