سو موٹودا اختیار سپریم کورٹ دے3ججاںنوں ہوئے گا، بل قومی اسمبلی توں منظور

اسلام آباد(پنجابی میڈیاگروپ)عدالتی اصلاحات بارے سپریم کورٹ پریکٹس اینڈ پروسیجر بل2023متفقہ طور اُتے قومی اسمبلی توں منظور کر لئیا گیا۔اسپیکر راجہ پرویز اشرف دی زیر صدارت قومی اسمبلی اجلاس شروع ہویا تے سپریم کورٹ پریکٹس اینڈ پروسیجر بل اُتے قائمہ کمیٹی دی رپورٹ ایوان وچ پیش کیتی گئی۔ قائمہ کمیٹی رپورٹ چیئرمین محمود بشیر ورک نے ایوان وچ پیش کیتی ۔ عدالتی اصلاحات بارے سپریم کورٹ پریکٹس اینڈ پروسیجر بل2023دی شق وار منظوری لئی گئی، بل2023اُتے رائے شماری دی تحریک منظور کیتی گئی۔محسن داوڑ نے بل وچ ترمیم پیش کر دتی تے وفاقی وزیر اعظم نذیر تارڑ نے ترمیم دی حمایت کر دتی ۔ محسن داوڑ نے آکھیا کہ کراچی دا نسلہ ٹاور وی ازخود نوٹس پاروں ڈیگیا گئیا۔اوہناں نے تجویز دتی کہ ماضی وچ184/3دے متاثرین نوں30دناں وچ اپیل دا حق دتا جائے۔پیپلزپارٹی نے محسن داوڑ دی ترمیم دی حمایت کردتی جس دے بعد ماضی وچ184/3دے متاثرین نوں اپیل دا حق دین دی ترمیم منظور کرلئی گئی۔قومی اسمبلی وچ بل پیش ہون دے بعد قومی اسمبلی وچ اظہار خیال کردیاں ہویاں جماعت اسلامی نال تعلق رکھن والے عبدالاکبر چترالی نے آکھیا کہ پاکستان نوں بوہت سارے مسائل درپیش نیں سب نوں ویکھیا جائے تے ساہنوںاپنے اداریاں نوں مستحکم کرنا چاہیدااے ،سپریم کورٹ یا عدلیہ اپنے فرائض منصبی ادا نہیں کر رہے۔ سپریم کورٹ دے جج غلط ازخود نوٹس لیندے رہے نیں ۔ مولانا عبدالاکبر چترالی نے آکھیا کہ اک جج نے حافظ قرآن نوں وَدھ نمبر دین اُتے وی اعتراض کیتا اے جدکہ تورات تے انجیل داحوالہ وی دتا، اوہناں نون پتہ ہونا چاہیدا اے کہ اسیں آسمانی کتاباں اُتے ایمان رکھدے ہاں البتہ تورات،زبور تے انجیل معطل ہوچکے۔ قرآن پاک ساڈا ایمان اے تے قرآن پاک دا اوس طرح موازنہ نہیں کیتا جاسکدا۔پی ٹی آئی رکن صالح محمد نے آکھیا کہ ایہ قنون سازی آزاد عدلیہ اُتے قدغن لان دے مترادف اے، عدلیہ وچ اصلاحات دے حق وچ اے لیکن ڈاکہ مارن دے حق وچ نہیں۔ بل عجلت وچ پاس کرن دی بجائے بحث لئی ٹائم دینا چاہیداسی۔