پنجاب دی آواز چپ ہو گئی

لكهت:تنویر ظہور

لوک گائیکی دے حوالے نال شوکت علی دا ناں اہم اے۔ شروع وچ اوہناں نے اردو غزلاں گائیاں۔ جدوں پنجابی وچ گایا تے اوہناں نوں پنجاب دی آواز کہیا جان لگ پیا۔ ایہ آواز پچھلے دیہاڑے دو اپریل نوں چپ ہو گئی۔ گائیکی دے نال نال شوکت علی نے شاعری وی کیتی تے اوہناں دے دو پنجابی شعری مجموعے چھپے۔ ’’آہلنے‘‘ تے ’’نکواں‘‘ 95 فیصد دھناں اوہناں دیاں اپنیاں ترتیب دتیاں ہوئیاں سن۔ اوہناں دا لکھیا ہویا تے اوہناں دی دھن وچ بنایا ہویا ایہ گانا ہر اک دی زبان اُتے اے۔
کدی تے ہس بول وے
نہ جند ساڈی رول وے
شوکت علی نال رابطہ 1970ء وچ ہویا۔ ایہ ادھی صدی دا قصہ اے۔ اوہناں دے کس کس پہلو نوں بیان کراں۔ میں اوہناں دے اعزاز وچ کجھ تقریباں منعقد کیتیاں۔ دو تن واری اوہ میرے فقیرخانے تے اپنے پُتر عمران شوکت دے نال تشریف لیائے۔ 2017ء وچ میری سوانح حیات میرا عہد جو میں لمحہ لمحہ جیا چھپی۔ اوہدے وچ اک باب شوکت علی بارے وچ اے۔ ایس کتاب دی تعارفی تقریب اشفاق احمد تے بانوقدسیہ دے صاحبزادے اثیراحمد خان نے اپنے والدین دی رہائش گاہ تے کرائی۔ شوکت علی ایس تقریب وچ اپنے پُتر امیر شوکت علی دے نال شریک ہوئے۔ شوکت علی نے ایس موقعے تے اپنے خیالات دا اظہار کردے ہوئے کہیا سی کہ مینوں خوشی ایس گل دی اے کہ مینوں پچھان دین والے تنویرظہور دے اعزاز وچ ایہ تقریب اے۔ ایہ بابرکت محفل دو عظیم شخصیات اشفاق احمد تے بانوقدسیہ دی رہائش گاہ تے ہو رہی اے۔ اشفاق صاحب نے مینوں ہمیشہ محبت دتی اے۔ مینوں مادھو تے جادوگر گائیک کہیا۔ ایہناں الفاظ نے میرے گانے نوں عزت دتی۔ تنویر نے میرے بارے وی لکھیا۔ ایس تحریر وچ میری پوری ترجمانی کیتی گئی۔ اوہ محبت دا مسافر اے‘ اوہنے جو محسوس کیتا‘ دیانت تے سچائی نال لکھ دتا۔ ایہ اعزاز بڑے گھٹ لوکاں نوں حاصل ہوندا اے۔
شوکت علی نے میاں محمد بخش دے کلام سیف الملوک دی دھن بنائی جو اج دنیا بھر وچ رائج اے۔ میاں محمد بخش دا کلام اوہناں نے بھیروی وچ آسان فہم کرکے گایا۔ صوفیاء کرام دی شاعری نوں اوہناں نے اوڑھنا بچھونا بنایا ہویا سی۔ ریٹیگس روڈ نزد داتادربار تے صوفی شاعر شاہ حسین دے ناں توں شاہ حسین کالج دا قیام عمل وچ آیا تے ایتھے پنجابی ادبی مجلس قائم کیتی گئی جہدا سیکرٹری مینوں چنیا گیا۔ 21اپریل 1979ء نوں پنجابی مجلس دی چھترچھاویں شاہ حسین کالج وچ شوکت علی دے نال شام منائی گئی۔ صدارت مسعودرانا نے کیتی۔ ایس محفل نوں لوک سنگیت دا ناں دتا گیا۔ شوکت علی دے نال اک شام مشتاق بٹ ایڈووکیٹ نے منائی جہدا پربندھ میں کیتا۔ ایہدی صدارت اوس ویلے دے سپیکر پنجاب اسمبلی شیخ رفیق احمد نے کیتی۔ شوکت علی کھیتاں تے کھلیاناں دی کھلی فضاواں دے فنکار سن۔ اللہ نے اوہناں نوں بڑی تے اچی آواز عطا کیتی سی۔ اوہناں نے ماہیے‘ ڈھولے‘ ہیر‘ سیف الملوک‘ مرزا صاحباں‘ پنجابی بولیاں تے فصلاں دے گیتاں نوں اوہناں دی اصلی دھناں نال پیش کیتا۔ اوہناں دی بھیروی وچ گائی ہوئی غزل تیرے غم کو جاں کی تلاش تھی تے باگشیری وچ گائی غزل قربتوں میں بھی جدائی کے زمانے مانگے بڑیاں مقبول ہوئیاں۔ شوکت علی دا کہنا سی کہ میں آخری ساہ تک پنجابی صوفی شاعراں دا کلام گاندا رہواں گا۔ پنجابی زبان‘ ثقافت تے لوک گیتاں دے نال شوکت علی دا پیار دکھاوا نہیں سگوں حقیقی سی۔ ایہ گل اوہناں دے ایس یقین دا حصہ سی کہ جس طرح ماں دا احترام ہر انسان تے فرض اے اوسے طرح ماں دی زبان دی خدمت کرنا ہر فنکار دا پہلا فرض اے۔
شوکت علی دا کہنا سی کہ میں دنیا دے کجھ ملکاں وچ اپنے فن دا مظاہرہ کیتا پر میں اپنے وطن وچ مرنا تے ایتھے دفن ہونا چاہنا واں میری خواہش اے کہ میرے دوست احباب جتھے وی ہون‘ اوہ میری موت تے اتھرو ضرور کیرن‘ بھاویں پنج منٹ لئی ای سہی شوکت علی دی ایہ خواہش اوہناں دے دوستاں نے پوری کیتی۔ اوہ ساڈے دلاں وچ ہمیشہ رہن گے۔
شوکت علی دا شعر اے:
دو نیناں دے بوہے کھلے آ جاویں
اک پل تیری یاد نہ بھلے آ جاویں

اپنا تبصرہ گھلو