روزے دا مقصد

رمضان المبارک واقعی نیکیاں دی بہار دا موسم اے جس دا ہر اک لمحہ ساعت ایس قدر بابرکت تے باسعادت اے کہ باقی 11 مہینے مل کے وی ایس دی برابری و ہم سری نہیں کر سکدے

پروفیسر محمد عبداللہ بھٹی

سرور کائنات محبوب خدا ﷺ نے رمضان المبارک نوں نیکیاں دا موسم بہار قرار دتا اے۔ جس دا مطلب اے جس طرح بہار دی آمد اُتے چارے پاسے رنگ و نور تازہ پھُلاں دی برسات ہوندی اے بوسیدہ پتیاں دی تھاں تروتازہ پتے اُگدے نیں۔ نویں شگوفے پھُٹدے نیں ہر پاسے اک آسودگی خوشنمائی تروتازگی رنگینی تے خوش گورائیت دا دلر با روح دے اندر تیکر سرشاری دا خوب احساس ہوندا اے جسم و روح نویں کیفیت نویں منظر توں لطف اندوز ہوندے نیں۔ ایسے طرح جدوں سارے مہینیاں دا سردار مہینہ جس وچ اللہ تعالیٰ نے قرآن حکیم نازل فرمایا۔ رمضان المبارک دی اک بابرکت شب اسمان دنیا اُتے قرآن مجید دا نزول ہویا تاں ایس رات نوں خالق ارض و سمانے ساری راتاں اُتے فضیلت عطا فرمائی تے ایہنوں شب قدر قرار دیندے ہوئے ارشاد فرمایا۔ ترجمہ : (شبِ قدر فضیلت و برکت تے اجرو ثواب وچ ) ہزاراں مہینیاں تاں بہتر اے۔ رمضان المبارک دی فضیلت و عظمت تے فیوض و برکات دے بارے وچ شافع محشر ساقی کوثر مالک دو جہاں ﷺ فرماندے نیں۔ حضرت ابوہریرہ توں مروی اے کہ جدوں رمضان آندا اے تے جنت دے دروازے کھول دتے جاندے نیں تے دوزخ دے دروازے بند کر دتے جاندے نیں تے شیطاناں نوں زنجیراں نال بنھ دتا جاندا اے۔ اک ہور حدیث وچ حضرت ابوہریرہ فرماندے نیں شہنشاہ دو جہاں ﷺ فرماندے نیں جیہڑا بندا بحالت ایمان ثواب دی نیت نال رمضان دے روزے رکھدا اے ایس دے سابقہ سارے گناہ بخش دتے جاندے نیں۔
رمضان المبارک واقعی نیکیاں دی بہار دا موسم اے جس دا ہر اک لمحہ ساعت ایس قدر بابرکت تے باسعادت اے کہ باقی 11 مہینے مل کے وی ایس دی برابری و ہم سری نہیں کر سکدے۔ رمضان المبارک دی آمد دے نال ای ہر پاسے برکت و سعادت خیرات سخاوت ایثار تے یگانگی و اخوت دے ایمان افروز مناظر وکھائی دین لگدے نیں صدقہ خیرات دا رحجان فروغ پاندا اے عبادتاں دا ذوق ودھ جاندا اے گھراں محلیاں تے مسجداں وچ ہر پاسے ایمانی رنگ و نور دی برسات نظر آندی اے نوافل اذکار دی رغبت ودھ جاندی اے۔تلاوت قرآن پاک دا شغف کئی گناہ ودھ جاندا اے پوری مسلم سوسائٹی اُتے روحانی نظم و ضبط دا ایمان افروز نگ چڑھ جاندا اے۔ سحر خیزی دے لمحے بڑے دل آویز تے افطاری دے مناظر بڑے روحانی تے وجد انگیز ہو جاندے نیں گویا جس طرح موسم بہار دی آمد نال ہر پاسے تازہ پھُلاں تے پتیاں دی وجہ نال رنگ و نور دی برسات نظر آندی اے۔ ایسے طرح رمضان المبارک دی آمد دے نال ای گویا پورا ماحول بدل جاندا اے جس طرح موسم بہار وچ پرندیاں دی چہچہاہٹ تے برگ و گل دی طروات پہلے توں ودھ جاندی اے۔ ایسے طرح رمضان المبار ک دی مبارک تے پرسعید ساعتاں وچ اہل اسلام دے مزاجاں وچ وی نمایاں ایمانی حرارت تے فرق محسوس ہوندا اے پر جے موسم بہار دی آمد ہوئے پر ایس دے باوجود نہ پرانے پتے چھڑن تے نہ ای خشک ٹہنیاں تے درخت سرسز ہون تے نہ ای بوسیدہ پھُل از سر نو شگفتہ ہون تے نہ ای گلشن دی اداسی شادابی وچ ڈھلے تے کیہڑا ایس نوں موسم بہار کہوے گا ایسے طرح جے نیکیاں دی بہار دا موسم یعنی رمضان المبارک دی آمد ہوئے پر نہ مسجداں دی رونق ودھے نہ ای انداز اطوار وچ مثبت تبدیلی آئے نہ انداز کار بدلے نہ دل دی آرزو بدلے تے نہ ای ایمانی حرارت پیدا ہوئے نہ جذبہ مہر و محبت پھلے پھولے تے نہ ای باطن توں چشمہ تسلیم پھوٹے تے نہ ای ظاہر و باطن دا تضاد دور ہوئے تے نہ ای مثبت انقلاب آئے تے سارے مہینیاں تے رمضان وچ کیہ فرق محسوس ہوئے گا جد کہ رمضان سارے مہینیاں دا سردار خدا مہمان مہینہ اے۔ ایس مبارک مہینے نوں شہنشاہِ دو عالم نے صبر تے مواسات دا مہینہ قرار دتا اے آقا ﷺ دا فرمان اے صبر یعنی ضبط نفس تے مواسات یعنی ہمدردی و غمخواری رمضان المبارک نوں صبر دا مہینہ ایس لئی وی ایس مہینے وچ بوہت سارے بشری تے نفسی کمزوری جذبات تے احساسات اُتے قابو رکھنا پیندا اے جے غصہ آئے تے کنٹرول کرنال کرنا اے گالی گلوچ توں پرہیز کرنی اے کیوں جے کنٹرول نہ کرن دی صورت وچ روزہ مکروہ ہو جاندا اے تے جے کوئی دوجا ایس دے صبر نوں آزمانا چاہے ایہنوں مشتعل کرے تے فوری طور اُتے آمادہ جنگ نہیں ہو جانا چاہے کہ ایہہ آداب رمضان دی منافی اے۔ روزہ دار نوں ہر پیر پُٹدے ہوئے ہر گل کردے ہوئے ہر معاملہ کردے ہوئے بوہت محتاط رہنا چاہیدا اے۔ دکان دار افسر ماحت مزدور مالک نوں کوئی وی گل کردے ہوئے بوہت محتاط رہنا چاہیدا اے کہ میں روزے نال واں کیوں جے روزہ دار دے اندر خدا دے حاضر ناظر ہون دا اعتقاد تے یوین ودھادیندا اے کیوں جے صرف اللہ لئی رکھیا جاندا تے اللہ ایس عمل اُتے گواہ ہو جاندا اے تے جدوں روزہ دار صبر تے ضبط نفس دے مشکل مرحلے توں لنگھدا اے اگ برساتی گرمی وچ سخت پیاس دے ساہمنے ٹھنڈے شیریں مشروبات پئے ہون پر روزہ دار کدی بے قابو نہیں ہوندا تے اپنی پیاس اُتے کنٹرول رکھد ا اے بھُک دی انتہا ہوئے تے ہوش اڑا دین والے تے بھُک نوں ہور تیز کرن والے کھانے موجود ہون پر روزہ دار انج دے کئی امتحاناں وچ سرخرو ہوندا اے گرم تے خوشبودار کھانیاں ول ویکھدا وی نہیں ۔ رمضان المبارک نوں مواسات یعنی ہمدردی دا مہینہ وی کہیا جاندا اے اوہ ایس طرح کہ روزے دی حالت وچ انسان بھُک پیاس دی جس شدت تے کیفیت توں لنگھدا اے ایس نال ایس دے اندر دوجیاں دی بھُک پیاس دا احساس ہوندا اے معاشرے دے ایہناں محروم تے غریب طبقیاں دا احساس ہوندا اے کہ میں تے اللہ لئی اج کجھ نہیں کھا رہیا پر وطن عزیز وچ لکھاں لوک روزانہ ایس بھُک تے پیاس توں لنگھدے نیں تاں روزہ دار دے دل وچ ایہناں محروم تے غریب لوکاں دی بھُک پیاس نوں مٹان دا جذبہ پیدا ہوندا اے جیہڑا سارا سال غربت پاروں بھُک پیاس دی تکلیف توں گزردے نیں لہٰذا روزہ دار ایہناں دی مدد تے بھُک پیاس مٹان لئی اپنے مال و دولت نوں لٹان اُتے تیار ہو جاندا اے یقینا ماہ رمضان اک تربیتی کورس اے جس دی تربیت لے کے دوجیاں دی بھُک پیاس مٹان دی کوشش کرنی اے تے نفس دی کمزوریاں اُتے قابو پا کے اک صالح انسان بن کے صالح معاشرے دا حصہ بننا اے۔