چڑھدے پنجاب تے قیامت تے ساڈی چپ

لکھت: مطلوب وڑائچ

تریخ وچ پہلی واری ویکھیا گیا اے کہ کسان اپنے حق لئی ایس طرح اکمٹھ ہوئے نیں۔ بھارت وچ کساناں نے مودی دے اپنے سپورٹراں تے پروموٹراں نوں نوازن دے قنون نے بھارتی کساناں نوں سیسہ پلائی کندھ وانگوں اکمٹھ کر دتا اے۔ ساریاں رکاوٹاں بھن کے ہندوستان دے سب توں ودھ سکیورٹی دے حصار وچ شہر دہلی جو دارالحکومت وی اے نوں تاراج کر دتا۔ اتفاق نال بھارت وچ زیادہ تر کسان سکھ مذہب نال تعلق رکھدے نیں تے کساناں دی ایس تحریک وچ خالصتان دا عنصر وی شامل ہو گیا۔ سکھاں نوں اپنے اُتے ہون والے کانگریس دور دے ظلم تے مودی سرکار دے متعصبانہ تے جارحانہ رویے وی پریشان کرن لگ پئے۔ سکھاں دی طاقت نوں منتشر کرن لئی پنجاب دے تن حصے کر دتے گئے۔ اک صوبے توں ہریانہ تے ہماچل پردیش کڈھ لئے گئے‘ سکھ ایس ونڈ نوں قبول کرن تے تیار نہیں تے فیر گولڈن ٹیمپل تے حملے تے سنت جرنیل سنگھ بھنڈرانوالہ سنے ہزاراں سکھاں نوں بچیاں تے عورتاں سنے قتل نے سکھاں نوں خالصتان دے قیام دی تحریک ول زیادہ شدت نال مائل کیتا۔ اج کسان تحریک وچ خالصتان دی جھلک وی کدھرے نہ کدھرے نظر آئوندی اے۔
اج دہلی وچ 23لکھ سکھ اکٹھے ہو چکے نیں۔ اوہناں تے فائرنگ کیتی جاندی اے اتھرو گیس سٹی جاندی تے فیر موسم وی ستگمر اے۔ ٹھنڈ وی واہوا اے پر سکھ دہلی دا گھیرا گھتی بیٹھے نیں۔ 26جنوری نوں یوم جمہوریہ دے موقعے تے سکھاں نے لال قلعہ توں ترنگا لاہ کے اپنا شان صاحب لہرا دتا۔ ہن کسان نویں جوش و جذبے نال دہلی دا گھیرا گھت رہے نیں ایہناں نوں روکن لئی را نے دہلی وچ اسرائیلی سفارتخانے تے دھماکا کرا دتا ہن سکیورٹی دا جواز بنا کے مظاہرین نوں دہلی وچ وڑن توں ڈکیا جا رہیا اے۔ مودی سرکار انتقام وچ انھی ہو گئی اے۔ ہریانہ دے 15 ضلعیاں وچ مودی سرکار نے انٹرنیٹ بند کر دتا۔ ہریانہ دے جہڑے ضلعیاں وچ ایہ پابندی لائی اے اوہناں وچ انبالہ‘ یمنانگر‘ کروچھیتر‘ کرنال‘ کیتھل‘ پانی پت‘ حصار‘ جنید‘ روہتک‘ بھوانی‘ چرخی دادری‘ فتح آباد‘ ریواڑی تے سرسا شامل نیں۔ اودھر مودی سرکار نے بوکھلاہٹ وچ کئی نامور صحافیاں خلاف بغاوت دے مقدمے درج کر لئے نیں۔ اوہناں تے کساناں نوں پرتشدد مظاہریاں دی ترغیب دین دا الزام اے۔ ایف آئی آر وچ معروف صحافی راج دیپ سردیسائی‘ نیشنل ہیرالڈ دے ایڈیٹر مرنال پانڈے‘ قومی آواز دے مدیر ظفرڈغا تے کارواں میگزین نال جڑے اننت ناتھ تے ونود جوز وی شامل نیں۔ میری منال پانڈے نال فون تے گل بات ہوئی تے اوہناں دا کہنا سی کہ حکومت اجہے اقدامات توں آزادی اظہار نوں کرش کرنا چاہندی اے پر اسیں اوہو کہواں گے جو سامنے نظر آئوندا اے۔
ایہناں حالات وچ سانوں کیہ کرنا اے بھارت بلوچستان وچ جو کر رہیا اے اوہدے توں پوری دنیا جانوں اے تے فیر بھارت سب کجھ اعلانیہ کرا رہیا اے۔ اسیں بھارت دی بھارت وچ وڑ کے سکھاں دی مدد کرنے آں نہ کشمیر دے اندر ساڈی مداخلت اے پر اخلاقی طور تے سانوں سکھاں تے کشمیریاں دی حمایت دا حق حاصل اے۔ اج کشمیر تے چڑھدے پنجاب وچ علیحدگی دی تحری زوراں تے اے۔ اسیں دنیا نوں تے ایہناں تحریکاں تے مودی سرکار دے اقلیتاں تے ظلم بارے دس سکنے آں تے اج اجیہا پوری قوت تے شدت نال کرن دی لوڑ دے نال نال موقع وی اے۔ دو پنجاب دا جہڑا کہ اک ہونا ناقابل فہم اے پر ایہ ناممکن نہیں۔ گریٹر پنجاب جے ایس صورت وچ بن دا اے کہ سکھ چڑھدے پنجاب نوں آزاد کرا کے پاکستان وچ شامل کرا دین تے ایہدے وچ کیہ حرج اے۔ اوہناں نوں اپنیاں مقدس تھاواں بابا گورونانک دی جنم بھومی ننکانہ تے جائے انتقال کرتارپور تک رسائی ہو جاوے گی تے پنجاب وی گریٹر بن جاوے گا۔ چڑھدا پنجاب جہنوں ونڈ کے 1947ء وچ مستقل بھارت دے حوالے کر دتا گیا۔ جتھوں دی اکثریتی حکومت ہندوئواں دی سی جنہاں نے اپنے حصے وچ آئے پنجاب دے ہور تن ٹوٹے کر دتے تے ایس طرح ہریانہ‘ چندی گڑھ تے پنجاب دے صوبے ب نے۔ ونڈ دے ستر ورھیاں مگروں سکھاں نوں ایہ احساس ہو چکیا اے کہ ساڈی سکھ قیادت ماسٹر تارا سنگھ نے سانوں اوہ عظیم نقصان اپڑا دتا اے کہ جہدی تالفی اگ تے لہو دے کنے سمندر پار کرکے شاید ممکن ہووے۔ ویلے دے نال نال چڑھدے پنجاب دے وسنیکاں نوں ایہ وی تجربہ ہویا کہ پنجاب دے سکھاں نوں ونڈ کے اوہناں لئی بڑا متبرک ننکانہ‘ کرتارپور تے دوجیاں مذہبی تھاواں تے سکھاں دے کول موجود ای نہیں سن۔
ستر ورھے بعد عمران خان دے اقتدار وچ آن مگروں عمران خان تے جنرل باجوہ دیاں کاوشاں دی وجہ نال کرتارپور نوں اک کوریڈور بنا کے اک عظیم پلیٹ فارم دتا گیا پر بھارت دا ہندو بنیا پنجاب دے پھلدے پھولدے کساناں نوں نہیں ویکھ سکدا سی اوہ ایسے کوشش وچ لگا رہیا کہ پنجاب دے کسان جہڑے معاشی مجبوریاں ہتھوں تاریخی تے اجتماعی خودکشیاں کرن لگ پئے سن اوہناں دیاں رگاں چوں ہور لہو نچوڑن لئی پنجاب تے ہریانہ دے سارے کساناں نوں امبانی ورگے سرمایہ داراں دے اگے سٹ دتا گیا تاں جے اوہ اپنی مرضی نال ہولی ہولی اوہناں دا لہو نچوڑ سکن۔ جہنوں پنجاب تے ہریانہ دے غیرت مند کساناں نے قبول نہ کیتا تے اج کروڑاں کسان آزادی لئی لڑ رہے نیں۔٭٭