آہ۔۔۔۔ ضیا ءشاہد

ضیاء شاہد اپنے ناں دی طرح سچے تے روشن سن، اوہ بے باک تے پاک صحافت دی جاگیر سن

صدام ساگر

ضیاء شاہد نامور صحافی ، دانشور، ادیب سن۔ جنہاں نے صحافت دی آزادی لئی منظم تے باقاعدہ طور اُتے جدوجہد کیتی تے ایس دی آزادی دے حصول یا ایس دے تحفظ نوں جمہوری زندگی دا اک لازمی جزو قرار دے کے ایس لئی قربانیاں دین نوں بذات خود اک مطمع نظر بنا دتا۔ اظہار رائے دی آزادی اُتے عائد کیتی ہوئی پابندیاں دی جرات مندانہ خلاف ورزی کردے ہوئے ہور وی صحافیاں نے عظیم الشان قربانیاں دتیاں تے ایہناں بے خوف تے آزادی دی راہ وچ جہاد کرن والے صحافیاں وچ مولانا محمد علی جوہر، مولانا ظفر علی خاں، حمید نظامی، مجید نظامی دے ناں تاریخ وچ ہمیشہ سنہری الفاظ وچ لکھے جان گے۔ ضیاء شاہد دا ناں وی انج دے ای باوقار شخصیات وچ لکھیا جائے گا۔ اوہناں نے اک لمبے ورہے تیکر دشت صحافت وچ لنگھایا تے ساری عمر پرورش لوح و قلم وچ بسر کیتی ۔ بقول فیض احمد فیض
ہم پرورشِ لوح و قلم کرتے رہیں گے
جو دل پہ گزرتی ہے رقم کرتے رہیں گے
ضیاء شاہد نے علمی صحافت دا آغاز اج توں کئی ورہے پہلاں روزنامہ ’’کوہستان‘‘توں کیتاں بعد وچ اوہ روزنامہ ’’حالات‘‘، ویکلی ’’کہانی‘‘،’’ہفت روزہ ’’صحافت‘‘ ،’’روزنامہ نوائے وقت‘‘،’’روزنامہ جنگ‘‘، تے ’’اُردو ڈائجسٹ‘‘ و دیگر قومی اخباراں نال جُڑے رہے تے اک لمبے عرصے صحافتی تجربے دے بعد اوہناں نے روزنامہ ’’خبریں‘‘ ستمبر 1992 ء نوں شائع ہونا شروع ہویا تے ویکھدے ای ویکھدے ایس اخبار نے مقبولیت اختیار کر لئی روزنامہ ’’خبریں‘‘ دے چیف ایڈیٹر ضیاء شاہد اک تجربہ کار تے ذہین صحافی سن۔ ایہناں دی صحافیانہ تربیت ماہنامہ ’’اُردو ڈائجسٹ‘‘ دے مدیر الطاف حسینؒ نے کیتی۔ ایہناں نوں مجیب الرحمان شامی ، مجید نظامی مرحوم تے میر خلیل الرحمان مرحوم جہی صاف گو شخصیات دے نال کم کرن دا اعزاز حاصل ہویا۔ ضیاء شاہد نے روزنامہ ’’پاکستان‘‘ نوں کامیابی نال ہمکنار کیتا۔ روزنامہ ’’خبریں‘‘ دا خبراں نوں پیش کرن دا سٹائل وکھرا اے۔ ایس اخبار وچ خبراں ایس انداز نال دتی جاندیاں نیں یا لائیاںجاندیاں نیں کہ عام ذہنی سطح دا قاری وی ایہنوں فورا سمجھدا تے پسندا کردا اے۔
ضیاء شاہد نے پاکستان وچ پہلی وار عوامی سرمائے نال اک اخبار شائع کرن دا تجربہ کیتا اوہناں نے لرٹی پیپرز دی بنیاد رکھی۔ عوام نوں ایس دے حصص فروخت کیتے تے ہرنامہ نگار نوں نامہ نگاری حصص دی بنا اُتے دتی ایس طرح ہر نامہ نگار روزنامہ ’’خبریں‘‘ دا شیئر ہولڈر قرار پایا ایس دے علاوہ روزنامہ ’’خبریں‘‘ نے پہلی وار تنخواہ دار نامہ دار مقرر کیتے۔ ’’تفہیم صحافت‘‘ دے مطالعے توں پتہ چلیا کہ ضیاء شاہد اخبار دے قارئین دے نبض شناس نیں اوہناں نے عوام نوں دُکھتی رگاں نوں چھیڑیا اے۔ اوہناں نے سرکاری اداریاں دی دھاندلیاں نوں بے نقاب کر کے اپنے لئی قارئین دے دل وچ تھاں بنا لئی اے۔
جتھے ظلم اوتھے خبریں دے نعرے نے روزنامہ ’’خبریں‘‘ دی مقبولیت وچ وادھا کیتا اے۔ روزنامہ خبریں دی بنا اُتے غریب تے مظلوم دی اواز دی رسائی قانون نافذ کرن والے اداریاں دے کناں تیکر ہوندی اے تے اج جتھے روزنامہ ’’خبریں‘‘ ،روزنامہ ’’نیا اخبار‘‘ اُردو صحافت وچ اپنا موچر کردار ادا کر رہیا اے ایس دے علاوہ خبریں گروپ دے زیر سایہ چینل فائیو تے دیگر کئی اخباراں صحافتی دنیا وچ اپنی خدمات سرانجام دے رہیا اے۔
ضیاء شاہد اک محنتی بندے سن۔ اوہناں نے عوامی سطح اُتے صحافت نوں اک نویں پہچان دتی۔ کھلی کچہریاں ، آٹھواں کالم، مظلوم کی آواز جہیاں نویں نویں استعارات کڈیاں۔ اوہ اپنی محنت آپ دے تحت اک ورکر توں ایڈیٹر دے عہدے تیکر اپڑے۔ حسن نثار، سلیم صافی تے ایثار رانا جہے صحافیاں نوں سپر سٹار بنان والے وی ضیاء شاہد سن۔ ایس حوالے نال ایثار رانا دسدے نیں کہ ’’میرے جہے کنہے ای لوک سن جنہاں دے سر اُتے اوہناں نے ہتھ رکھیا ایہناں نوں زیرو توں ہیرو بنایا۔ میرے جہے کنہے ای لوک سن جنہاں نوں اخبار فروش توں چُک کے اخبار دا ایڈیٹر بنایا۔ پاکستانی صحافت وچ ایہناں دے نقوش کدی نہیں مٹائے جان گے۔‘‘
ضیاء شاہد اپنے ناں دی طرح سچے تے روشن سن۔ اوہ بے تاب حقائق دی داعی تحریر سن، اوہ میعارِ صداقت دی حامل تقریر سن۔ اوہ بے باک تے پاک صحافت دی جاگیر سن، اوہ خوف تے لالچ توں بالا تحریر سن، اوہ اپنی تحریر و چ وی دلکشی دی تاثیر سن، اوہ بے مثل باکردار تے اخلاق حسنہ تے مثبت سوچ دی تصویر سن، ملت دا درد تے ملک دا مان تے حقداراں دی نظراں دی توقیر سن، اوہ اہل فکر و نظر دی تدبیر ضیاء شاہد سن۔ ایس کالم دوران سینئر کالم نگار حیات عبداللہ دسدے نیں کہ ضیا ء شاہد اک یونیورسٹی دی حیثیت رکھدے سن۔ میری جدوں وی فون اُتے ایہناں نال گل ہوندی اوہ بالتفصیل گل بات کردے۔ جدوں میں ایہناں نال خبریں وچ اپنے کالم شروع کرن دا کہیا تے فوراً ہامی بھر لئی، حالاں کہ اوہ میرے ناں توں بالکل نا آشنا سن۔ نوآموز قلم کاراں نوں لکھن دا موقع ضرور فراہم کردے۔ جدوں میں ’’اشعار کی صحت‘‘ دے موضوع اُتے لکھنا شروع کیتا تے اوہ بوہت متاثر ہوئے تے ایس سلسلے نوں جاری رکھن دا حکم وی دتا۔ بھارت نے پاکستان دے دریائواں دا پانی روکیا تے ایس اُتے اوہ بوہت زیادہ دکھی سن اوہناں نے ایس مسئلے اُتے کتاب وی لکھی تے مینوں ایہہ اعزاز وی حاصل اے کہ اوہناں نے اپنی کتاب وچ میرے کالم نوں شائع کیتا۔ ضیاء شاہد صاحب نے جدید صحافت دا آغاز کیتا تے بالکل منفرد انداز وچ نہ صرف مظلوم دے حق وچ اواز بلند کیتی بلکہ خبر شائع کرن لئی اک وکھرے ای انداز نوں متعارف کروایا۔
جدید صحافت نوں اک نویں پہچان دین والے ضیا ء شاہد 14 اپریل بروز بدھ نوں اپنے خالقِ حقیقی نال جا ملے تے جدوں وی دشتِ صحافت وچ پھُل کھلن گے ، بہار آئے گی تے چمن مہکے گا تے قانون باغبانی رقم کرن والے ضیاء شاہد دا خون وی ایس وچ شامل ہوئے گا۔ اج اوہ سانوں ایس لئی یاد آندے نیں کہ جتھے چمن کھلنا سی اوتھے صحرا اے تے کل اوہ ایس لئی یاد آن گے کہ ہر گل ہر لالہ توں ایس دی خوشبو آئے گی۔ آخر اُتے جاندے جاندے خراج تحسین دے طور اُتے عابد کمالوی دے ایہہ اشعار ملاحظہ کرو۔
لائیں کہاں سے روشنی کتنے دیے بجھے
افسوس اب ضائے صحافت بھی چل دئیے
جو لوگ زندگی میں ضیا بانٹتے رہے
دنیا و آخرت میں وہی سرخرو ہوئے
٭٭٭٭