غزل

شاہدہ دلاور شاہ

جد دا اوہدا آئون نہیں ہُندا
ہار شنگار وی لائون نہیں ہُندا
منگتے منگن رس ملائیاں
سُکے ٹک چبائون نہیں ہُندا
’’موب‘‘ تے ’’ٹوڈی‘‘ لے دے مینوں
کچے گھڑے آئون نہیں ہُندا
’’ڈے کیئر‘‘ نے بال سنبھالے
بہتا کھپ کھپائون نہیں ہُندا
دُنیا دے وچ آئے پروہنے
کماں نوں ہتھ لائون نہیں ہُندا
جس مزدور چبارے چھتے
اُس نوں سر لکائون نہیں ہُندا
جمدے بال سیانے ایڈے
گلاں نال ڈرائون نہیں ہُندا
دل دا مقصد اکھراں دے وچ
شاہدہ تیتھوں پائون نہیں ہُندا