الوداع مرد قلندر جنید اکرمؒ الوداع

آصف عنایت

1985ء دے بعد میں جناب ارشد میر پنجابی ادب دا بوہت وڈا ناں دے چیمبر وچ وکالت شروع کر لئی۔ جناب خواجہ جاوید مصروف ترین فوجداری وکیل سن جد کہ جناب ارشد میر ادبی مصروفیات وچ زیادہ وقت دیندے سن۔ شریف کنجاہی، اختر جعفری، بی بی سی دے رضا عابدی، انور مسعود نہ جانے کنج کنج دے نگینے تے نابغہ روزگار لوکاں نال تفصیلاً ملاقاتاں دا موقع ملیا۔ گو کہ ایہناں وچوں بیشتر نال میری ذاتی واقفیت سی پر میر صاحب جیہڑے کہ میرے بزرگ وی سن دے حوالے نال جیہڑا قرب نصیب ہویا اوہ شاید نہ ہو پاندا۔ گوجرانوالہ دی معروف ، انتہائی نیک دل تے بارعب شخصیت جناب میاں محمد اکرم (ڈی ایس پی ریٹائرڈ) دے سب توں نکے پتر جنید اکرم کثرت نال اوتھے تشریف لیاندے، ویکھن ، کہن نوں نوجوان منڈا سی پر شعوری اعتبار نال کوئی اَج دا منجھیا ہویا دانشور وی ایس دا ہتھ نہ چھو سکے۔ گوجرانوالہ دا ماحول تے معاشرت اِنج دی سی کہ جے کسے خاندان دے بزرگ آپس وچ دوست نیں تے پورے خاندان دی دوستی تے بھائی چارہ ہویا کردا سی۔ میاں صاحب اک متقی انسان سن۔ جناب سہیل احمد (عزیزی) ایہناں دے پتر نیں جنہاں دے علاوہ جاوید اکرم بٹ، اورنگزیب بٹ وی ایہناں دے پتر نیں۔ میاںصاحب دے پُتراں وچ جناب سہیل احمد (عزیزی) میرے نکے بھرا ذوالفقار علی بٹ (ڈی ایس پی) دے دوست تے کلاس فیلو سن جد کہ تعلقات دی نوعیت خاندانی بنیاداں اُتے سی۔ ایہو صورت حال گوجرانوالہ دے ہور خانداناں دی سی جویں جناب میاں عبدالستار (سعد اختر انصاری تے وحید اختر انصاری دے والد محترم )، محمد سعید بھٹی، محمد ایوب خان بسرا، حاجی محمد یوسف گلو، رشید احمد پردیسی، چاچا فیضی ، خواجہ عماد الدین دے والد خواجہ محمد یوسف، سردار محمد (داری پہلوان)، معروف بیورو کریٹ جناب سید طاہر شہباز شاہ صاحب ، جناب انور زاہد، خواجہ عبدالمجید راٹھور، اسلم بٹ (میئر)، عبدالرحمن ڈار، جناب غلام نبی کھوکھر (جنہاں دے خاندان نے شہر وچ تعلیمی اداریاں دا جال وچھا دتا)، حاجی آصف نعیم مغل، علامہ عزیز انصاری ، راقم دے والد محترم جناب حاجی عنایت اللہ شہزادہؒ صاحب، سعید الرحمٰن بخاری ، جاوید رحمت بٹ، چودھری محمد اعظم موٹا، شیخ خورشید احمد، شیخ محمد جمیل، طارق جموں والے، پاء جی محمد اعظم بٹ شہیدؒ، بائو محمد یعقوب بٹ تے دوجے اکابرین شہر دے خاندان آپس وچ رشتہ داراں وانگوں رہندے سن۔

جنید اکرمؒ میاں صاحب دے سب توں نکے پتر نیں۔ علمی ادبی حلقیاں وچ بوہت مقبول ہون دی وجہ نال شعوری اعتبار نال اوس ویلے ایہناں دا شمار گوجرانوالہ دے کجھ دانشوراں وچ ہون لگیا۔ ایہناں دے کول دانش تے شعور بنیادی وجہ ددھیال ولوں سماجی، معاشرتی تے پنچایتی رتبہ جد کہ ننھیال ولوں بابائے پنجابی حضرت ڈاکٹر فقیر محمد فقیرؒ دا حضرت جنید اکرمؒ دا نانا ہونا اے۔ جنید اکرم نے اپنے نانا دی لوک وزڈم، پنجابی ادب، تصوف و کشف، فقیری تے درویشی دے نال نال لوک ورثہ نوں اگے ودھایا۔ جناب سہیل احمد (عزیزی) بین الاقوامی شہرت یافتہ شخصیت نیں ایہناں دے بڑے فین نیں جد کہ پروفیسر جنید اکرمؒ دی شخصیت توں علمی، ادبی، سماجی ، صوفیاء دے حلقے بخوبی واقف ای نہیں معترف وی نیں۔ کہیا جا سکدا اے کہ جناب سہیل احمد (عزیزی) دے پوری دنیا وچ پرستار نیں تے جنید اکرمؒ دے نیابت دار، مقلدین تے ادبی مقتدین لاتعداد نیں۔ لڑکپن دی ملاقاتاں توں بعد جویں زندگی دے رستے اپنے بہائو وچ بہا لئے جاندے نیں۔ خیالاں وچ وسن والے خواہشاں دی صورت اختیار کر جاندے نیں۔ دوست احباب تے عزیزو اقارب تے درکنار بندے دی اپنی شخصیت نال ملاقات نہیں ہو پاندی۔ اَکھ کھلدی اے تے والاں دی چاندی، چہرے اُتے جھریاں تے شریر کمزور ہو چکیا ہوندا اے۔ ایس دوران غمی، خوشی، شادی، بیاہ اُتے تے ملاقاتاں رہندیاں نیں پر حقیقی احوال دا پتہ نہیں چلدا۔ البتہ فیس بک نے جتھے سالہا سال توں وچھڑے ملا دتے۔ اوتھے جنہاں نال روزانہ ملدے سی اوہ وی فیس بک تے وٹس ایپ اُتے آ گئے۔ جناب جنید اکرمؒ نال ملاقاتاں تے ہوندیاں رہیاں پر کیہ گل کراں کدی شائبہ تیکر نہ ہون دتا کہ اوہناں دی طبیعت کیسی اے؟آپ ذکر نہ کیتا تے اتفاق نال کسے دوست نے وی ذکر نہ کیتا اک دن میں فیس بک اُتے اوہناں دی پوسٹ پڑھی ’’جا او تیری دسمبر اج بارہ ورھے ہو گئے ڈائیلسز کرواندیاں‘‘میں فوراً فون کیتا تے کہیا کہ میں اپنی کوتاہی اُتے معافی چاہنا واں تے تہانوں ملن آ رہیا واں۔ بیماری دا پچھیا، اوہناں نے کہیا کہ میں بالکل نارمل زندگی لنگھا رہیا سی۔ اک دن گڈی اُتے شاید مسز وی نال سن کدھرے باہر نکلیا ہویا سی، طبیعت خراب محسوس ہوئی۔ قریبی ہسپتال گیا۔ اوتھے ڈاکٹر واقف سن۔ ہسپتال اپڑن دا تے پتہ اے پر مینوں جدوں بارہویں دن ہوش آیا تے سہیل احمد میرا فرشتہ صفت بھرا فرش اُتے بیٹھا ہویا سی۔ ایہناں بارہ دِناں دے دوران جناب سہیل احمد (عزیزی) نے کوئی ڈاکٹر چھڈیا نہ کوئی درگاہ، مسجد چھڈی نہ کوئی درویش۔ اپنے بھرا دی زندگی لئی فریاد تے کوشش وچ دل و جگر تے مال و جان بہا دتا۔میری زندگی تے بچ گئی پر ڈائیلسز اُتے آ گیا۔ اللہ کریم زندگی دیوے سہیل احمد (عزیزی) جہے وڈے بھرا سلامت رہن بلکہ ہر خاندان دا سہیل احمد عزیزی سلامت رہوے۔ حضرت جنید اکرمؒ اللہ دے شکر گزار بندے نیں جنہاں دے وصال نال ساڈی معاشرت اک درویش، صاحب کشف و کرامات، تصوف و صبر، استقلال و استقامت، ذکر و شکر، عظمت و عاجزی دی پیکر عظیم ہستی توں محروم ہو گئی۔ روایات دا امین، حقیقی دانشور، لاجواب ادیب، پنجابی ادب دا استعارہ، اللہ کریم تے ایس دے بندیاں دا شکر گزار ، عاشقان رسول ﷺ دا قدر دان، حقیقی عاشق رسول ﷺ، دکھاں وچ شکر گزاری جس دا تکیہ کلام رہیا۔ دوستاں تے لوکاں نوں جوڑن والا، مہمان نواز، سجناں دا راجا، لمبے عرصے بیماری وچ وی تندرستاں توں زیادہ معاشرے و معاشرت، انسان تے انسانیت، ادب و ثقافت، تمدن روایات تے خصوصاً ماں بولی پنجابی دی خدمت ، صبر تے شکر دے نال اللہ دی نعمتاں دا ذکر کردے ہوئے وصال ہویا۔ انا للہ و انا الیہ راجعون۔ رب العزت بغیر حساب کتاب دے جنت وچ داخل فرمائے۔ لواحقین تے احباب نوں صبر عطا فرمائے۔ محمد جنید اکرمؒ ورگا متقی، درویش، صابر، شکر گزار تے پرعزم مومن ، میں کوئی دوجا نہیں ویکھیا۔ ایہناں دے وصال نال احباب دا وسیع حلقہ غم وچ ڈب گیا جنہاں وچ ڈاکٹر اعجاز خاور خواجہ ،زاہد حسین خان (ہیرو) ، ڈاکٹر گل ریز محمود خان، زبیر میر، اسد بٹ، ذوالفقار بٹ (ڈی ایس پی)، بابر جاوید ڈار، ثمینہ زریں صدیقی ایڈووکیٹ، فہیم طارق ، آغا سہیل، معروف دانشور جناب محمد سلیمان کھوکھر ، خواجہ ندیم ریاض سیٹھی، جناب حافظ انجم سعیدایڈووکیٹ، چوہدری محمد بشیر وڑائچ، طاہر مسعود گل، ارشد رؤف ، راحیل رحمت بٹ جد کہ بے شمار لوک جنہاں نے مینوں فون کیتے۔ نمازہ جنازہ وچ جناب مقصود احمد بٹ (روزنامہ جنگ) ، پروفیسر و کالم نگار جناب توفیق بٹ، جناب فاروق ڈار (ڈالرایسٹ)، جناب گلزار احمد بٹ (سپرنٹنڈیٹ جیل) ، ذوالفقار بٹ (ڈی ایس پی)، نواز انجم (اداکار) سید مراد حیدر کاظمی ، سیاسی مذہبی ، کاروباری ، غرض ایہہ کہ ہر شعبہ زندگی توں لوکاں نے دردمندی دے نال شرکت کیتی جد کہ پنجابی زبان، ثقافت، تمدن تے ادب دی چلدے لمحے وچ پہچان جناب مدثر اقبال بٹ تے ایہناں دی روزنامہ بھلیکھا و بھلیکھا ٹی وی دی ٹیم جنہاں وچ رضوان اصغر بٹ، بلال مدثر بٹ، ندیم رضا نمایا طور اُتے غمزدہ نظر آ رہے سن تے جناب جنید اکرمؒ بٹ دی نماز جنازہ دی کوریج کر رہے سن۔ سارے احباب آپ تے ایہناں دے خاندان غمزدہ تے اداس نیں۔ جنید اکرمؒ نے بزم فقیر دے ناں توں اک ادارہ بنایا جس دی وساطت نال اردو تے پنجابی دی ہر موضوع اُتے سو دے نیڑے کتاباں شائع کیتیاں جد کہ آپ متعدد کتاباں دے مصنف سن۔ لدھیانہ بھارت وچ ایہناں دی کتاباں دے گرومکھی وچ تراجم ہوئے۔جنید اکرمؒ دا اللہ دی رضا نال وصال ہویا، دنیا توں رخصت ہوئے، دنیا دے جمیلیاں توں مکتی ملی پر ایہناں دا علمی، ادبی، شعوری، فکری سفر ایہناں دے کم، دوست، احباب تے لواحقین دیاں زندگیاں دی صورت وچ جاری رہوے گا۔ الوداع مرد قلندر جنید اکرمؒ الوداع۔