پیار دی دید

انور اُداس

مائے! سُدھ نہ کائی مینوں
دُنیا اَتّ پرائی مینوں
اوہدے ناں دی جوت جگائی
کِیہ پِیّا نے دِید کرائی
منطق ، نحو بھُلائے اوہنے
اَنحد تار وَجائے اوہنے
جیہناں دی سُر سوچ سمائی
کِیہ پِیّا نے دِید کرائی
گلّاں رازاں والیاں کھُلیاں
روزے ، حجّ ، نمازاں بھُلیاں
اوہدی ہر تھاں دیاں دُہائی
کِیہ پِیّا نے دِید کرائی
کِیہ دَسّاں میں تینوں مائے
اوہنے میرے بخت جگائے
مَن شِیشے توں مَیل ہٹائی
کِیہ پِیّا نے دِید کرائی
ہر تھاں اُتّے اوہدے واسے
اوہدے جلوے ہر ہر پاسے
منّے اوہنوں کُلّ خُدائی
کِیہ پِیّا نے دِید کرائی
حُسن پِیّا دا بَلّے بَلّے
نظر! تجلّی تاب نہ جھلّے
رکھّے سوہنا شان سوائی
کِیہ پِیّا نے دِید کرائی