عید دیاں بدلدیاں روایتاں

نگہت اکرم

عیدالفطر مسلماناں دا اجتماعی مسرتاں دا تہوار اے جہدے وچ چھوٹے وڈے‘ امیرغریب اپنی اپنی استطاعت دے مطابق شریک ہوندے نیں تے عیدالفطر مناندے نیں۔ اللہ تعالیٰ نے مسلماناں نوں رمضان دے روزے رکھن دے عوض عید دیاں خوشیاں دتیاں۔ اک ویلا سی جدوں میویاں دے بناں عید دا تہوار ادھورا سمجھیا جاندا سی پر ہن کیک تے مٹھائیاں اوہدا متبادل ہو گیا اے۔ ایہو وجہ اے کہ عید توں پندرھاں دن پہلاں ای عید کیک تے مٹھائیاں دے آرڈر دتے جاندے نیں تے پندرھاں ویہہ سال پہلاں دی عید تے اج دی عید وچ نمایاں فرق آ گیا اے۔ عید توں پہلاں دوستاں‘ عزیزواقارب نوں تحفے دتے جاندے سن جہدے وچ کھان پین والیاں شیواں میویاں‘ چینی‘ آٹا‘ چاول تے دوجے قیمتی تحفے ہوندے سن تقریباً ختم ہو گئی اے۔
جدت پسندی انسان دی فطرت وچ شامل اے ایس لئی عید والے دن عید کیک نوں اہمیت دتی جاندی اے۔ اک روایت ہور وی سی کہ لوک اک دوجے دے گھراں وچ عید دی صبح صبح سیویاں گھلدے سن پر ہن آنڈھ گوانڈھ تے دوست احباب دے گھراں وچ پکیاں سیویاں وی ساڈیاں رسماں وچ تبدیلی وقت دا تقاضا اے۔ عید دا چن نظر آندے ای زندگی جاگ اٹھدی اے ہر پاسے گہماگہمی شروع ہو جاندی اے۔ گھراں دے اندر باہر قہقہے شور تے رنگ دی برسات ہو جاندی اے ہر بندہ ایہناں تیاریاں وچ مصروف ہو جاندا اے۔ پہلے کڑیاں گھراں وچ بہہ کے مہندی لواندیاں سن ساریاں سہیلیاں مل جل کے خوب اودھم مچاندیاں سن پر ہن مہندی لوان پارلر دے رخ کیتے جاندے نیں۔ عید دے دناں وچ پارلر دی اہمیت ودھ گئی ہن تے چن دا اعلان ہوندے ای کڑیاں منڈے سبھ بازاراں دا رخ کردے نیں تاں جے چن رات ہلہ گلہ وی ویکھیے ہر پاسے رنگ‘ خشبو تے روشنیاں کھلریاں نظر آندیاں نیں ایہناں رنگاں نوں سمیٹ کے عید دی حقیقی خشی حاصل کر سکیے۔ چھتاں تے چڑھ کے اپنے گھر والیاں دے نال چن ویکھن دی روایت وی ہن گھٹ گئی اے۔
دور جدید دی حیرت انگیز ایجاد میڈیا توں چن دا پتہ چل جاندا اے۔ رات نوں چن ویکھدے بزرگاں نوں چن مبارک کہن دی روایت کدھرے کدھرے ای ویکھی جاندی اے۔ چوڑیاں عید دی سب توں رنگین روایت اے جہڑی روایت کدی ختم نہیں ہووے گی عید توں پہلاں تھاں تھاں چوڑیاں دے سٹال لگ جاندے نیں تے تیز روشنیاں دے نال نال چوڑیاں خشنما بہار وکھاندیاں نیں تے سوانیاں نوں اپنے ول متوجہ کردیاں نیں تے عورتاں آپ وی تے اپنیاں سہیلیاں لئی وی خرید دیاں نیں۔
عیدکارڈ اک خوبصورت روایت سی پر ہن عیدکارڈ گھلن دا رواج مُک گیا اے ہن انٹرنیٹ تے وٹس ایپ تے موبائل ایس ایم ایس نے ایس روایت نوں گھٹ کر دتا اے پر عید کارڈ گھلن دا اپنا ای اک مزا ہوندا سی۔ میل جول دا روایتی جوش و خروش وی نہیں رہیا تے ہن عید دے دن لوکی گھراں وچ آرام کر کے گزاردے نیں۔ ایس دی اک وجہ ودھدا ہویا ڈپریشن اے عید دا تصور اوہو اے تے اسلامی تقاضے وی اوہو نیں پر ساڈے ایتھے ایہہ رسمی جیہا ہو کے رہ گیا اے ہن اوہ جذبہ نظر نہیں آندا جہڑا عید دی اصلی روایت اے۔
عیدی ہن وی دتی جاندی اے پر اوہ عید والی معصومیت نظر نہیں آندی۔ عید دے سارے رنگ موجود نیں بس مصروفیت تے خودغرضی نے ایس دن دی حقیقی روح نوں ختم کر دتا اے۔ گزریاں عیداں سانوں ایسے لئی چنگیاں لگدیاں نیں کہ اوس ویلے نہ مہنگائی اینی حد تک زیادہ سی تے نہ ای خواہشات زیادہ سن ہر کوئی اپنی حیثیت دے مطابق خشی مناندا سی پر ایہہ تہوار مسلماناں وچ جوش و خروش نال منایا جاندا سی۔ پر ہن تے کوئی سکت نہیں رکھدا کہ عید دیاں خشیاں حاصل کرن‘ مہنگائی نے سب کجھ ای ختم کر کے رکھ دتا اے۔ عید دا دن اوہناں لئی خشی دی تھاں پریشانی دا باعث بن گیا اے تے سانوں اپنیاں خوشیاں دے وچ اوہناں دیاں خوشیاں نوں وی فراموش نہیں کرنا چاہیدا۔
عید کیوں جے مشترکہ خوشیاں دا ناں اے ایس لئی ضروری اے کہ ایس موقعے تے اسیں اپنے آل دوالے رہن والیاں تے مستحق لوکاں نوں وی اپنیاں خوشیاں وچ شریک کریئے کیوں جے اہل ثروت لئی اللہ دا حکم وی اے تے ایہو ای مومن دی پہچان۔
عید آندی خشیاں دی بہار لے کے
کھلے پھُلاں تے شوخ نظارے لے کے
کوئی نفرت نہ ہوئے نہ کوئی تعصب رہوے
عید خوشیاں لے کے آندی اے
ایہناں خوشیاں وچ غریباں نوں شامل کر لو
عید کہندی اے تسیں سدا مل کے رہو
پھُلاں وانگوں تے چن تاریاں وانگوں