قومی اسمبلی نے سپریم کورٹ آف پاکستان دے 3رکنی بینچ خلاف قرار داد منظور لئی

اسلام آباد (پنجابی میڈیا گروپ)قومی اسمبلی نے سپریم کورٹ آف پاکستان دے 3 رکنی بینچ خلاف قرار داد منظور کردیاں آکھیا اے کہ عدالتی فیصلے نوں پارلیمنٹ مسترد کردی اے،ایوان وزیراعظم تے کابینہ نوںپابند کردا اے اِیس خلاف آئین وقنون فیصلہ اُتے عمل نہ کیتاجائے،دستور دے آرٹیکل 63 اے دی غلط تشریح تے ایس نوں عدالت عظمیٰ فیصلے ذریعے ازسر نو تحریر کیتے جان اُتے شدید تشویش اے ،عدالت عظمیٰ دا فل کورٹ ایس اُتے نظر ثانی کرے۔ جمعرات نوں اجلاس دے دوران باپ پارٹی دے پارلیمانی لیڈر خالد مگسی نے قرارداد پیش کیتی جس دی ایوان نے منظوری دے دتی ۔قرارداددے متن مطابق ایہ کہ مورخہ28 مارچ 2023 نوں معزز ایوان دی منظور کردہ قرارداد وچ ازخود نوٹس کیس نمبر1/2023 وچ سپریم کورٹ دے 4 جج صاحبان دے اکثریتی فیصلے دی تائید کردیاں ہویاں ایس اُتے عمل درآمد تے اعلیٰ عدلیہ توں سیاسی وانتظامی امور وچ بے جا مداخلت توں گریزدا مطالبہ کیتا سی اکثر حلقیاں نے وی فل کورٹ دی تشکیل دا مطالبہ کیتا سی لیکن اِیس نوں منظور نہیں کیتا گیا، نہ ہی 1 دے سوا ہور سیاسی جماعتاں دا موقف سُنیا گیا۔ پارلیمنٹ دی ایس واضح قرارداد تے سپریم کورٹ دے 4جج صاحبان دے اکثریتی فیصلے نوں مکمل نظر انداز کردیاں ہویاں 3 رکنی مخصوص بینچ نے اقلیتی رائے مسلط کردتی جیہڑی سپریم کورٹ دی اپنی روایات، نظائر تے طریقہ کار دی وی خلاف ورزی اے،اکثریت اُتے اقلیت نوں مسلط کردتا گیا اے ،3 رکنی اقلیتی بینچ دے فیصلے نوں پارلیمان مسترد کردی اے تے آئین وقنون مطابق اکثریتی بینچ دے فیصلے نوں نافذالعمل قرار دیندی اے۔ قرارداد وچ آکھیاگیاکہ ایہ اجلاس آئین پاکستان دے آرٹیکل 184 (3) تحت دائر مقدمیاں نوں فل کورٹ میٹنگ دے فیصلیاں تک سماعت لئی مقرر نہ کرن تے عدالت عظمیٰ دے 3 رکنی بینچ دے فیصلے دی تائید کردا اے تے اک ایگزیکٹو سرکلر ذریعے ایس اُتے عملدرآمد روکن دے اقدام نوںگہری تشویش دی نظر نال ویکھدا اے، ایہ ایوان اُوسی عدالتی فیصلے نوں عجلت وچ اک ہورمتنازعہ بینچ ساہمنے سماعت لئی مقرر کرن تے کنج منٹاں وچ ایس فوری فیصلے توںشدید تحفظات دا اظہار کردا اے کہ اینج دا عمل سپریم کورٹ دی روایت تے نظائر دے صریحاً خلاف اے۔ لہذا ایہ ناقابل قبول اے۔