تسیں وزیر نہیں رہ سکدے!

لكهت: مظہر برلاس

شاید تہانوں یاد ہووے انگریز دور وچ سب توں پہلا ریلوے ٹریک کراچی دے علاقے کیماڑی وچ بنایا گیا فیر پورے برصغیر وچ ریلوے دا زبردست نظام بنایا گیا۔ وڈے وڈے لیڈر ریل تے سفر کردے رہے۔ 1947ء دے بعد ہندوستان وچ پہلے اک مسلمان وزیر نے ریلوے دی اٹھان وچ کردار ادا کیتا تے فیر بہت بعد وچ بہار دے لالوپرشاد یادیو نے ریلوے نوں ڈھیر منافع بخش بنا دتا۔ اج وی ہندوستان وچ ریلوے دا مربوط نظام اے اوتھے ریل ٹرانسپورٹ دا اک کامیاب ذریعہ مسافراں دا پہلا انتخاب صرف ریل اے۔ سامان لیان‘ لے جان لئی وی ریل دا ای استعمال ہوندا اے۔ بھارت وچ سامان لیان‘ لے جان وال اکوئی وی ٹرک پنج سو کلومیٹر توں ودھ نہیں جا سکدا۔ انج سمجھ لوو کہ سامان سنے اک ٹرک راولپنڈی توں ملتان تے جا سکدااے پر سکھر یاں حیدرآباد نہیں پر ساڈے ایتھے تے پشاور توں کراچی تک ٹرکاں دیاں قطاراں جاندیاں نیں ایہدے نال سڑکاں خراب ہو جاندیاں نیں سانوں ہر ورھے جتھے ریلوے دے لمے چوڑے خسارے دا سامنا کرنا پیندا اے اوتھے ساڈا چوکھا سرمایہ سڑکاں تے لگ جاندا اے یعنی دوطرفہ بربادی ہو رہی اے۔ ایہ کھیڈ اوس ویلے تیزی نال شروع ہویا جدوں غلام احمد بلور ریلوے دے وزیر بنے۔ ایہ پی پی دا زمانہ سی‘ مال گڈیاں نوں پتہ نہیں کدے کر دتا گیا ہن مال گڈیاں نظر ای نہیں آئوندیاں۔
دوستو! ساڈیاں اکھاں دے سامنے بربادیاں دا سفر جاری رہیا۔ ایہ زیادہ پرانی گل نہیں‘ پینتی چالھی ورھے دا سفر اے۔ ضیاء الحق ایس ملک وچ اجہے لوکاں نوں اقتدار وچ لیائے جو لوہے دی مل دے مالک سن۔ اوہناں نے ساڈیاں کئی ٹریناں بند کروائیاں‘ ٹرانسپورٹ مافیا دے نال رَل کے ریل دے سفر نوں نکارہ بنایا۔ کجھ روٹاں تے ٹریناں گھٹ تے کجھ تے مکمل بند کر دتیاں گئیاں۔ دربار صاحب کرتارپور دے نیڑیوں اک ریلوے ٹریک ڈیرہ بابا نانک ول جاندا سی‘ ایہ ریلوے لائن جسڑ دے مقام توں وکھری ہوندی سی۔ ساڈے ویکھدیاں ویکھدیاں ایہ ٹریک پٹیا گیا فیر کسے دی مل دا ایندھن بن گیا‘ پتہ نہیں کنے ریلوے انجن بھٹھیاں دی نذر ہو گئے۔
چکوال دا ریلوے ٹریک بڑا مشہور سی۔ ایس ٹریک نوں وی ختم کرکے ملاں دی نذر کیتا گیا۔ چکوال وچ ریلوے دیاں زمیناں تے قبضہ کروایا گیا ایہ سب کجھ ملک دے ٹھیکیداراں نے کیتا۔ میانوالی وچ کندیاں تے ماڑی انڈس جان والیاں ٹریناں نوں بند کر دتا گیا۔ ایہو کھیڈ بہاولنگر وچ ہویا‘ ٹریک پٹ کے ملاں دی نذر کر دتے گئے جو ٹریک پٹے گئے اوتھے صرف ٹریک دا لوہا نہیں سی اوتھے لوہے دے پل وی سن۔ پاکستان دا ایہ قیمتی سرمایہ مٹی توں وی گھٹ قیمت تے ملاں نوں دے دتا گیا۔ ریلوے دے نال تن کم ہوئے۔ ریلوے ٹریک پٹے گئے تے ملاں دی نذر کیتے گئے۔ ٹرک مافیا دے نال رَل کے مال گڈیاں نوں ختم کر دتا گیا جد کہ ٹرانسپورٹ مافیا دے نال رَل کے کئی روٹس ختم کر دتے گئے۔ باقی تھاواں تے ریل دی آمدورفت وچ تاخیر نوں یقینی بنایا گیا باقی کسر ریلوے دے ملازماں نے آپ کڈھ دتی۔
فرض کرو تسیں ریلوے دے وزیر بن جاندے او تسیں بڑے انقلابی او‘ تسیں ریلوے نوں سدھا کرنا چاہندے او تے تہانوں وڈے وڈے مسئلیاں دا سامنا کرنا پوے گا۔ سب توں پہلاں تہانوں پہاڑ جنے خسارے دا سامنا ہووے گا۔ تسیں ایس خسارے نوں ختم کرن دا سوچو گے ایہدے لئی منصوبہ بندی کرو گے‘ منصوبہ بندی توں پہلاں تہاڈی اک نظر وکے ہوئے ریلوے ٹریکس تے جاوے گی پر ایہدا تہاڈے کول حل نہیں فیر تسیں ایس خسارے نوں پورا کرن لئی ریلوے دیاں زمیناں تے نظر مارو گے تے تہانوں پتہ لگے گا کہ بہت سارے اراکین اسمبلی نے ریلوے دیاں زمیناں تے نہ صرف قبضہ کیتا سگوں قبضہ کرکے اوہناں نوں ویچ وی دتا۔ تسیں خالی کروان دی کوشش کرو گے تے تہاڈے خلاف مظاہرے شروع ہو جان گے۔ ریلوے افسر تہانوں ریکارڈ ای نہیں دین گے کیوں جے ایہ سب کجھ رَل مل کے ہوندا رہیا۔ تہانوں کجھ زرعی زمیناں دسیاں جان گئیاں تے کہیا جاوے گا اوہ وی لیز تے دتیاں گئیاں نیں۔ فیر تہاڈی نظر مہنگیاں زمیناں تے قائم ریلوے افسراں دیاں وڈیاں وڈیاں رہائش گاہواں تے جاوے گی بس فیر تہاڈے سامنے ایہو افسر کندھ کھڑی کر دین گے۔ تسیں مال گڈیاں چلان دی کوشش کرو گے تے ٹرک مافیا تہاڈا دشمن بن جاوے گا۔ تسیں ٹریناں دی آمدورفت ٹھیک بنان دی کوشش کرو گے تے ٹرانسپورٹ مافیا دشمنی تے اتر آوے گا ایس دشمنی وچ ریلوے دے ملازم وی شامل ہو جان گے۔ ٹریناں دے حادثے ہون گے‘ تسیں ریلوے اسٹیشناں تے صفائی دا سوچو گے جیب کتریاں تے بھکاریاں دا خاتمہ چاہو گے تے ریلوے دے اندر بیٹھا مافیا تہاڈے خلاف ہو جاوے گا۔ تسیں ٹریک دی درستی تے ٹریک تے پتھر پان دے ٹھیکیاں دا جائزہ لوو گے تے افسر تہاڈا جینا حرام کر دین گے۔ خسارہ ودھدا جاوے گا تہانوں راہ بند ہوندے نظر آن گ۔ اجے تے تسیں ریلوے ورکشاپاں دا جائزہ لینا سی پر ایتھوں تک دے سفر وچ ای تہانوں چھ ست مافیادے نال ایناں لڑنا پوے گا کہ ایس لڑائی وچ تسیں وزیر ای نہیں رہوو گے۔ ایہ مافیا کئی وزیر کھا چکے نیں ایتھے جدوں تک سخت سزاواں نہیں ملن گئیاں نظام ٹھیک نہیں ہووے گا۔ اجے تے مینوں سرور ارمان دا شعر یاد آ رہیا اے کہ:
سرجھکائے ہوئے مقتل میں کھڑے تھے جلاد
تختہ دار پہ لٹکی ہوئی خودداری تھی