کبڑے سینیٹر دیاں گلاں

امرجلیل

اک بڑے سیانے بابے نے مینوں کہیا سی بھار اوناں چکنا چاہیدا اے جناں کمر سہہ سکے۔ زیادہ بھار چکن نال کمزور کمر ٹٹ سکدی اے‘ دہری ہو سکدی اے تے تسیں کبے ہو سکدے او سگوں تسیں کبڑے ہو چکے او۔ سیانیاں دیاں گلاں مینوں چنگیاں نہیں لگدیاں۔ میرے توں ہضم نہیں ہوندیاں۔ اوہ زمانہ لنگھ گیا جدوں لوک اپنا بھار آپ چکدے سن۔ اوہناں دی کمزور کمر دہری ہو کے ٹُٹ جاندی سی تے اوہ کبڑے ہو جاندے سن۔ سیانے بابے نوں پتہ نہیں کس خبیث نے دسیا سی کہ زیادہ بھار چکن دی وجہ نال میں کبڑا ہو گیا سی۔ حالاں کہ اللہ تعالیٰ دے لطف و کرم نال میرا تعلق کھاندے پیندے‘ بااثر تے پہلے دن توں اقتدار وچ رہن والے گھرانے نال اے۔ اسیں اپنا بھار آپ چکن نوں معیوب سمجھنے آں۔ ساڈا بھار دوجے لوک چکدے نیں۔ میرے کہن دا مطلب اے ساڈا بھار چکن والیاں دی ساڈے ایتھے تھوڑ نہیں۔ اللہ دا دتا سب کجھ اے ساڈے کول۔ جس کسے کول اللہ دا دتا سب کجھ ہوندا اے اوہ اپنا بھار آپ نہیں چکدا۔ اوہدا بھار ہور لوک چکدے نیں۔ ایہ ٹھیک اے کہ میں کبڑا وکھائی دینا واں پر میں تہاڈے تے واضح کر دینا لازمی سمجھنا واں کہ کسے قسم دا بھار چکن دی وجہ نال میں کبڑا وکھائی نہیں دیندا۔ایہ سب اللہ تعالیٰ دا لطف و کرم اے۔ کبڑا وکھائی دینا مینوں ورثے وچ ملیا اے۔ میرے والد کبڑے سن‘ سگوں اجے تک کبڑے نیں۔ میرے دادا کبڑے سن میرے پڑدادا کبڑے سن میرے تڑدادا دے تڑدادا وی سنیا اے کہ کبڑے سن۔ اوہ سارے انگریز سرکار دے دور وچ کبڑے ہو گئے سن۔ باقی رہندی ساڈی فیملی دے بزرگان پاکستان بنن دے بعد کبڑے ہو گئے سن۔ اوہناں نے وی کسے قسم دا بھار نہیں سی چکیا۔ ایہناں ساریاں دا بھار چکن والے اوہناں دے اگے پچھے پھردے رہندے سن۔ میں تہانوں الجھن وچ نہیں پانا چاہندا نسل در نسل ساڈے کبڑے ہون دی وجہ میں تہانو ںدس دینا واں۔ ساڈے خاندان‘ ساڈی فیملی تے اللہ تعالیٰ دا لطف و کرم اے جہدے تے اللہ سائیں دا لطف و کرم ہوندا اے اوہ حاکم وقت دا منظور نظر ہوندا اے تے حاکم وقت دا منظور نظر ہون دے ن اطے‘ اوہدے تے ملک و قوم دی اصلاح دا بھار پا دتا جاندا اے۔ انگریز حکمراناں نے رعایا نوں بغاوت توں باز رکھن دا بھار ساڈے وڈیریاں تے پا دتا سی۔ محب وطن ہون دے ناطے حاکم وقت ولوں ساڈے تے لدیا ہویا بھار اسیں اپنے واسطے اعزاز سمجھدے سی تے ایہ بھار اسیں ہس کے قبول کر لیندے آں۔ حکومتاں ولوں ساڈے تے لدیا ہویا بھار معمولی نوعیت دا نہیں سی۔ حکومتی استحکام دیاں ذمے واریاں دا معتبر بھار چکدے چکدے اسیں کبڑے ہو جانے آں۔ حکام وقت دیاں نگاہواں وچ لگاتار سرخرو رہن دی وجہ نال میں لگاتار سینیٹر منتخب ہوندا رہیا واں۔
ایس واری سینٹ وچ جو ذمے واریاں مینوں دتیاں گئیاں نیں اوہناں ذمے واریاں وچ سب توں اہم ذمے واری اے پرائیویٹائزیشن دی۔ تسیں جان دے ہوو گے کہ جہڑے ادارے سرکاری ملازم نہیں چلا سکدے اوہ ادارے سرکار پرائیویٹ پارٹیاں نوں نیلام کر دیندی اے تے نااہل ملازماں نوں دوجے اداریاں وچ ضم کر دتا جاندا اے۔ ایس نیک کم لئی سرکار نے پرائیویٹائزیشن کمیشن قائم کر دتا اے۔ سینٹ وچ میرا کم اے پرائیویٹائزیشن کمیشن تے نظر رکھنا۔ جو ادارے سرکاری ملازم نہیں چلا سکدے‘ اوہناں اداریاں دی تسیں عام پاکستانیاں نوں نشاندہی کرنی اے۔ پرائیویٹائزیشن کمیشن دا کم اے فوراً حرکت وچ آنا۔ نکام ادارے نوں ویچ دینا‘ چھان بین کرن مگروں کہ ادارہ واقعی خاص طور تے خسارے دا کارن بن دا رہیا سی۔ پرائیویٹائزیشن کمیشن نکام ادارے نوں نیلام کر دیوے گا۔ کٹر قسم دا جمہوری دور چل رہیا اے۔ ہن ایہ تہاڈے تے منحصر اے کہ کس کس نکارہ تے خسارے دا کارن بنن والے ادارے توں پچھا چھڑانا چاہندے او۔ تسیں مینوں‘ میرے سینیٹر ہون دے ناطے دس دیو۔ باقی کم میرے تے چھڈ دیو۔ ایسے قسم دے قومی فرائض دا بھار چکدے چکدے اسیں جوان ہونے آں تے جوانی وچ کبڑے ہو جانے آں۔ ہن تسیں سمجھ گئے ہوو گے کہ اسیں تے ساڈی فیملی ورگے ساڑھے تن سو کبڑے اسمبلی وچ کیوں بیٹھے ہوئے ہوندے او۔ ملک چلانا تہاڈی کریانہ دی دکان وانگوں چلانا کھبے ہتھ دا کھیڈ نہیں۔ اسیں اپنی بہو‘ بیٹیاں‘ داماد‘ پُتراں سنے اپنی بیگمات دے گھر وچ کھانے دی ٹیبل تے کھانا کھاندے ہوئے قومی مسئلیاں تے گل بات کردے رہنے آں۔ کھلے ڈلھے لان تے شام دی چائے توں لطف اندوز ہوندے ہوئے اسیں ملکی مسئلیاں تے گل بات کرنے آں۔ میرے کہن دا مطلب اے کہ اسیں ایویں ای کبڑے نہیں ہوئے۔ اسیں قومی مسئلیاں دے حل لبھن دا بھار چکیا ہویا اے۔
ایہ میرا دعویٰ نہیں‘ حقیقت ایہہ وے کہ جے اسیں ساڑھے تن سو کبڑے خاندان نہ ہوندے تے تہاڈا ملک پاکستان کدی نہیں سی چل سکدا۔ ساڈی جانفشانی دی وجہ نال پاکستان دن دگنی تے رات چوگنی ترقی کر رہیا اے۔ کبڑا سینیٹر ہون دے ناطے میں تہانوں دس دیواں کہ نیلام کرن لئی یعنی پرائیویٹائزڈ کرن لئی تسیں اجہے سرکاری اداریاں دی نشاندہی نہیں کر سکدے جو ادارے بظاہر ملکی معیشت تے بھ ار نیں‘ خسارے وچ ڈبے ہوئے نیں پر ایہناں اداریاں دے افسراں دے کول دولت دی ریل پیل ہوندی اے۔ افسراں دی تن چار بیگمات ہوندیاں نیں وکھریاں وکھریاں کوٹھیاں وچ رہندیاں نیں۔ اوہناں دے کول نوکراں چاکراں دی ظفرموج ہوندی اے۔ اجہے افسراں دے بچے بیرون ملک پڑھدے نیں۔ ایہناں اداریاں وچ اللہ سائیں دے فضل و کرم نال نیک افسر لگے ہوئے ہوندے نیں اجہے اداریاں دی تسیں نشاندہی نہیں کر سکدے۔ حاکم وقت اجہے اداریاں دے لگاتار خسارے نوں خاطر وچ نہیں لیاندے۔ حکومتاں دا انحصار اجہے اداریاں دے افسراں دی اعلیٰ کارکردگی تے ہوندا اے مثلاً تسیں پولیس‘ اینٹی کرپشن‘ کسٹم‘ ایکسائز تے ٹیکسیشن تے ریونیو ورگے اداریاں دی نیلامی لئی نشاندہی نہیں کر سکدے۔ باقی تعلیمی اداریاں ورگے اداریاں دی نیلامی لئی تسیں جدوں چاہو میرے نال رابطہ کر سکدے او۔ اک محب وطن سینیٹر ہون دے ناطے میں فوراً حرکت وچ آ جاواں گا۔ فیر تسیں محسوس کرو گے کہ اسیں ایویں ای کبڑے نہیں ہوئے۔ اسیں ملک و قوم دا بھار چکیا ہویا اے۔٭٭