غزل
بابا نجمی
اسلحے نالوں اپنی پیداوار ودھائیے چنگا اے
تیسی کانڈی رمبے کہی دی دھار ودھائیے چنگا اے
لاشاں باجھوں کجھ نہیں دینا پرتھوی سانوں غوری نے
ایہناں نالوں پھُلاں دی مہکار ودھائیے چنگا اے
مینوں زہر وکھالی دیندے اپنے وی بیگانے وی
جہڑے آکھن اپنے خدمت گار ودھائیے چنگا اے
نویاں نسلاں بھنگڑے پاون ویکھ کے اپنے ورثے نوں
اُچے کریئے کوٹھے کاروبار ودھائیے چنگا اے
چُک کے سر جے متھے لگنا اکیہویں صدی دے باباؔ جی
ہمت کرکے اپنی ہن رفتار ودھائیے چنگا اے
