غزل
رومی بینس کھرلاں
میں اک دِھی دی چیک سنی اے
دھرتی توں انبر تیک سنی اے
بن کنجک کوجے قسمت نوں
ماپیاں نوں پکار رہی
ہوئی ہونی جہدی شریک سنی اے
دروپدی نوں بچا کے ہی
رب دا جگرا مک گیا
تاہیں تاں اج نیویں پا کے
پتھراں دے وچ لک گیا
فیر کرشن دی کردی اڈیک سنی اے
میں اِک دِھی دی چیک سنی اے
اوس دِھی دے ٹٹے انگاں دی
قلم بنائی تکھی میں
اپنے لہو چ ڈوب ڈوب کے
پیڑ اوسدی لکھی میں
رومی تن تے پیندی لیک سنی اے
میں اِک دِھی دی چیک سنی اے
ماس کھادا نوچ کاواں نے
جو زہر نیپالے ماواں نے
سیک مکیا سورج چوں
شوکناں بھلیاں ہواواں نے
ساہ پیندی موت لا ڈِیک سنی اے
میں اک دِھی دی، چیک سنی اے
دھرتی توں انبر تیک سنی اے
