غزل
قیصرمحمودگورایہ
جھوٹھی انکھ اناں دے ٹِلیوں تھلے لہہ کے ویکھاں گا
منے نہ اوہ منے میں اج پیریں پے کے ویکھاں گا
نفرت دے اوہ اڈے چڑھ کے کِتھوں تیکر جاوے گا
اوہدے کل الزام میں اپنے سِر تے لے کے ویکھاں گا
اِٹ دا جدوں جواب میں اوہنوں نال بھلائیاں دِتا تے
دشمن دا میں فیر تماشا سِر تے بہہ کے ویکھاں گا
دل دا جانی، جانی دشمن ہوندا اے تے ہون دیو
ایہہ وی صدمہ میں اج اپنے دل تے سہہ کے ویکھاں گا
کھاوے نہ اوہ کھاوے بھاویں کِنساں والی بھُکھ اگے
چھابہ دھر میں روٹی والا ترلا لے کے ویکھاں گا
خورے کِڑ کِڑ کردا کوئی تِڑکیا مصرعہ گھڑای لاں
سوچ مشینے کنکاں وانگوں قیصرؔ گہہ کے ویکھاں گا
