دِل والی دِلّی وِچ

سفرنامہ ؛۔ راشدہ ماہینؔ ملک

{ پہلی قسط }

التھنہار؛۔ وقار احمد وقارؔ

٭٭٭
عربی زبان وچوں نکلے لفظ سفر نال فارسی زبان دے لفظ نامہ نوں جوڑن پاروں لشکری زبان اردو دے متعارف کروائے لفظ سفرنامہ دا مطلب ایہ بن کھلوندا اے کہ اوہ ڈائری یا بیاض جہڑی سفر وچ پیش آن والے واقعات ،حالات تے مشاہدات بارے ہووے۔
انسان نوں زندگی وچ جتھے انج دی تھاں دی لوڑ ہوندی اے جتھے اوہ مستقل طور رہ سکے جہڑی اوس لئی وجہء سکون ہووے اوتھے ای قدرت کجھ انج دیاں ضرورتاں وی رکھیاں نیں جنہاں پاروں اوہنوں اپنی مستقل رہائش تے قیام گاہ نوں چھڈ کے نت نواں سفر کرنا پیندا اے۔
ساڈے دین وچ وی سفری احکامات تے ہجرتاں دا خصوصی ذکر ملدا اے تے فقہ دیاں کتاباں وچ مسافر بارے تذکرہ موجود اے۔قرآن مجید راہئیں سوہنے رب ٭ ۔سیروافی الارض دا حکم دے کے سفر دی اہمیت واضح کیتی اے۔
اردو وچ ہن تک کافی سفرنامے لکھے گئے نیں۔کجھ سفرنامے پڑھ کے انج لگدا اے کہ سفر کیتا ای سفرنامہ لکھن لئی اے۔ایہ واردات سفرنامہ پڑھن والیاں وچ کافی مقبول وی رہئی اے۔وکھری گل کہ ایس مقبولیّت وچ رنگ آمیزی تے مبالغہ آرائی دا وی ڈھیر عمل دخل اے۔کئی سفرنامہ نگار تے غیر ملکی سفر دوران پیش آن والے رومانوی واقعات بیان کرن لگیاں مبالغہ آرائی دیاں ساریاں حدّاں پار کردے محسوس ہوندے نیں۔
راشدہ ماہین ؔ ملک ہوراں دے سفر نامے وچ ایہ جعل سازی نظر نہیں آندی۔ ماہین ؔ جی بڑی ایمانداری نال صرف اوہ کجھ ای بیان کیتا اے جو اوہناں ویکھیا ورتیا اے یا اوہناں نال پیش آیا اے۔
اج توں وِیہہ پنجی سال پہلاں اردو سفرنامہ نگاری اک وبا دی شکل اختیار لرلئی سی۔جس نوں ویکھو سفرنامہ لکھن بیٹھاتے اپنے لکھے دی تشہیر کروان لئی متحرک نظر آندا سی۔ایہناں دناں وچ بڑے غیرمعیاری تے خیالی سفرنامے وی لکھے گئے۔پیرس دے نام توں لکھے گئے اک سفرنامے بارے شبہ اے کہ ایس وچ بیان کیتے گئے چوکھے واقعات فرضی تے جعلی نیں۔اصل دے نال نقل ہر دور وچ ڈرامہ بازی کردا رہئیا اے۔شاعری نال تے اجکل زیادہ تر ایہوکجھ ہوندا نظر آندا اے۔کاروبار کرن لئی کلام لکھے وی جاندے نیں تے ویچے وی جاندے نیں ۔اج ادب دی بے ادبی کردیاں بڑا کامیاب بزنس ہورہئیا اے۔


ڈاکٹرانورسدید ہوراں اپنی کتاب { اردو ادب میں سفر نامہ } وچ اردو دے چارسو سفرنامیاں دا ذکر کیتا اے جہڑے بڑے سوہنے تے من کچھویں انداز وچ لکھے گئے نیں ۔ایہ کتاب جے اج لکھی جاندی تے میرا خیال اے کہ انورسدید ماہین ؔ جی دے لکھے سفرنامے {دل ولی دلّی میں} دا تذکرہ ضرور شامل کردے خواہ ادبی ضرورت پاروں یا اپنے دل دی کسے مجبوری پاروں،ایس لئی کہ ماہین جی نوں ویکھن ،ملن تے سُنن بعد جہڑے سفر دا آغاز ہوندا اے اوہ کسے وکھ انمول سفرنامے دے لکھن دا تقاضا کردا اے۔
سفرنامے دے حوالے نال اک ضروری تے اہم گل ایہ وی اے کہ سفرنامہ کسے وی ملک ،شہر دی تاریخ ،جغرافیے تے سماجی حالات دا نرا بیان ای نہیں ہوندا بلکہ جدوں تک سفرنامہ نگار اپنے قاری نوں اپنے احساسات،مشاہدات تے تاثرات وچ نال رلا کے سفر نہیں کردا تے قاری نوں اپنے اندرلی دنیا وچ جھاتی مارن دا موقع نہیں دیندا اودوں تک سفرنامہ بس خارجی دنیا دا بیان تے واقعات دی کھتونی ای محسوس ہوندا اے۔دُوجے لفظاں وچ انج آکھو کہ کامیاب سفرنامہ داخلیت تے خارجیت دا متوازن تے خُوبصورت ترین بیان ہوندا اے۔جس وچ لکھن والے دا اسلوب تے مزاج انفرادی تے ذاتی حد توں اگے سفر کرکے قاری نوں اپنے نال رلا کے سفر کرن دی منزل تک اپڑ جاندا اے تے ایس حوالے پاروں راشدہ ماہین ؔ ملک ہوراں دا اسلوب تے مزاج پہلے دن توں ایہو ای رہئیا اے جس دی گواہی اوہناں دیاں فیس بک دیاں پوسٹاں اج وی دیندیاں نظری آندیاں نیں کہ اوہ اپنی ذات توں باہر نکل کے اپنے نال اپنے چاہن والیاں نوں لے کے تے قدم قدم نال رلا کے سفر کردیاں نظر آندیاں نیں تے جے میری گل تے شک ہووے تے اوہناں دیاں فیس بک پوسٹاں کھول ویکھو جے تھاں تھاں تھانوں ایہ لکھیا تے پوسٹ کیتا نہ ملے کہ
آپ دی بلکہ آپ سبھ دی ماہین ؔ ہُن اِنج تے فیر ہُن اُنج وغیرہ وغیرہ تے میرا نام جو رکھنا چاہو رکھ دینا۔وکھری گل ایہ سبھ پڑھ کے قاری من چاہئے سحر وچ مبتلا ہوکے خودساختہ راہواں دا مسافر بن کھلوندا اے تے اخیر چوکھاڈاھڈا تنگ وی ہوندااے۔جس دی بِلے داری کسے طور وی ماہین ؔ جی اُتے نہیں پائی جاسکدی۔
ہُن تک دے لکھے سفر نامیاں وچوں
٭۔خواجہ احمد عبّاس دا مسافر کی ڈائری
٭۔جمیل الدین عالی دا دنیا میرے آگے
٭۔محمود نظامی دا نظر نامہ
٭۔بیگم اختر ریاض دا دھنک پر قدم
٭۔ابنِ انشاء دا دنیا گول ہے
٭۔مستنصر حسین تارڑ دا نکلے تری تلاش میں
٭۔عطائالحق قاسمی دا شوقِ آوارگی
٭۔کرنل محمد خان دا بسلامت روی
٭۔مختار مسعود دا سفر نصیب
٭۔اشفاق احمد دا سفر در سفر
چوکھے مشہور رہئے نیں ۔
موجودہ نسل دے پڑھن لئی جتھے عصرِ حاضر دیاں دوجیاں لکھتاں موجود نیں اوتھے اوہناںدے پڑھن لئی ماہین ؔ جی دے ادبی شاہکار وی موجود نیں جنہاں نوں پڑھن بعد قاری دا ماہین ؔ جی ہوراں نوں ملن دا اشتیاق ودھ جاندا اے۔ماہین ؔ جی جہڑیاں فیڈرل اردو یونیورسٹی اسلام آباد (پاکستان) وچ پروفیسر نیں اپنے سفر نامے وچ تعارفی طور لکھدیاں نیں کہ
ادبی سفر وچ ایہ سفر بڑا خُوبصورت رہئیا۔میری پرانی خواہش پوری ہوگئی۔ہندوستان دی تاریخی تے عظیم سرزمین دی سیر نصیب ہوئیی۔مزیدفرماندیاں نیں کہ لکھت دا انداز لکھاری دے ذہن تے باطنی حُسن دا عکاس ہوندا اے۔میں ایہ تے بالکل نہیں کہندی کہ میں سفر نامہ کمال دا لکھیا اے پَر کوشش ضرور کیتی اے کہ تھانوں پسند آ جاوے۔اردو ادب وچ غالب ؔ دے خطاں نوں اردو نثری ادب دا اہم تے خاص حصہ سمجھیا جاندا اے۔
غالبؔ دے علاوہ وی کئی شاعراں تے شاعرات نثر لکھی جس نوں پسند وی کیتا گیا۔


میرا ایہ پہلا تجربہ اے،شاید کہ تیرے دل میں اُتر جائے میری بات۔۔۔!!!
ایہ گل ساڈی سانجھی اے۔میری گل ،تھاڈی گل۔پاکستانیاں دی گل تے ہندوستانیاں دی گل تے سبھ نالوں چوکھے تے وڈّے مان والی ایہ گل کہ ایہ گل انساناں دی گل اے جہڑے بارڈروں آر پار وسدے نیں۔ایہ سفر جتھے میری ذات دی آبیاری کردا اے اوتھے میرے کجھ تجربات وی میرے پڑھن والیاں دے ساہمنے رکھدا اے جنہاں دے چانن پاروں اوہ گھپ ہنیریاں راہواں دا کامیاب سفر کردیاں اپنی اپنی منزل تے اپڑن دا آہر کر سکدے نیں۔میں تے اجے اوہ جہان ویکھن دی وی خواہشمند آں جہڑے آباد نہیں تے اوہناں جہاناں نوں وی دوبارہ خوبصورت ویکھن دی آرزومند آں جہڑے اسیں اپنے ہتھیں برباد کربیٹھے آں۔دُعا کرو کہ میرا ایہ سفر جاری رہوے۔
٭۔ مجھ سے ہوتا ہی نہیں ترک رہ شوقِ سفر
سو میں کرتی ہی نہیں دِل کو جنوں سے خالی

(راشدہ ماہین ؔ ملک )
23 ۔ جون 2016
٭٭٭
. ۔۔۔۔۔۔۔ جاری اے
٭٭٭

اپنا تبصرہ گھلو