غزل
اخترلاہوری
لد گئے محرم راز دلاں تے دے کے داغ جدائی
دم مارن دی جاہ نہیں کوئی رب دی بے پروائی
کھو کے موت حیاتی لے گئی کر گئی سُنجا ویہڑا
ملک عدم دل جاندے ویکھے پرت نہ آئے راہی
دے کے دید وچھوڑے دے گئے دل نوں ملی حیرانی
نظراں اولھے ہو کے سجن کر گئے یار سودائی
چانن اکھاں دا کھو کے تے چھڈ گئے وچ ہنیرے
دے گئے یار حیرانی سانوں ایہدی سمجھ نہیں آئی
اختر پیارے ایہہ کیہ ہویا سوچاں پلے پئیاں
ہسدے وسدے ایہہ کیہ ہویا پلے پئی جدائی
