دیہاڑی دار
بابا نجمی
اک دیہاڑے انکھاں والا اک مزدور
سڑک کنارے
وانگ کبوتر اکھاں میٹی
تیلے دے نال ماں دھرتی دا سینہ پھولے
خورے کنک دا دانہ لبھے
رمبا کہی تے چھینی ہتھوڑا
گینتی اپنے اگے دھر کے
چوری اکھیں ویکھ کے اپنے آل د والے
کر کے مونہہ اسماناں ولے
ہولی ہولی بھیڑے بھیڑے اکھر بولے
اچی اچی
اُچیا ربا، سچیا ربا، چنگیا ربا
توہیوں ڈبیاں تارن والا
ساری دنیا پالن والا
جتھوں کل ادھار اے کھاہدا
اوتھے وی اے اج دا وعدہ
میری اج دیہاڑی ٹُٹی
میرے دل چوں تیری چھٹی
اُچیا ربا، سچیا ربا، چنگیا ربا
پنجاں کلیاں مگروں جہڑا
میرے ویڑھے کھڑیا پھل
باجھ دوائیوں
پونی ورگا ہوندا جاوے
میرے مستقبل دا دیوا
ویکھیں کدھرے بجھ نہ جاوے
اُچیا ربا، سچیا ربا، چنگیا ربا
اج نہیں جانا خالی ہتھ
ویچاں بھاویں اپنی رت
