ناانصافی ہو رہی ہووے تے ایس تے اکھاں بند نہیں کیتیاں جا سکدیاں، سپریم کورٹ

ہائی کورٹ دا جج اپنے فیصلے وچ بہت اگے چلا گیا، جج نے غصے وچ فیصلہ دتا، صنم جاوید بریت کیس وچ جسٹس ہاشم کاکڑ دے ریمارکس

اسلام آباد (بیورورپورٹ) صنم جاوید دی 9 مئی مقدمے توں بریت دے خلاف کیس دی سماعت وچ سپریم کورٹ دے جسٹس ہاشم کاکڑ نے ریمارکس دتے نیں کہ اگر ناانصافی ہووے تے ایس تے اکھاں بند نہیں کیتیاں جا سکدیاں۔ سپریم کورٹ وچ 9 مئی مقدمیاں وچ صنم جاوید دی بریت دے فیصلے دے خلاف پنجاب حکومت دی اپیل تے سماعت ہوئی، جس وچ حکومتی وکیل نے دلائل دیندے ہوئے آکھیا کہ صنم جاوید دے ریمانڈ دے خلاف لہور ہائیکورٹ وچ درخواست دائر ہوئی۔ ریمانڈ دے خلاف درخواست وچ لہور ہائیکورٹ نے ملزمہ نوں مقدمے توں بری کر دتا۔ جسٹس ہاشم کاکڑ نے ریمارکس دتے کہ ایہناں کیساں وچ تے عدالت توں ہدایتاں جاری ہو چُکیاں نیں کہ 4 مہینے وچ فیصلہ کیتا جائے۔ ہون تسیں ایہ مقدمہ کیوں چلانا چاہندے ہو؟ جس تے وکیل نے جواب دتا کہ ہائی کورٹ نے اپنے اختیارات توں ودھ کے فیصلہ دتا تے ملزمہ نوں بری کیتا۔جسٹس ہاشم کاکڑ نے آکھیا کہ میرا ایس حوالے توں فیصلہ موجود اے کہ ہائیکورٹ کول سارے اختیارات ہوندے نیں۔ اگر ہائیکورٹ نوں کوئی خط وی ملے کہ ناانصافی ہو رہی تے اوہ اختیارات استعمال کر سکدی اے۔ اگر ناانصافی ہووے تے ایس تے اکھاں بند نہیں کیتاں جا سکدیاں۔ وکیل پنجاب حکومت نے آکھیا کہ ہائیکورٹ سوموٹو اختیارات دا استعمال نہیں کر سکدی، جس تے جسٹس صلاح الدین نے ریمارکس دتے کہ کریمنل ریویژن وچ ہائی کورٹ کول تے سوموٹو دے اختیارات وی ہوندے نیں۔ صنم جاوید دے وکیل نے دسیا کہ اسیں ہائیکورٹ وچ ریمانڈ نال بریت دی درخواست وی دائر کیتی سی۔ جسٹس ہاشم کاکڑ نے ریمارکس وچ آکھیا کہ ہائی کورٹ دا جج اپنے فیصلے وچ بہت اگے چلا گیا۔ لہور ہائیکورٹ دے جج نے غصے وچ فیصلہ دتا۔ بعد وچ عدالت نے مقدمے دی سماعت غیر معینہ مدت تک ملتوی کر دتی۔