غزل

قیصرمحمودگورایہ

اپنی کل جاگیر سنبھال کے رکھی اے
میں تیری تصویر سنبھال کے رکھی اے
وارث شاہ دے سِر اے پگ اجے تیکر
رانجھے دی جس ہیر سنبھال کے رکھی اے
یاداں والا کدی وساہ نہیں کھادا میں
سوچاں دی تدبیر سنبھال کے رکھی اے
سینے دے صندوق چ جندرے مار اساں
دکھاں دی تاثیر سنبھال کے رکھی اے
بندیاں دی ونڈے بے وسیاں آئیاں نیں
ہر شے تے تقدیر سنبھال کے رکھی اے
قیصرؔ لِکھ کے دِتے توں کِنج مُکریں گا
تیری ہر تحریر سنبھال کے رکھی اے