ضمنی مالیاتی بل پیش،لگژری شیواں سنے شادی ہال،ہوٹل،سیمنٹ اُتے ٹیکس وَدھ گئے

اسلام آباد(پنجاب ی میڈیا)وفاقی وزیر خزانہ اسحاق ڈار نے ضمنی مالیاتی بل ایوان وچ پیش کردتا،وزیراعظم شہباز شریف اجلاس وچ رَلتی نہیں ہوئے۔قومی اسمبلی وچ پیش کیتے گئے فنانس سپلیمنٹری بل2023 وچ مختلف شیواں اُتے جی ایس ٹی دی شرح 17توںودھا کے18فیصد کردتی گئی،شادی ہال تے ہوٹل،کمرشل لانز،مارکی تے کلب اُتے ایڈوانس ٹیکس عائد کرن دی تجویز، موبائل فون اُتے وی ٹیکس ودھان دی تجویز شامل کیتی گئی اے۔منی بجٹ وچ فضائی ٹکٹاں اُتے ایڈوانس ٹیکس ، تے مشروبات دی ری ٹیل پرائس اُتے وی10فیصد ٹیکس لایا گیا اے، سیمنٹ اُتے50پیسے فی کلو ٹیکس ودھان دی تجویز دتی گئی اے جس نال سیمنٹ اتے فیڈرل ایکسائز ڈیوٹی ڈیڑھ روپے توںودھا کے 2روپے کلو کرن دی تجویز دتی گئی اے۔ایوان وچ گل بات شروع کر دیاں اسحاق ڈار نے آکھیا کہ ضمنی مالیاتی بل اُتے ایوان نوں اعتمادوچ لینا چاہندا ہاں،مسلم لیگ(ن) دے دور وچ جی ڈی پی وچ112ارب ڈالر دا ودھا ہویا،سلیکٹڈ حکومت پاروں معیشت تھلے آئی، پی ٹی آئی دے4ورھے دے دور وچ جی ڈی پی وچ36ارب ڈالر ودھ ہویا۔اوہناں نے آکھیا کہ مسلم لیگ ن دے پچھلے دور وچ 1ہزار389ڈالر فی کس آمدنی سی،معاشی تنزلی دی وجہ جانن لئی قومی کمیشن تشکیل دتا جائے،اج پوری قوم بھاری قیمت ادا کر رہی اے،موجودہ حکومت نوں بیمار معیشت ملی،پی ٹی آئی دور وچ قرضہ24ہزارارب روپے توں وَدھ کے44ہزار ارب روپے ہو گیا،مسلم لیگ ن دے دور وچ کھان پین دیاں شیواں دی مہنگائی2فیصد سی۔اسحاق ڈار نے آکھیا کہ موجودہ حکومت نے جَد معیشت سنبھالی تے ناگہانی سیلاب دی آفت نے گھیر لیا، وزارت منصوبہ بندی تے عالمی اداریاں دے مطابق سیلاب پاروں30ارب ڈالر نقصان دا اندازہ لایا گیا اے،سیلاب زدہ علاقیاں وچ بیماریاں پھُٹ پئیاں تے کپاس سنے اہم فصلاں تباہ ہو گئیاں۔اوہناں آکھیا کہ عمران خان حکومت نے آئی ایم ایف نال معاہدہ کیتا سی،جنہاں نے معاہدہ نہیں پڑھیا اوہ ضرور پڑھن،عمران خان نے اپنے ہی کیتے معاہدے توں انحراف کیتا،جس دے نتیجے وچ آئی ایم ایف پروگرام تعطل دا شکار ہویا، آئی ایم ایف نال معاہدہ اک حکومت نہیں ریاست دا معاہدہ ہُندا اے، ساڈی حکومت نے آئی ایم ایف پروگرام نوں بحال کرایا۔اسحاق ڈار نے آکھیا کہ31جنوری توں لے کے9فروری تک آئی ایم ایف نال مذاکرات ہوئے، آئی ایم ایف پروگرام بحال کرن لئی سیاسی جماعتاں دا پولیٹیکل نقصان ہویا، آئی ایم ایف دا مشن کجھ دن پہلاں پاکستان آیا جس نال نویں اقتصادی مذاکرات ہوئے،آئی ایم ایف دے نال170ارب روپے دے نویں ٹیکس لان اُتے گل بات ہوئی۔اوہناں آکھیا کہ پاکستان وچ بجلی دے سرکلر ڈیٹ دا مسئلہ کئی ورھیاں توں چل رہیا اے، بجلی دے شعبے وچ اصلاحات بوہت ضروری اے، عالمی مالیاتی اداریاں نے بجلی دے شعبے وچ اصلاحات اُتے زور دتا اے، کابینہ نے170ارب دے وَدھ ٹیکس لان دی منظوری دتی اے۔اسحاق ڈاردا کہنا سی کہ روزمرہ دیاںشیواں اُتے وَدھ ٹیکس نہیں لایا جائے گا، نمبر ون، لگژری آئٹماں اُتے ٹیکس نوں25فیصد کردتا گیا اے،دُوجا،شادی ہالاں دیاں تقریباں دے بلاں وچ10فیصد ایڈوانس انکم ٹیکس نافذ کیتا جائے گا، جی ایس ٹی دی شرح نوں17فیصد توںودھا کے18فیصد کیتا جا رہیا اے۔وزیر خزانہ نے آکھیا کہ500ڈالر توں وَدھ کے درآمدی موبائل فون اُتے سیلز ٹیکس25فیصد کرن دی تجویز اے،درآمدی موبائل فون اُتے17فیصد جی ایس ٹی عائد سی،ساڈی نیت ٹھیک اے انشا اللہ دوبارہ ترقی وَل جاواںگے، لگژری آئٹماں اُتے جی ایس ٹی17توںوڈھا کے25فیصد کرنے دا فیصلہ کیتا اے،ایس دا مقصد امیر طبقے اُتے وَدھ ٹیکس لانا اے، روزمرہ استعمال دیاں شیواں اُتے ٹیکس نہیں لایا گیا۔