سیال دی سوغات خشک میوے

حکیم حارث نسیم سوھدروی

سردیاں دے دناں وچ سردی دے میوہ جات دا وی اہتمام کیتا اے ایہناں وچ اخروٹ ، بادام، پستہ ، کاجو، کشمش، مونگ پھلی وی شامل نیں۔ایہناں خشک میوہ جات وچ غذائی افادیت دے نال نال چکنائی وی کافی مقدار وچ ہوندی اے ایس چکنائی دی اک اہم گل ایہہ اے کہ ایہہ چربی پیدا نہیں کردی بلکہ جسم نوں ٹھوس رکھدی اے۔ ایہناں خشک میوہ جات وچ البتہ (فائبر ) کافی مقدار وچ پایا جاندا اے جیہڑا آنتاں نوں تحریک دیندا اے۔ایس طرح قبض توںمھفوظ رکھدا اے۔ ایہہ خشک میوہ جات نظام تولید دی صلاحیت ودھان تے حیاتین (ای) دی کمی نوں دور کردے نیں۔ کجھ لوک خیال کردے نیں کہ خشک میوہ جات وچ چکنائی تے حرارے زیادہ ہوندے نیں جس نال صحت نوں نقصان ہوندا اے پر ایہہ گل پیش نظر رہنی چاہیدی اے کہ ہر شے دا استعمال حد اعتدال وچ استعمال نقصان نہیں دیندا زیادتی نقصان دیندی اے جے اسیں خشک میوہ جات دا استعمال ترک کر دیاں گے تے اسیں لحمیات معدنیات تے مانع تکید حیاتین توں محروم رہ جاواں گے۔ ایس موسم وچ صلاحیت عمل ودھ جاندی اے۔ ایس لئی جسمانی طور اُتے غذا دی لوڑ وی ودھ جاندی اے ایس لئی ایس موسم وچ جسمانی صحت نوں قائم رکھن لئی اپنی حیثیت دے مطابق خشک میوہ جات دا بھرپور استعمال کرنا چاہیدا اے۔
کاجو:ایس وچ گائے دے قیمے برابر فولاد ہوندا اے۔ جست وی پایا جاندا اے ایس طرح کاجو دا استعمال خون دی کمی نوں پورا کردا اے تے جسم دی معمول دی افزائش لئی مفید اے۔ مدافعتی نظام نوں مضبوط بناندا اے تاں بلڈپریشر دے مریض نمکین کاجو توں پر ہیز کرن۔ کاجو وچ تانبا تے مینگنز وی کافی مقدار وچ ہوندا اے جیہڑا عضلات لئی مفید اے سو گرام کاجو وچ 600 حرارے تے 60 گرام چکنائی ہوندی اے۔
اخروٹ: غذائیت نال بھرپور اے۔ ایس وچ وٹامن ای گڈمنیٹس تے انٹی اوکسڈینٹ وافر مقدار وچ ہوندے نیں۔ جے چار اخروٹ اپنی غذا دا حصہ بنا لیے تے ایس دے حیران کن فائدے ہون گے۔ اخروٹ کولیسٹرول نوں کنٹرول رکھدا اے دماغ تے اعصاب نوں طاقت دیندا اے کھانسی تے گلے دے امراض توں محفوظ رکھدا اے۔ ذیابیطس (شوگر) دا خطرہ ٹال دیندا اے۔ کینسر توں بچاندا اے تے وال جلدی تے ناخن لئی بوہت مفید اے طبیعت نوں تازہ رکھدا اے۔
بادام: بادام نوں خشک میوہ جات دا بادشاہ کہیا جاندا اے۔ ایس نوں موسم سرما وچ بڑی رغبت نال استعمال کیتا جاندا اے۔ دماغ تے نظر لئی بوہت مفید اے۔ یاداشت ودھاندا اے۔ بادام ہر عمر دے لوکاں لئی فائدہ مند اے۔ اعصاب نوں طاقت تے جسمانی نشوونما وچ مفید اے۔ چربی نہیں ودھاندا جرنل آف امریکن ہارٹ ایسوسی ایشن دے مطابق روزانہ 42 گرام بادام دا استعمال دل دے امراض توں محفوظ رکھدا اے بلکہ چربی وی گھٹ کردا اے۔ تحقیق دے مطابق باداماں نوں روزانہ اسنکیس دے طور اُتے کھانا میٹابولزم نوں ٹھیک رکھن دے نال کارڈیووسکولر نوں فائدہ دیندا اے۔
پستہ: سردیاں وچ پستہ نمک لگے کھانے دا بوہت مزا اے۔ ایس دی غذائی ودوائی افادیت بوہت زیادہ اے۔ دل دماغ جگر تے معدہ لئی فائدہ مند اے۔ قوت مدافعت ودھاندا اے جگر دے سدوں نوں کھولدا اے۔ 100 گرام پستہ وچ 594 حرارے ہوندے نیں پستہ دا استعمال کولیسٹرول دی سطح گھٹ کردا تے شرائین قلب وچ تھکے ختم کردا اے موسم سرما وچ ایس دا استعمال ضرور کرو پر حد اعتدال وچ تاں بلڈپریشر دے مریض نمک لا کے پستہ نہ کھان۔
تل:تل کھان نال سردی اثر نہیں کردی۔ موسم سرما وچ تل تے گڑ دے لڈو ریوڑیاں گزک دا استعمال ہوندا اے جنہاں اُتے تل چڑھائے جاندے نیں تلاں وچ پروٹین تے روغنیات دے علاوہ دیگر اہم معدنی نمکیات وی ہوندے نیں جیہڑے 48 فیصد دے نیڑے نیں ایہناں وچ کیلشیم میگنیشیم فولاد ایلومینیم تانبا نکل تے سوڈیم شامل نیں۔ تل وچ کیلشیم سب توں زیادہ پایا جاندا اے تے اک فاسفورس امیز چکنائی پائی جاندی اے جیہڑی جسمانی بافتاں تے اعصاب دی طاقت لئی اہم اے۔ تل وچ دھاتاں دا تناسب وی باکمال اے وٹا من ای دا خزانہ اے۔ تل جسمانی شکست وریخیت نوں روکدے نیں۔ ایہہ قدرتی نعمت اج دے مسائل دے شکار انسان دے اعصاب و تنائو لئی نعمت اے۔ تل ہر عمر لئی مفید اے۔
چلغوزے: چلغوزے گردے جگر تے مثانے لئی مفید نیں۔ موسم سرما وچ پیشاب دی زیادتی نوں روکدے نیں۔ سردی دے اثرات نوں گھٹ کردے ہوئے تے جسم نوں قوت و توانائی فراہم کردے نیں۔ چلغوزئے کھا ن توں پہلے استعمال نہ کیتے جان کیوں جے ایہہ بھکھ ختم کر دیندے نیں ہمیشہ کھان توں بعد استعمال کرو۔
مونگ پھلی : ایہہ اک مزیدار میوہ اے ایہہ سستا میوہ اے جیہڑا ہر بندے دی دسترس وچ وی اے۔ موسم سرما وچ رضائی وچ بہہ کے کھان دا بوہت مزا آندا اے۔ ایہہ جنہی مرضی کھا لوئو ایس دی چکنائی نال کولیسٹرول نہیں ودھے گا البتہ خالی پیٹ نہ کھائو کیوں جے ایس طرح بھکھ ختم ہو جاندی اے۔ ہمیشہ کھان توں بعد کھائو۔