غزل

بیراجی

جمن بھوئیں دے جندڑی وچ بٹوارے ویکھے جاندے نہیں
غیراں وانگ بھراواں دے ورتارے ویکھے جاندے نہیں
اکھ جھمکدیاں بدل گیا اے دور پرانیاں رسماں دا
سانبھن والے کِتے وی اج سہارے ویکھے جاندے نہیں
رج دا نہیں پیا ویکھ کے مُکھڑا سجناں دا دل حالے وی
ہن وی اوہدیاں اکھیاں دے لشکارے ویکھے جاندے نہیں
بے دوشاں دیاں ویکھ کے لاشاں قابو وچ دل نہیں رہندا
گھمن گھیر چ ڈبدے ہوئے وچارے ویکھے جاندے نہیں
بالاں دا چنگا مستقبل ویکھن لئی اکھ ترس گئی
معصوماں دی جندڑی دے انگیارے ویکھے جاندے نہیں
اپنے گھر سُکھ لبھدا اے ہن اُچیاں نوں میں ویہندا نہیں
وڈیاں کوٹھیاں وڈے ہون دوارے ویکھے جاندے نہیں
کد جاگن گے بیراجیؔ رھوالے ساڈیاں جاناں دے
کھلے پھردے شہراں وچ ہتھیارے ویکھے جاندے نہیں