پنجابی زبان تے عالمی ماں بولی دیہاڑ
پاکستان دی60 % آبادی پنجابی زبان والی اے، 80 % آبادی پنجابی بول لیندی اے،90 % آبادی پنجابی سمجھ لیندی اے
حاجی عارف
قارئین کرام
دنیا وچ زبان کسے اک تہذیب دے مختلف علاقائی لہجیاں ، بولیاں بولن والیاں دی مشترکہ پہچان ، تاریخ ، ثقافت تے معاشرت دی کھلری ہوئی لوکائی نوں کٹھے کر کے اک قومی مالا وچ پیرون لئی بنیادی حیثیت رکھدی اے ۔ دنیا وچ جنیاں وی ترقی یافتہ قوماں موجود نیں انہاں نیں پہلے اپنی قومی زبان دی بنیاد نوں مضبوط کرن تے زور دتہ اے ۔
دنیا وچ چینی زبان اک کروڑ تیھ لکھ دی آبادی نال سب توں زیادہ بولی جان والی زبان شمار کیتی جاندی اے ۔ جس نوں پوری دنیا دی 16٪فیصد آبادی بولدی اے ۔
46 کروڑ ہسپانوی، 45 کروڑ ہندی,37 کروڑ انگریزی ,22 کروڑ آبادی عربی بولدی اے ۔ پنجابی نوں پوری دنیا وچ 9 استھان حاصل اے تے اردو نوں 19 واں ۔ پنجابی پاکستان تے بھارت دے نال نال بہت سارے ہور ممالک وچ اپنی کثیر تعداد نال موجود اے ۔ ایہہ کینڈا تے آسٹریلیا دی تیجی وڈی زبان منیں جاندی اے ۔ بس ضرورت اس چیز دی اے کہ بطور پنجابی ہون دے دنیا وچ اسیں اپنا مثالی تے مضبوط مقام پہچانیئے ۔
پاکستان دی60 % آبادی پنجابی زبان والی اے، 80 % آبادی پنجابی بول لیندی اے،90 % آبادی پنجابی سمجھ لیندی اے۔دنیا وچ بہت گھٹ زباناں نوں مذہبی تائید حاصل ہوندی اے ۔ ہندو دھارمک ویداں وچ پنجابی علاقیاں نوں خصوصی اہمیت حاصل اے ۔ ایہہ برصغیر وچ اسلام پھیلان دا پہلا ذریعہ رہی اے ۔ ایتھوں دے لہندے پنجاب وچ ہی سکھ مذہب دا وجود ہویا تے مسیحی مذہب دے حوالے نال پاکستان دے 97 ٪ فیصد مسیحیاں دی زبان پنجابی اے ۔
آکسفورڈ یونیورسٹی دی تحقیق دے مطابق زباناں دا تحفظ نا کرن دے کارن دنیا وچوں 516 زباناں مر چکیاں نیں ۔ اک اندازے دے مطابق پاکستان وچ 74 علاقائی بولیاں موجود نیں ۔21 فروری نوں عالمی ماں بولی دیہاڑ اسے سلسلے وچ منایا جاندا اے ۔ جس دی ابتداء انج ہوئی کہ 25 فروری 1948 نوں پاکستان دی دستور ساز اسمبلی نے اردو نوں پاکستان دی قومی زبان قرار دتہ تے 21 مارچ نوں ڈھاکہ وچ جلسے دے دوران ایہہ اعلان کیتا کہ پاکستان دی قومی زبان اردو ہووئے گی ۔ جس تے کہ قراداد پاکستان پیش کرن والے شیر بنگال مولوی فضل الحق نے ریفرینڈم دا مطالبہ کیتا ۔ 24 مارچ 1948 وچ ڈھاکہ یونیورسٹی دے کانووکیشن وچ دوبارہ اردو بارے مؤقف نوں دہرایا گیا اس تے طلباء نے شدید احتجاج کیتا تے 21 فروری 1952 نوں ہڑتال دا اعلان کیتا ۔ جس تے کہ پولیس دے تشدد تے فائرنگ دے دوران 4 طلباء عبدالجبار ، رفیق ، برکت تے سلام مارے گئے ۔ اس دن نوں یونائٹڈ فرنٹ دی حکومت نے یوم شہداء بنگلہ دے طور تے منانا شروع کیتا تے 1963 وچ شہادت دے مقام اتے شہید مینار تعمیر کرایا ۔ 17 نومبر 1999 نوں اقوام متحدہ دے ذیلی ادارے یونیسکو نے اس دن نوں شہید نوجواناں دے ناں منسوب کیتا تے 2008 نوں اس دن نوں ماں بولی دیہاڑ دے طور تے منان دا اعلان کیتا جہڑا کہ ہن ساری دنیا وچ منایا جاندا اے ۔
قارئین کرام !
جیویں کہ عرض کیتا اے کہ زبان کسے وی اک تہذیب دی کھلری ہوئی عوام نوں اک مالا وچ پرون دا مڈھلا ذریعہ ہوندی اے ۔ جس نال انہاں نوں مڈھلے علوم اپنی ماں بولی وچ سکھن دا موقع ملدا اے تے اوہ اپنے بشری تقاضیاں بارے بہتر طور تے سکھ تے فیصلہ کرن دی صلاحیت حاصل کر کے اک منظم قوم دی راہ تے چل پیندے نیں ۔ پنجابی قوم پسند تنظیماں اسے یک قومی نظریے نوں لے کے چل رہیاں نیں تے ہر سال ماں بولی دیہاڑ دے موقع تے ساڈی اس سوہنی وادی سپت سندھو المعروف فی زمانہ پنجاب وچ ایتھوں دے بالاں نوں مڈھلی تعلیم انہاں دی ماں بولی وچ دیوان دی منگ کردیاں نیں ۔ پچھلے سال لاہور ، جھنگ ، راولپنڈی تے ساہیوال وچ کرائے گئے کامیاب کٹھاں دے کارن ایتکی کئی ہور شہر وی شامل ہو گئے نیں جنہاں وچ گوجرانوالہ تے سرگودھا وی شامل نیں ۔ پنجاب لوک لہر اک عرصے توں اسے کاوش نوں اگے ودھان دا آہر کر رہی اے ۔ جس وچ محترم قسور مبارک بٹ صاحب تے اس تنظیم دے تمام اراکین دا کم مثالی حیثیت رکھدا اے ۔ اسے سلسلے وچ ہن 21 فروری 2021 نوں اس وادی دے معروف تاریخی مقام ہڑپہ دے میوزم وچ اک رنگا رنگ پنجابی ماں بولی تے ثقافتی تقریب دا پربند کیتا گیا اے ۔ جس وچ پنجابی زبان دی اہمیت اجاگر کرن دے نال نال اس نوں بچیاں لئی مڈھلا ذریعہ تعلیم بنان دی منگ کیتی جائے گی ۔ پنجابیاں نوں شرکت دا کھلا سدا دتہ جاندا اے ۔ زیادہ توں زیادہ شرکت کرو تا کہ پنجاب دے لوکاں نوں ماں بولی دی اہمیت تے پنجابیت ول متوجہ کیتا جا سکے ۔
