افواجِ پاکستان دی خدمات تے قائد اعظم دی ہدایات

پوری قوم نوں اپنی فوج اُتے تے فوج نوں اپنی قوم اُتے مکمل اعتماد دی لوڑ اے

لكهت:مولانا محمد الیاس گھمن

اللہ تعالیٰ پاکستان تے اہلیان پاکستان دی ہر طرح نال تے ہر پاسے توں حفاظت فرمائے۔ گوانڈھی ملک ولوں ہون والی مسلح جارحیت تے عالمی قوانین دی کھلم کھلا خلاف ورزی انتہائی قابل مذمت اے۔ اج پوری قوم دیاں نظراں اپنے مخالفین اُتے لگیاں ہوئیاں نیں ۔ پوری قوم نوں اپنی فوج اُتے تے فوج نوں اپنی قوم اُتے مکمل اعتماد دی لوڑ اے۔ ایسے اعتماد دے بل بوتے سانوں متحد ہو کے اپنے مقاصد دے حصول لئی اگے ودھنا ہوئے گا تے اپنے پیارے وطن دے دفاع لئی عملی اقدامات چکنے ہون گے۔ پاکستان اک اسلامی نظریاتی ملک اے، ایس دی سرحداں وی اک اسلامی سلطنت دی سرحداں نیں تے ایہناں سرحداں دے رکھوالے حقیقت وچ اسلامی جغرافیائی سرحدات دے محافظ نیں۔ ایہو اوہ امتیاز اے جیہڑا افواج پاکستان نوں دیگر ملکاں دی فوج اُتے حاصل اے کہ ایہہ ملک دے محافظ ہون دے نال نال اسلام دے وی سپاہی نیں۔
قوم دے محافظ تے وفادار:
افواج پاکستان حالت امن تے حالت جنگ دونواں وچ اہلیان پاکستان دا محافظ تے وفادار طبقہ اے۔ ایہو اوہ طبقہ اے جیہڑا ملک دی تعمیر و ترقی، ایس دی حفاظت، قانون دی پاسداری، قدرتی مصائب وچ رضا کارانہ خدمات، امن عامہ دی بحالی، تعمیراتی پروگرام وچ شمولیت، طبی سہولتاں دی فراہمی، تعلیمی میدان وچ عملی خدمات تے مشترکہ اسلامی ملکاں دی عسکری قیادت تیکر سارے امور وچ اپنے پیشہ وارانہ فرائض نوں نہایت خوش اسلوبی نال انجام دیندا اے۔
آئین پاکستان دی دفعہ 244:
افواج پاکستان دا ہر فوجی جوان آئین پاکستان دی دفعہ 244 دے تحت ایہہ حلف چکدا اے کہ ’’میں خلوص نیت نال پاکستان دا حامی و وفادار ہوواں گا تے اسلامی جمہوریہ پاکستان دے آئین دی حمایت کراں گا، میں قانون دے تقاضیاں دے مطابق تے ایہناں دے تحت پاکستان دی بری فوج (یا بحریہ یا فضائیہ) وچ پاکستان دی خدمت ایمانداری تے وفاداری دے نال سرانجام دیواں گا۔‘‘
افواجِ پاکستان دا رضاکارانہ کردار:
پاکستان دا ہر بندا بلکہ گلوبلائزیشن دے ایس دور وچ ذرائع ابلاغ دے توسط نال پوری دنیا دے لوک ایس حقیقت توں واقف نیں کہ جدوں کدی وطن عزیز پاکستان وچ قدرتی مصیبتاں آئیاں، سیلاب، سمندری طوفان، یا زلزلے وغیرہ تے انج دے مشکل حالات وچ پاک فوج دے جوان جذبہ احترام انسانیت دے پیش نظر اپنے پاکستانی بھراواں دی مدد لئی جان ہتھیلی اُتے لئے میدان وچ آئے تے لٹے پٹے لوکاں دی آبادکاری لئی سارے وسائل نوں بروئے کار لیائے۔
افواجِ پاکستان دا تعمیر وطن وچ حصہ:
آپ بلوچستان، گلگت، آزاد کشمیر، چترال تے ملک دے دیگر علاقیاں وچ جا کے اپنی اکھاں نال ویکھ لوئو کہ عوام دی مشکلاں نوں ختم کرن لئی پاک فوج دے جواناں نے شاہرات، مواصلاتی نظام تے ڈیمز تعمیر کیتے نیں۔ شاہراہ قراقرم تے شاہراہ ریشم ، بلوچستان وچ ولی تنگی ڈیم، کیہان ڈیم وغیرہ افواج پاکستان دی مرہون منت نیں۔
افواجِ پاکستان دی تعلیمی سرگرمیاں:
ایس دے نال نال فوجی فائونڈیشن دے زیر اہتمام ملک وچ تعلیمی اداریاں دے جال وچھائے نیں جنہاں وچ نیشنل ڈیفنس کالج، پاکستان ملٹری اکیڈمی، ملٹری کالج آف انجینئرنگ ، کالج آف آرمی ایجوکیشن ، ای ایم ای کالج ، ملٹری کالج آف سگنلز ، آرمڈ فورسز میڈیکل کالج تے متعدد کیڈٹ کالجز شامل نیں۔
افواجِ پاکستان دی رفاہی خدمات:
عوام دے علاج معالجے لئی جدید طبی سہولتاں نال آراستہ وڈے وڈے ہسپتال قائم کیتے نیں۔ ایسے طرح آرمی ویلفیئر ٹرسٹ دے زیر انتظام ہائوسنگ سکیماں، جوتیاں تے اُون دے کارخانے تے عسکری بنک وغیرہ جہے ترقیاتی منصوبیاں نوں فروغ دتا جا رہیا اے۔ ایس دے نال نال نیشنل لاجسٹک سیل جہیا فوجی ادارہ وچ ذرائع نقل و حمل وچ بوہت اہم کردار ادا کر رہیا اے۔
افواجِ پاکستان تے اسلامی ممالک:
برادر اسلامی ملکاں نال عمدہ تعلقات استوار کرن تے مشترکہ فوجی تربیتی مشقاں کرن دی غرض نال افواج پاکستان نوں بیرون ملک گھلیا گیا جنہاں وچ سعودی عرب، کویت، لیبیا تے عرب امارات شامل نیں۔ ایسے طرح اقوام متحدہ دے تحت قیام امن دے مقاصد لئی افواج پاکستان نوں کمبوڈیا، صومالیہ، بوسنیا تے سلوانیا جہے ملکاں وچ گھلیا گیا ایس مشن وچ پاک فوج دے انسانی ہمدردی دے جذبے دی بدولت اقوام عالم وچ پاکستانی قوم دی عزت وچ وادھا ہویا۔
افواجِ پاکستان دا جذبہ حب الوطنی:
ایہناں سب دے باوجود افواج پاکستان جہے پاکستان دی تعمیر و ترقی وچ ودھ چڑھ کے حصہ لیندی اے ایس توں کدھرے ودھ کے اپنے وطن دی حفاظت دا فریضہ انجام دیندی اے جدوں کدی دشمنانان پاکستان نے ناپاک نظراں تے بُرے ارادیاں نال پاکستان نوں ویکھیا یا ایس ول پیش قدمی کیتی اے یا ایہنوں کمزور تے غیر مستحکم کرن لئی ایس دی جغرافیائی سرحداں اُتے حملہ آور ہوئے تے افواج پاکستان ایہناں دے ساہمنے سیسہ پلائی دیوار بن کے کھڑے ہو گئے تے سر دھڑ دی بازی لا کے ملک دے چپے چپے دی حفاظت کیتی اے۔
افواج پاکستان نوں قائد اعظم دی ہدایات:
افواج پاکستان دے سپہ سالار تے سپاہیاں نوں ایس موقعے اُتے قائداعظم دی اوہ ہدایات وی پیش نظر رکھنیاں ہون گیاں جیہڑی اوہناں نے مختلف مقامات اُتے پاک فوج نوں مخاطب کر کے ارشاد فرمائیاں سن۔
21 فروری 1948 نوں ملیر وچ خطاب کردے ہوئے فرمایا: ’’ اسیں پاکستان دی آزادی دی جنگ جت لئی اے پر آزادی دی حفاظت تے ملک نوں زیادہ ٹھوس تے مستحکم بنیاداں اُتے تعمیر کرن دی دشوار تر جنگ ہجے جاری اے تے جے سانوں اک عظیم قوم بن کے زندہ رہنا اے تے ایہہ جنگ ایس ویلے تیکر لڑنی پئے گی کہ اسیں فتح نال ہمکنار نہ ہو جائیے۔ قدرت دا اٹل قانون اے کہ اوہ ای زندہ رہوے گا جیہڑا زندہ رہن دا سب توں زیادہ اہل اے۔ ہن تہانوں اپنی سرزمین دا محافظ بننا اے تاں جے ایتھے اسلامی جمہوریت، اسلامی سماجی انصاف تے انسانی مساوات قائم ہوئے تے نشوونما پا سکے۔ تہانوں چوکس رہنا اے بوہت ای چوکس ۔‘‘
اکتوبر 1947ء نوں لہور وچ خطاب کردے ہوئے فرمایا: ’’ تہاڈا خمیر فولادی قوتاں توں اٹھیا اے تے ہمت دے معاملے وچ دنیا وچ کسے توں پچھے نہیں فیر تسیں آخر دوجیاں وانگوں کامیاب کیوں نہیں ہو سکدے خاص طور تے اپنے آبائو اجداد وانگوں کامیابی؟ تہانوں اپنی ذات وچ فقط مجاہداں جہی سپرٹ پیدا کرن دی لوڑ اے تسیں انج دی قوم او جس دی تاریخ حیرت انگیز طور اُتے بلند کردار، بلند حوصلہ، شجاع تے اولوالعزم ہستیاں نال بھری پئی اے اپنی روایات دی رسی مضبوطی نال پھڑ لوئو تے اپنی تاریخ وچ شان و شوکت دے اک باب دا وادھا کرو۔‘‘
11 اکتوبر 1947ء نوں کراچی وچ خطاب کردے ہوئے فرمایا:’’ مینوں چنگی طرح احساس اے کہ تہاڈے وچوں اکثر نوں جنگ دے زمانے وچ شدید اعصابی دبائو دی کیفیت نال سابقہ رہیا اے تے ہن تہانوں کجھ سکون اے پر نہ بھُلو کہ ساڈی جنگ ہجے ختم نہیں ہوئی بلکہ ساڈے لئی تے جنگ ہن شروع ہوئی اے جے سانوں ایس وچ فتح یاب ہونا اے تے فوق الانسانی محنت نال کم کرنا ہوئے گا، ایہہ ویلا ذاتی فائدیاں تے ترقیاں دی فکر تے جاہ و منصب دی دوڑ دا نہیں ایہہ ویلا اے تعمیری جدوجہد دا، بے لوث کم دا تے ادائے فرض دی مسلسل لگن دا۔‘‘
23 جنوری 1948ء ایچ۔ ایم۔ پی۔ ایس دلاور دے عملے نال خطاب کردے ہوئے فرمایا: ’’ پاکستان حال ای وچ انجمن اقوام متحدہ کارکن بنیا اے اوہ ایس ادارے نوں طاقت ور بنان تے ایس دے نصب العین دے حصول وچ ہتھ بٹان لئی اوہ سب کجھ کرے گا جو ایس دے وس وچ اے۔ اسیں اقوام متحدہ دے منشور وچ شامل اصولاں دی بھرپور تائید کرنے آں پر اپنے دفاع دے تقاضیاں توں غافل رہنا ساڈے لئی ممکن نہیں۔ تنظیم اقوام متحدہ کنہی ای طاقتور ہو جائے پر اپنے ملک دے دفاع دی اصل ذمہ داری ساڈے اُتے رہوے گی… یاد رکھو! تہاڈے وچوں ہر اک نے ملک دے دفاع نوں مضبوط بنان لئی اہم کردار ادا کرنا اے۔‘‘
13 اپریل 1948ء نوں پاکستان آمرڈ کور سنٹر نوشہرہ دے افسراں تے جواناں نال خطاب کردے ہوئے فرمایا: ’’ جماعت دی حمیت و عزت دا دامن کدی نہ چھڈو۔ یعنی اپنی رجمنٹ اُتے فخر، کور اُتے فخر، اپنے ملک پاکستان اُتے فخر تے ایس لئی سچی لگن۔ پاکستان تہاڈے بَل اُتے قائم اے تے تہاڈے اُتے ملک دے محافظاں دی حیثیت نال پورا اعتماد رکھدا اے۔ ایس اعتماد دے لائق بنو۔ ایہہ فوج تہاڈے آبائو اجداد ای دی دلیری تے تذہی دی بدولت پروان چڑھی تے نیک نام ہوئی اے۔ عزم کرو کہ تسیں ایس دے قابل فخر فرزند بنو گے… مینوں ایس وچ قطعی شعبہ نہیں کہ تہانوں کنج دی ای پُرخطر ذمہ داری دتی جائے تسیں ایس لئی ہمیشہ مستعدد رہو گے۔‘‘
15 اپریل 1948ء نوں 15/2پنجاب مشین گن رجمنٹ پشاور نوں نشان عطا کردے ہوئے فرمایا:’’میں چاہنا واں کہ تسیں ایہناں بلند مقاصد اُتے پورے اترو جنہاں لئی تسیں از سر نو اپنے آپ نوں وقف کیتا اے یعنی پاکستان دی خدمت تے کمزوریاںدی حفاظت و حمایت دے فریضے تے اپنے شہید ساتھیاں دی یاد تازہ رکھن وچ بھرپور حصہ لوئو تے ایس طرح اسلام دی عظمت و شان نوں فروغ دیو۔‘‘
14 جون 1948ء نوں اسٹاف کالج کوئٹہ وچ خطاب کردے ہوئے فرمایا: ’’ تسیں تے پاکستان دی دوجی فوج پاکستانی قوم دی جان و مال تے عزت و آبرو دے محافظ نیں دفاعی افواج، پاکستان دی دوجیاں ساریاں ملازمتاں توں زیادہ اہم اے ایسے نسبت نال تہاڈی ذمہ داری وی بوہت گراں بار اے‘‘۔
گوانڈھی ملک ولوں جنگ دے خطرات منڈلا رہے نیں۔ ایس حوالے نال اپنے فوجی جواناں نال کجھ گلاں عرض کرنا ضروری خیال کرنا واں۔
ایمان دی مضبوطی:
قرآن کریم دی متعدد آیتاں تے بکثرت احادیث مبارکہ وچ ایس گل دا حکم دتا گیا اے اللہ وحدہ لاشریک لہ دی ذات و صفات اُتے ایمان، ایس دی مدد و نصرت اُتے یقین ای اسلام دے سپاہی دا طرہ امتیاز اے۔
آیات و احادیث قتال دی تلاوت :
آیات و احادیث قتال فی سبیل اللہ دی تلاوت تے ایس دے معانی و مفاہیم وچ غور و خوض کرن نال جذبہ سرفروشی پیدا ہوندا اے۔
عبادات دی پابندی:
میرے فوجی بھائیو!تسیں جس میدان دا انتخاب کیتا اے ایہہ تے شہادت گاہ الفت وچ پیر رکھنا اے۔ نہیں پتہ کدوں جان جان آفریں دے حوالے کرن پئے ایس لئی دنیا وی غفلتاں تے دھوکے دا شکار ہون نال اپنی حفاظت کراںتے خدائے بزرگ و برتر دی عبادات وچ اپنے آپ نوں کھپادیو۔ خاص طور تے نماز دی پابندی دی کوشش کرو تے مسنون اعمال دے مطابق زندگی گزارو تے دعائواں دا اہتمام کرو۔
فکر آخرت دا استحضار:
ہر مسلمان جنہاں بنیادی عقائد اپنان نال صحیح معنیاں وچ مسلمان اکھوان دا مستحق ٹھہردا اے ایہناں وچ اک عقیدہ آخرت وی اے۔ یوم جزا و سزا اُتے یقین رکھدے ہوئے ایس دی تیاری کرو، اللہ دے حضور سرخرو ہون لئی گناہواں والی زندگی توں دور رہیا جائے۔
اطاعت امیر تے استقامت :
عام حالات دے مقابلے وچ جنگی حالات وچ اطاعت امیر دی اہمیت کئی گنا ودھ جاندی اے، ایس لئی ایس دا پورا اہتمام کیتا جائے تے ثابت قدمی دے نال اپنے فریضہ نوں انجام دتا جائے۔
باہمی تنازعیاں توں بچو:
جنہاں غلطیاں نال دشمن دے دلاں توں ہیبت، دبدبہ تے رعب ختم ہوندا اے ایہناں وچ اک باہمی تنازعات وچ الجھنا تے آپسی بداعتمادی دا ہونا وی اے۔ ایس لئی باہم شیروشکر ہو کے رہن وچ اللہ دی مدد و نصرت دا وعدہ پورا ہوندا اے۔
منفی پروپیگنڈیاں توں متاثر نہ ہوئو:
پوری پاکستانی قوم تہاڈے شانہ بشانہ کھڑی اے۔ ایہناں حالات وچ ملک دشمن لوک بعض طبقیاں نوں تہاڈے خلاف ابھارن وچ مسلسل مصروف عمل نیں پر ایہہ قوم اپنے محافظاں تے محسناں نوں قطعاً ف راموش کرن والی نہیں۔
قوم نال گزارش:
پوری پاکستانی قوم نال گزارش کرنا واں کہ ایہناں حالات وچ سانوں ساریاں نوں رجوع الی اللہ تے استغفار دی کثرت کرنی چاہیدی اے، اپنی صفاں وچ اتحاد پیدا کرنا چاہیدا اے، علاقائی، گروہی، نسلی، سیاسی تے مذہبی اختلافات توں اپنے آپ نوں بچانا چاہیدا اے، آن والے ممکنہ خطرات دے بارے تدبیراں اختیار کرنیاں چاہیدیاں نیں، اپنی فوج تے عسکری قیادت اُتے بھرپور اعتماد کرنا چاہیدا اے، اپنی ساری صلاحیتاں وطن عزیز دے دفاع وچ خرچ کرنیاں چاہیدیاں نیں۔ سوشل میڈیا دا ٹھیک تے محتاط استعمال کرنا چاہیدا اے، منفی تبصریاں تے حوصلہ شکن تجزیاں توں گریز کرنا چاہیدا اے، دعائواں دا بھرپور اہتمام کرنا چاہیدا اے، اللہ رب العزت پاکستان تے سارے اسلامی ملکاں دی حفاظت فرمائے۔ آمین بجاہ سید الصادقین صلی اللہ علیہ وسلم