اک خوش فہم دی تقریر!
حناپرویزبٹ
میرے نوجوانو! تسیں پیدا وی نہیں ہوئے سی جدوں مینوں عالمی شہرت مل چکی سی‘ بولی وڈ ہووے‘ لولی وڈ ہووے یاں ہولی وڈ‘ میری وجاہت دے ڈنکے چارے پاسے وجدے سن‘ ہائے ہینڈسم‘ ہائے ہینڈسم دی گونج سن دے سن دے کدوں پلے بوائے بن گیا پتہ ای نہ چلیا‘ میرے نوجوانو تسیں ای دسو کھڈاری لڑکے نوں انگلش وچ پلے بوائے ای کہندے نیں ناں‘ پر مخالف ایہدا منفی مطلب ای کڈھدے رہے‘ نوجوانو تسیں ای دسو عمر کجھ وی ہووے‘ رنگ برنگیاں تتلیاں کنہوں خوش نہیں آندیاں‘ میرے نوجوانو سماجی ملاقات ہووے یاں انٹرویو‘ کسے نہ کسے دے دلائل دے اگے سر نیواں کرنا ای پیندا اے ناں۔ میں جے انج کر لیا تے کیہ ہویا‘ میرے نوجوانو مخالفین میرے تے نشے دے استعمال دا جھوٹھا الزام لاندے نیں میں دسدا جاواں کہ جو استعمال کرنا واں اوہ تے صرف دوائیاں نیں جو ڈاکٹراں نے تجویز کر رکھیاں نیں۔ مغرب وچ ڈاکٹر کوئی وی دوا لکھ دیوے تے اوہ مریض نوں ہر صورت دینی پیندی اے جہدے تے قنون نوں کوئی اعتراض نہیں ہوندا تے جہنوں راز رکھنا مریض دی مرضی تے منحصر ہوندا اے۔
میرے پاکستانیو! ایہ سوال اٹھایا جاندا اے کہ میں شادیاں تے بچیاں دی تفصیل کیوں چھپانا واں‘ ایہدے تے عرض اے دساں یاں نہ دساں‘ مناں یاں نہ مناں ایہ تے بڑا ذاتی معاملہ اے ایس بارے بنیا ہویا قنون ای غلط اے کیوں جے میں ایس قنون نوں مندا ای نہیں‘ ایس لئی ایہدا نفاذ میرے تے ہو ای نہیں سکدا ایس لئی اوہناں دے بارے سوال کرنا ای فضول اے لوک معاشی بدحالی دا ذمہ دار مینوں قرار دیندے نیں دیکھو پاکستانیو ایہ صرف الزام اے میں اک دے بعد اک جتنے وی وزرائے خزانہ تے چیئرمین ایف بی آر لیایا‘ اوہناں نے بڑی کوشش کیتی کہ معاشی معاملات سنبھل جان پر اوہناں دی رائے وچ ایہ کیس بڑا ای پیچیدہ اے تسیں لوک پہلے تو ںای جان دے او کہ کینسر دی بیماری بارے میرا کناں تجربہ اے ایس وجہ نال ناقدین مینوں کینسر پکار کے تنقید وی کردے نیں پر لوکاں دا کیہ اے اوہ تے کجھ وی کہندے رہندے نیں تے میں ایس بارے سوچدا ای نہیں‘ ناقدین ہوشربا مہنگائی دا ذمہ دار مینوں قرار دیندے نیں ایہدا جواب ایہہ وے کہ آکسفورڈ وچ پڑھائی دوران میں جنی اکنامکس پڑھی اوہ ساری دی ساری استعمال کر دتی فیر وی معاشی حالت نہیں سنبھلی تے ایہدے وچ میرا کیہ قصور‘ اوتھے میں سکھیا سی کہ وڈی خرابی ٹھیک کرنی ہووے تے چھوٹیاں چھوٹیاں تکلیفاں برداشت کرنیاں ای پیندیاں نیں۔
میرے پاکستانیو! عوام مہنگائی تے فضول تنقید کردے رہندے نیں تسیں ایہدے تے کوئی دھیان نہیں دینا‘ دال روٹی‘ ددھ دہی‘ سبزیاں گوشت تے دوجیاں شیواں دیاں قیمتاں تے میرا مسئلہ ای نہیں سن‘ میں تے صرف مصنوعی معاشی نظام نوں ٹھیک کرن آیا سی جو پچھلی حکومتاں نے بیساکھیاں تے کھڑا کر رکھیا سی میں اوہ ساریاں بیساکھیاں توڑ دتیاں نیں جہناں تے عالمی ادارے بڑے خوش نیں۔ ہن ساڈی معیشت عالمی نظام نال جڑ چکی اے دیکھو پاکستانیو میں ڈالر نوں آزاد کر کے آئی ایم ایف دی تنقید نوں سرے توں ای ختم کر دتا اے جہدی وجہ نال ساڈے نال معاہدہ کرن لئی آئی ایم ایف دا اعتراض ختم ہو گیا اے ہن لوکاں دی آمدنی اپنے آپ ای ودھے گی آمدنی ودھے گی تے ٹیکس ودھے گا ٹیکس ودھے گا تے حکومت دی آمدنی ودھے گی‘ حکومتی آمدنی ودھے گی تے آئی ایم ایف تے دوجے عالمی اداریاں توں قرض لین دی نوبت ای نہیں آوے گی قرض نہیں لواں گے تے خشحال ہو جاواں گے۔ دیکھیا میرا پلان کناں سادہ تے سوکھا اے۔ وڈے وڈے ماہرین نالائق نکلے جو ایس سادہ جہے فارمولے تے عمل ای نہیں کر سکے۔
میرے پاکستانیو! جدوں توں میری حکومت گئی اے میں اپنے نویں پلان دے بارے خوب سوچیا اے تے میں اپنا نواں پلان تینوں دس دتا اے یقین کرو ایس تو ںچنگا پلان کوئی ہور ای نہیں سکدا جدوں میں دوبارہ آواں گا تے نویں معاشی پر مخلص ٹیم لیاواں گا‘ آپ سر تے کھڑے ہو کے ہدف پورے کراواں گا۔ اچانک پچھے توں آواز آندی اے خوش فہمیاں وچ مبتلا بندے ہن جاگ جا دن دے باراں وج چکے نیں نہ تیرے جھوٹھے خواب پورے ہونے نیں نہ تقریر‘ سُتیاں پیاں وی تقریراں جھاڑدا رہنا ایں۔٭
