اجے احتیاط

لكهت:ارشاد بھٹی

میں کہیا ڈاکٹر صاحب تسیں اینے پریشان کیوں ہو رہے او‘ ہن تے کرونا آخری ساہواں تے اے‘ ڈاکٹر صاحب نے حیرانی نال مینوں ویکھیا‘ لمحہ بھر لئی سوچیا‘ فیر بولے‘ کیہ مطلب اے تہاڈا‘ مینوں پریشان نہیں ہونا چاہیدا‘ کیہ مینوں خوش ہونا چاہیدا اے۔ میں کہیا‘ میں ایہ نہیں کہہ رہیا کہ تسیں خوش ہوو پر مینوں انج لگ رہیا اے جیویں تسیں کجھ زیادہ ای پریشان او۔ ڈاکٹر صاحب نے میری گل کٹدیاں ہویاں کہیا میں ایس لئی پریشان آں کہ کرونا دی دوجی لہر پہلی لہر توں وی ودھ خطرناک اے میں تے ایس لئی پریشان آں کہ ایس واری وائرس یورپین اے‘ پہلی لہر والا وائرس چائنا دا سی‘ ایس واری وائرس زیادہ طاقتور اے‘ میں ایس لئی پریشان آں کہ اُتوں موسم اجیہا اے کہ بندہ اچانک گرم سرد ہو جاندا اے میں ایس لئی پریشان آں کہ کرونا ختم ہو گیا یاں ہن کرونا وچ اوہ پہلے والا دم خم نہیں رہیا جیویں تسیں کہیا کہ کرونا آخری ساہواں اُتے اے ایہ سب تھیوریاں والے لوک احتیاط نہیں کر رہے۔ اُتوں کرونا ویکسین دیاں مسلسل خبراں سن سن کے لوک ہور بے احتیاطے ہو گئے نیں۔ حالاں کہ ویکسین دے افیکٹس یاں سائیڈ افیکٹس اک پاسے رکھو‘ بائی کروڑ دے ملک وچ ڈیڑھ کروڑ مانگے تانگے دی ویکسین آ وی گئی تے اک انار سو بیمار والی صورتحال ہووے گی ایس لئی جو موسم دا حال‘ جناں وائرس خطرناک‘ جنی بے احتیاطی ہو رہی اے لوک مر رہے نیں‘ میں ایس لئی پریشان آں‘ بلاشبہ زندگی‘ موت اللہ دے ہتھ وچ اے پر تھوڑی جہی کوشش نال بہت ساریاں جاناں بچائیاں جا سکدیاںسن‘ بچائیاں جا سکدیاں نیں۔
دوستو! گل اگے ودھان توں پہلاں میں ڈاکٹر صاحب دا تعارف کروا دیواں کرونا دی موجودہ صورتحال تے پریشان ہون والے ساڈے ڈاکٹر غلام صابر نیں‘ جو Alternative Medicine دے ڈاکٹر‘ جہناں دا اسلام آباد وچ نیچرل میڈیکل اینڈ ریسرچ سنٹر‘ جہناں دے اٹلی‘ لندن وچ کلینکس‘ جہناں دی یورپ وچ چار سو دوائیاں اپنے ناں نال‘ جہناں دے یورپ‘ برطانیہ وچ ہزاراں مریض‘ جہناں دے صرف اٹلی وچ 20 ہزار دے نیڑے مریض تے جہناں نے ڈاکٹر غلام صابر دے امیون سسٹم (قوت مدافعت) نوں مضبوط کرن دا کورس کیتا اوہناں نوں کرونا نہ ہویا‘ باقی چھڈو‘ میری سن لوو‘ میرے پورے خاندان نوں کرونا ہویا پر مینوں نہیں ہویا۔ میں تن واری کرونا ٹیسٹ کروایا‘ تنے واری نگیٹیو آیا‘ کرونا نہ ہون دی وجہ اللہ دے فضل و کرم دے بعد ڈاکٹر غلام صابر دا امیون سسٹم مضبوط کرن والا دوائیاں دا کورس کرنا سی۔ مینوں پتہ اے کئی سیاستدان‘ صحافی تے بیوروکریٹس ایس کرونا توں بچے تے اللہ دے فضل و کرم دے بعد ڈاکٹر صاحب دی دوائیاں دی وجہ نال۔ مینوں اوہ وکیل ذہن وچ آئوندا اے پہلا منظر ایہہ سی صوفے تے لیٹیا ہویا‘ ساہواں اکھڑ رہیاں‘ چہرہ نیلا ہو رہیا اے‘ کجھ دیہاڑے بعد دوجا منظر‘ آپ چل پھر رہیا سی خوش باش‘ گل گل تے اللہ دا شکر ادا کردا ہویا۔ ڈاکٹر صاحب نوں دعاواں دیندا ہویا‘ فیر اوہ نامور صحافی جہدا چوتھے پنجویں دن کرونا نگیٹیو ہو گیا تے اوہنوں یقین ای نہیں سی آ رہیا۔ اوہ سیاستدان جہدا کرونا مرض تے دل دی بیماری دوویں بیک وقت کنٹرول وچ آ گئے۔ ایہ تے دو چار مثالاں اجیہاں‘ سینکڑوں مثالاں ہور‘ ساڈے ایتھے تے جہدی لاٹھی اوہدی بھینس‘ یورپ وچ تے باقاعدہ قنون تے قنون تے عمل وی ہووے‘ یورپ وچ ڈاکٹر صاحب دے ناں توں چار سو دوائیاں ویچیاں‘ خریدیاں جا رہیاں نیں تے کرونا معاملے تے جے اٹلی حکومت ہر چوتھے دن ڈاکٹر غلام صابر توں مشورے لے رہی اے تے ایہدا مطلب اوہناں تے اللہ دا خاص کرم اے۔
گل لمی ہو گئی‘ گل اوتھوں شروع کرنے آں جتھے ختم کیتی سی۔ میں ڈاکٹر صاحب توں پچھیا‘ ڈاکٹر صاحب ہن کیہ کرنا چاہیدا اے بولے‘ اجے کرونا نوں ایزی نہ لوو‘ اپنا امیون سسٹم مطلب اپنی قوت مدافعت بہتر بنائو‘ احتیاط کرو‘ ہتھ ملان‘ گلے ملن توں پرہیز‘ فاصلہ‘ ماسک‘ دستانے‘ گلوز سب کجھ جاری رکھو‘ میں کہیا ڈاکٹر صاحب بندہ اپنا قوت مدافعت نظام کیویں مضبوط بناوے‘ بولے ایہ خوراک‘ دوائیاں نال ہو سکدا اے۔ کہن لگے‘ یورپ وچ ہن Alernative Medicine دی قدر دا احساس ہویا اے۔ ہن ایس پاسے خاص دھیان دتا جا رہیا اے۔ ہن ساریاں نوں پتہ لگ رہیا اے کہ ایہ جڑی بوٹیاں‘ پتیاں‘ پودیاں‘ پھُلاں نال بنیاں دوائیاں وی کنیاں قیمتی نیں ایس طریقہ علاج دے کوئی سائیڈ افیکٹس وی نہیں۔ ڈاکٹر صاحب Alernative Medicineدا دس رہے سن جد کہ مینوں اپنے ملک دے اوہ وڈے سیاستدان یاد آ رہے سن جو چھ مہینے وچ ایلوپیتھی دوائیاں چھڈ کے ڈاکٹر صاحب دی دوائیاں تے لگ چکے تے اوہ اعلیٰ سرکاری افسر جہناں دا ہن کہنا اے کہ جیویں جیویں میڈیکل سائنس اگے جاندی جا رہی اے اویں اویں انسان غیرمحسوس طریقے نال جڑی بوٹیاں دے قدرتی علاج ول پرت رہیا اے۔
میں ڈاکٹر صاحب توں پچھیا‘ کرونا دے مکمل خاتمے دا کدوں تک چانس‘ بولے بلاشبہ کرونا خاتمے ول ودھ رہیا اے پر اجے بے احتیاطی نہیں‘ اجے ایہ وقت بڑا احتیاط نال گزارنا اے۔ اپنے آپ نوں ٹھنڈ نہیں لگن دینی۔ اج کل اچانک ٹھنڈ لگ جاندی اے یاں بندہ بیمار ہو جاندا اے قوت مدافعت کمزور پیندی اے کرونا حملہ آور ہوندا اے تے حملہ کردا اے پھیپھڑیاں تے‘ ساہ دے نظام تے‘ آکسیجن لیول گھٹ ہو جاندا اے‘ ساہ لینا اوکھا ہو جاندا اے تے مرن دا خطرہ پیدا ہو جاندا اے کجھ وٹامنز نیں‘ کجھ فروٹ نیں‘ کجھ قہوے نیں تے کجھ دوائیاں نیں‘ بندہ کرونا توں بچیا رہندا اے۔ یورپین وائرس خطرناک ای ایس لئی سمجھیا جا رہیا اے کہ ایہ پھیپھڑیاں تے حملہ کردا اے ساہ دے نظام تے حملہ کردا اے‘ جہدے نال ساہ لینا اوکھا ہو جاندا اے۔ ڈاکٹر صابر نے دسیا کہ یورپ‘ امریکہ‘ برطانیہ وچ کرونا دی دوجی لہر دا وائرس اجے تک سمجھ وچ نہیں آیا۔ خاص طور تے برطانیہ تے اٹلی سنے یورپ دے کجھ ملکاں وچ دوجی لہر دا وائرس جنہوں وی لگا‘ اوہناں وچوں بہت گھٹ بچے‘ خاص طور تے اوہ لوک جہناں نوں کسے قسم دی الرجی سی‘ اوہناں نوں تے کرونا ویکسین وی نہیں لانی چاہیدی۔ پہلے الرجی دا کجھ کیتا جاوے فیر ویکسین لانی چاہیدی اے۔ ایہ سب کہہ کے ڈاکٹر غلام صابر صاحب مریض چیک کرن لگ گئے۔ اوہ ہس ہس کے مریض چیک کر رہے سن‘ دوائیاں دے رہے سن‘ اوہناں نوں حوصلہ دے رہے سن جد کہ ہن میں پریشان بیٹھا سی‘ بالکل انج ای جیویں گھنٹہ بھر پہلے ڈاکٹر غلام صابر پریشان سن۔
(بشکریہ روزنامہ جنگ)