ضیا شاہد۔۔۔ ملکی صحافت دی اِک یونیورسٹی

مرحوم ضیاء شاہد اک سچے محبت وطن قلم کار سن، جیہڑے اپنے ملک نال قلبی محبت رکھدے سن

تحریر اکرم عامر سرگودھا

ضیاء شاہد دی وفات دی خبر شعبہ صحافت نال وابستہ ہر بندے نوں ایس طرح لگی جویں ایہناں دا کوئی عزیز دنیا توں رخصت ہو گیا ہوئے کیوں جے ضیا شاہد ملکی صحافت وچ یونیورسٹی دی حیثیت رکھدے سن، جنہاں دی تربیت یافتہ قلم کار اج وڈی تعداد وچ ملک دے پرنٹ و الیکٹرانک میڈیا دے سرخیل سمجھے جاندے نیں ۔ مرحوم نے اپنی زندگی دا لمبا حصہ صحافت تے شعبہ صحافت نال وابستہ قلم دے مزدوراں دی حوصلہ افزائی کردے ہوئے لنگھایا۔ ضیاء شاہد مرحوم صحافت دے ہر پہلو نشیب و فراز توں بخوبی واقف سن، اوہ خبر تے خبریت نوں پرکھن دی صلاحیت رکھدے سن، ایہہ ایہناں دناں دی گل اے جدوں راقم شعبہ صحافت وچ طفل مکتب سی تے لہور توں شائع ہون والے کسے اخبار نال وابستہ ہون دی کوشش وچ سی، ایسے سلسلے وچ 2 دسمبر 1990 نوں 41 جیل روڈ اُتے روزنامہ پاکستان دے دفتر وچ میری ستار چوہدری جیہڑے کہ 25 دسمبر 1990نوں منظر عام اُتے آن والے روزنامہ پاکستان دے انچارج نمائندگان سن، وساطت نال ضیاء شاہد صاحب نال پہلی ملاقات ہوئی، کافی دیر سوال جواب توں بعد ضیاء شاہد صاحب نے مینوں اپنے زیر ادارت 23 دن بعد منظر عام اُتے آن والے روزنامہ پاکستان وچ سرگودھا توں نامہ نگار رکھ لیا تے نال تلقین وی کیتی ادارہ نوں حقائق اُتے مبنی خبراں بھجوانیاں نیں تے جے کسے مظلوم دے نال کوئی زیادتی ہوئے تے ظالم چاہے کنہا وی بااثر کیوں نہ ہوئے ایس دی خبر (سٹوری ) ادارہ نوں ضرور بھجوان ، ظالم نوں کیفر کردار تیکر اپڑاکے تے مظلوم نوں انصاف دلا کے دم لینا اے، ایس وچ میری (ضیاء شاہد) دی ہر مقام اُتے آپ دی سرپرستی حاصل ہوئے گی، تسیں نکے شہر وچ اپنے آپ نوں تنہا نہ سمجھنا۔
ایس طرح پہلی ای ملاقات وچ ضیاء شاہد نے مینوں اپنا گرویدہ بنا لیا روزنامہ پاکستان دے مالک و مدیر اک سیاسی شخصیت ایم این اے اکبر علی بھٹی مرحوم سن تے میں باہر نکلدے ای سوچ رہیا سی کہ اک سیاستدان تے قلمکار دا ذہن وچ ہم آہنگی کنج ہو پائے گی کیوں جے اخبا ر وچ تے حکومت تے اپوزیشن سنے ہر طبقے دے حق تے خلاف خبراں شائع ہوندیاں نیں تے فیر ایہو ہویا چونکہ ضیاء شاہد تے اکبر علی بھٹو دا مزاج مختلف سی، ایہو وجہ سی کہ ضیاء شاہد نے کجھ عرصے دے بعد ای نمائندگان دے اشتراک نال روزنامہ خبریں دا اجراء کر دتا، ایہہ پہلا اخبار سی جس وچ ہر نکا وڈا نمائندہ شیئر ہولڈر سی، ایس طرح ضیاء شاہد نے شعبہ صحافت وچ جدت پیدا کیتی، فیر پاکستان سنے پوری دنیا نے ویکھیا کہ ضیاء شاہد ہر مقام اُتے مظلوم طبقے دی اواز بنیا تے صحافت نوں نواں رنگ دتا، ضیاء شاہد تے ایہناں دی ٹیم دی رات دن دی محنت نال خبریں کئی شہراں توں شائع ہون لگیا جنہوں ’’جہاں ظلم وہاں خبریں‘‘ دے نعرے نال بوہت زیادہ پذیرائی ملی۔ ضیاء شاہد دی ذہین سوچ نے کئی علاقیاں دی مادری زبان وچ خبراں، خبرون ، جہے کامیاب اخبارات شائع کیتے تے فیر دوپہر دے اخبار دی بنیاد رکھی، جس دے بعد دوپہر دے کئی روزنامے ضیاء شاہد دے اخبار دی تقلید کرن لگے، گو کہ میں ایس ویلے ایہناں دی ٹیم وچ نہیں سی، کیوں جے ضیاء شاہد میرے محسن سن تے ایسے نسبت نال میرا ایہناں دے نال اک لمبے عرصے تیکر تعلق رہیا، میں جدوں وی ایہناں نال رابطہ کیتا تے مرحوم نے اپنے ادارے نال تعلق نہ ہون دے باوجود میری ہر طرح دی راہنمائی دی ضیاء شاہد کہیاکردے سن کہ عزت زلت عروج و زوال صرف خدا تعالیٰ دے ہتھ وچ اے انسان نوں اپنا کم نیک نیتی نال کردے رہنا چاہیدا اے ایس دا صلہ خدا کسے نہ کسے ویلے ضرور دے دیندا اے، ضیاء شاہد نے پرنٹ میڈیا وچ اوہ عروج پایا جیہڑا گھٹ صحافیاں نوں نصیب ہویا، الیکٹرانک میڈیا دا دورہ آیا تے اوہناں نے چینل 5 دی بنیاد رکھ کے الیکٹرانک میڈیا دے ذریعے مظلوم دی اواز ویلے دے حکمراناں تیکر اپڑائی، پرنٹ تے الیکٹرانک میڈیا دے پلیٹ فارم توں ضیاء شاہد نے وقت دے وڈے وڈے فرعوناں نوں للکاریا پر اوہ اپنے اصول توں نہ کدی پچھے ہٹے تے نہ کدی اصولاں اُتے سودے بازی کیتی۔ مرحوم ضیاء شاہد اک سچے محبت وطن قلم کار سن، جیہڑے اپنے ملک نال قلبی محبت رکھدے سن، راقم نال عرصہ پہلاں ملاقات وچ ضیاء شاہد نے باور کرایا سی کہ آئندہ جنگ پانی اُتے لڑی جائے گی تے فیر کجھ مہینے بعد بھارت نے پاکستان دا پانی بند کر دتا جس اُتے وقت دے حکمراناں توں زیادہ ضیاء شاہد پریشان وکھائی دتے تے ایہو وجہ سی کہ ضیاء شاہد نے اپنے چینل اُتے ایس حوالے نال لاتعداد پروگرام تے اخبار اُتے کئی فورم کیتے۔ میرے خیال وچ انڈیا ولوں پانی دی بندش اُتے قلم تے اواز دے ذریعے بھارت دے خلاف سب توں زیادہ احتجاج ضیاء شاہد نے کیتا سی تے آخری دم تیکر مرحوم قلم تے اواز دے ذریعے پسے ہوئے طبقے دی اواز وقت دے حکمراناں تیکر اپڑا کے ایہناں دا ضمیر جھنجھوڑدے رہے، میں ایہناں دی ایتھے کیہڑی کیہڑی خوبیاں تے ملک و قوم لئی خدمات دا ذکر کراں، لکھنا شروع کراں تے قلم دی سیاہی ختم ہو جائے گی پر ضیاء شاہد دی قوم تے ملک لئی خدمات ختم نہیں ہون گیاں۔ضیاء شاہد تے صحافت دے طالب علماں لئی اک یونیورسٹی دی حیثیت رکھدے سن تے ظالم دے خلاف سیسہ پلائی دیوار بن جان والے محب وطن انسان سن جیہڑے پچھلے دناں آسودہ خاک ہو گئے نیں، ایہناں دی وفات نال شعبہ صحافت وچ پیدا ہون والا خلاء مدتاں پوراں نہیں ہوئے گا۔ اللہ پاک مرحوم دی آخری منزل آسان کرے۔ آمین