ارشد شریف قتل کیس دی تحقیقات وچ غلطیاں ہوئیاں:سپریم کورٹ

اسلام آباد( پنجابی میڈیا)چیف جسٹس آف پاکستان جسٹس عمر عطا بندیال نے ارشد شریف قتل کیس از خود نوٹس دی سماعت دے دوران ریمارکس دیندیاں آکھیا کہ پاکستان تے بیرون ملک تحقیقات وچ کجھ غلطیاں ہویاں نیں۔چیف جسٹس پاکستان عمرعطا بندیال دی سربراہی وچ جسٹس اعجاز الاحسن، جسٹس منیب اختر، جسٹس جمال خان مندوخیل تے جسٹس محمد علی مظہر اُتے مشتمل5رکنی بینچ نے ارشد شریف قتل از خود نوٹس کیس دی سماعت کیتی۔ارشد شریف دے قتل دی تفتیش کرن والی جے آئی ٹی نے دُوجی پیش رفت رپورٹ عدالت وچ جمع کرادتی۔دوران سماعت سپریم کورٹ نے سربراہ جے آئی ٹی اویس احمد دی سرزنش کیتی، جسٹس مظاہر نقوی نے استفسار کیتا کہ جیہڑا کم تہاڈے ذمہ لایا سی اوہ ہویا یا نہیں؟ کینیا توں قتل بارے کوئی موادملا یا نہیں؟کہانیاں نہ سنایاں،تہانوں شاید گل سمجھ نہیں آرہی۔ جواب وچ جے آئی ٹی دے سربراہ نے اکھیا کہ ارشد شریف قتل اُتے کینیا توںکوئی ٹھوس مواد نہیں ملا،کینیا نے شواہد تک رسائی نہیں دتی،جس اتے جسٹس مظاہر نقوی ریمارکس دتے کہ شواہد دی گل تے ٹرائل وچ سامنے آئے گی، ایہ دسو کہ مواد کیہڑا جمع ہویا؟جسٹس اعجازالاحسن نے ریمارکس دتے کہ ارشد شریف دا موبائل تے ہورسامان کیتھے اے؟ جواب وچ جے آئی ٹی دے سربراہ اویس احمد نے دسیا کہ موبائل تے آئی پیڈ کینیا دے آئی ٹی ڈیپارٹمنٹ دے کول اے، ارشد شریف دا باقی سامان موصول ہوچکیا اے۔ایڈیشنل اٹارنی جنرل نے عدالت دے ساہمنے آکھیاکہ ارشد شریف اُتے مقدمے کران والیاں توں وی تفتیش ہورہی اے، بعض سرکاری افسراں دے نام آئے،اوہناںتوں وی تفتیش کیتی گئی، مقدمے درج کران دے پیچھے کون سی اجے تک نہیں کہہ سکدے۔ایڈیشنل اٹارنی جنرل دی گل بات اُتے جسٹس مظاہر نقوی نے ریمارکس دتے کہ عدالت نال کھیڈ نہ کھیڈو، پہلا مرحلہ تے ایہی سی جیہڑا مکمل نہیں ہوسکیا،کیا جے آئی ٹی کینیا تے یو اے ای وچ تفریح کرن گئی سی؟دوران سماعت چیف جسٹس نے استفسار کیتا کہ پاکستان وچ تحقیقات اندر غلطیاں ہویاں ، کیس دی فیکٹ فائنڈنگ رپورٹ بغیر تصدیق پبلک کر دتی گئی، کسی نے جان بجھ کے پبلک کیتی اے، پتہ کرو کہ فیکٹ فائنڈنگ رپورٹ عام کرن پیچھے کون سی؟دوران سماعت جسٹس مظاہر نقوی نے ریمارکس دتے کہ کینیا پلس جس کہانی اُتے تحقیقات کررہی اے اوہ قابل قبول نہیں، ارشد شریف قتل اُتے جے آئی ٹی بنان دی ایہی وجہ سی۔