پنجابی گیت
بابا نجمی
اسیں کیوں نہیں اپنی زبان بولدے
جیویں ساڈے سندھی تے پٹھان بولدے
لوکاں وانگوں سانوں کدوں ہوش آوے گا
سُتے ہوئے ضمیر وچ جوش آوے گا
میرے ولوں اج دا بیان بولدے
اسیں کیوں نہیں اپنی زبان بولدے
صدیاں دی بولی ایویں چھڈی جانے آں
گھر والی گھر وچوں کڈھی جانے آں
وجے ساڈا ڈھول تے میدان بولدے
اسیں کیوں نہیں اپنی زبان بولدے
چُپ والے جندرے نوں توڑ بیلیا
زندگی نوں بولی نال جوڑ بیلیا
پنجابیا! پنجابی ساڈی جان بولدے
اسیں کیوں نہیں اپنی زبان بولدے
چڑھدے نیں ہال تے دھمال پیندی اے
رج رج دنیا سرور لیندی اے
بابیاں دے جدوں نیں دیوان بولدے
اسیں کیوں نہیں اپنی زبان بولدے
