غزل
ارشاد کھوکھر
اوہدے کولوں ہر سکنا واں
اوہدی خاطر مر سکنا واں
سولی اُتے چڑھ کے لوکو
سچی گل میں کر سکنا واں
اوہدے چھپر ہیٹھاں بہہ کے
کسراں تیتھوں ڈر سکنا واں
حق سچ تے اصولاں دے لئی
ظالم نال وی لڑ سکنا واں
اپنے سوہنے یار دی خاطر
دکھ مصیبت جر سکنا واں
ہسدی تے شرماندی اکھ وچ
اتھرو بن کے تر سکنا واں
دل ہتھوں مجبور ہو کے
بانہہ وی اوہدی پھڑ سکنا واں
رب دی رحمت ہووے تے میں
ڈھڈ وی بھکھا بھر سکنا واں
توں تے کوئی شے نہیں ارشاد
ویلا قید وی کر سکنا واں
