دل دی بینتی
ارشاد کھوکھر
بوہتے نالوں تھوڑا لکھیں، لکھیں ذرا سوادی
اکھر اکھر خوشیاں ونڈے پھیرے نہ بربادی
پڑھن والے نوں وچوں لبھن پیاریاں مٹھیاں گلاں
دکھی دل وی رڑھنے پئے جائے جویں سمندر چھلاں
تن من سارا رنگیا جاوے رہوے نہ مُشکل ڈاڈھی
بوہتے نالوں تھوڑا لکھیں، لکھیں ذرا سوادی
ایہو جہی شاعری کر ماں دا وگڑ نہ کوئی بچہ
ایہو جہی تحریر چھپا جا وگڑیا ہویا جائے اچھا
ماں پیو جتھے چاہندا ہووے اوتھے کر لئیں شادی
بوہتے نالوں تھوڑا لکھیں، لکھیں ذرا سوادی
رب دی دھرتی عقل دانائی چنگے پاسے لاویں
مندہ جہڑا چنگا ہو جائے ایسراں شعر بناویں
پڑھ کے تینوں خوش ہووے سب نگری شہر تے وادی
بوہتے نالوں تھوڑا لکھیں، لکھیں ذرا سوادی
چنگے لفظیں کرن ہمیشہ لوکی تینوں یاد
لکھیا تیرا مرن نہ دیوے کدی تینوں ارشادؔ
سیوا ماپیاں دی اے چنگی شہر چ کر منادی
بوہتے نالوں تھوڑا لکھیں، لکھیں ذرا سوادی
