حفیظ تائب اپنی ذات وچ انجمن سَن
حفیظ تائب نے بطور نعت نگار ایس محاذ اُتے وی حضورﷺ دی سیرت توں استفادہ کردے ہوئے کامیابی نال سفر کیتا
سرور حسین نقشبندی
حفیظ تائب نعت دے حوالے نال پاکستانی ادب وچ نمایاں ترین حوالے دے طور اُتے ہمیشہ جانے جاندے رہن گے۔ نعت دا فن جس سنجیدگی، متانت ، حلم ، بردباری، عجز و انکسار تے دیگر شخصی اوصاف دا تقاضا کردا اے اوہ ایہناں نوں توفیق ایزدی توں نعمت دی صورت ودیعت کیتیاں گئیاں سن جنہاں وچ ویلے دے نال نال بتدریج وادھا ہوندا چلا گیا۔ اک قابل قدر نقاد دا کہنا اے کہ جے تسیں جاننا چاہو کہ نعت کنج دی ہونی چاہیدی اے تے حفیظ تائب دی نعتاں پڑھ لوئوتے جے ایہہ پتہ کرنا ہوئے کہ نعت نگار نوں کنج ہونا چاہیدا اے تے حفیظ تائب نال ملاقات کر لوئو ۔ ایہناں نوں اپنے شعبے وچ جنہی شہرت ملدی گئی اوہنی ای اوہناں دی نیاز مندی وی ودھدی چلی گئی، جنہی وقار وچ بلندی آندی گئی اینا ای انکساری وچ وی وادھا ہوندا گیا، لوکاں دی محبت جویں جویں فزوں تر ہوندی گئی اینا دی تحمل و بردباری وی کئی گنا ودھدی گئی۔ علم و فن وچ جنہا کمال آندا گیا لہجے وچ مٹھاس تے طبیعت دے گداز وچ وی اینا ای وادھا ہوندا گیا۔ صاحب نعت نال منسلک فن نال محبت نے ایہناں وچ دھیمے پن دی انج دی شان پیدا کر دتی سی جیہڑی اصل وچ ایہناں دی اٹھان دا سبب بن دی چلی گئی جنہوں اوہناں نے حقیقی معنیاں وچ اپنی شخصیت تے کردار دا حصہ بنایا۔ عموماً انج ہوندا اے کہ جدوں کسے دا فن وچ مقام بن جائے تے فنکار دی فنی ریاضت گھٹ ہو جاندی اے پر حفیظ تائب ایس معاملے وچ آخری دم تیکر حساس رہے۔ اک اک لفظ نوں ناپ تول کے لکھنا تے ایس دے مزاج توں آشنا ہو کے جدوں تیکر اپنی طبیعت مطمئن نہ ہو جاندی ادوں تیکر ایس حوالے نال سوچدے رہندے۔ ایس لئی ایہناں دی شاعری دے حوالے نال ایہہ مضبوط تاثر پایا جاندا اے کہ ایہناں دے کہے ہوئے مصرعے توں کسے لفظ نوں ہٹا کے ایس دی تھاں کوئی ہور لفظ لان نال شعر دا حسن قائم نہیں رہندا جس نال اندازہ لایا جا سکدا اے کہ اوہ الفاظ دے ممکنہ مترادفات تے متبادل اُتے کس قدر غور و خوض کر کے موزوں ترین لفظ دا انتخاب کردے سن۔ ایسے لئی ایہناں دی شاعری نوں اہل علم وچ معیار دے اعتبار نال نعتیہ ادب وچ حوالے دے طور اُتے پیش کیتا جاندا اے تے ایہناں دے کم نوں نویں نسل مشعل راہ دے طور اُتے ویکھدی اے۔
حفیظ تائب بطور شخصیت دا اک اہم کارنامہ اپنے عہد دے نمائندہ شعراء تے نوجوان لکھاریاں وچ نعت دی تحریک پیدا کرنا وی سی۔اوہناں نے معاصرین غزل گوشاعراں جنہاں وچ احمد ندیم قاسمی جہے نابغہ عصر وی شامل سن نوں نعت ول مائل کیتا۔ غزل گو شعراء وچ نعت کہن دا رحجان پیدا کرنا ایہناں دا اک شاندار کارنامہ اے۔ نعت گوئی دا معاملہ چونکہ بوہت حساس اے ایس لئی بہتیرے شاعرسوئے ادب ہو جان دے خوف نال نعت لکھدے ہوئے گھبراندے سن تے ایس صورت حال وچ اوہ ایس گل نال تسلی دیندے ہوئے کہیا کردے سن کہ نعت تے بارگاہ رسالت وﷺوچ حاضری دی اک صورت اے تے تسیں خود نوں کیوں ایس عظیم نعمت توں محروم رکھدے نیں تے انج پورا عہد تے معاصرین نعت دے نور نال فیض یاب ہوندے چلے گئے۔ ایس دے نال نال اوہناں نے نویں لکھن والیاں دی بھرپور حوصلہ افزائی وی کیتی۔ اوہناں دے کلام نوں نکھارن تے سنوارن وچ اپنا بوہت سارا ویلا صرف کیتا۔ پورے پاکستان توں ایہناں دے کول چھپن والے نعتیہ مجموعات دے مسودیاں دا ہر ویلے ڈھیر لگیا رہندا سی جنہوں اوہ بڑے شوق نال عبادت سمجھ کے ویکھدے سن۔ ایہناں دے دور وچ چھپن والا شاید ای کوئی نعتیہ مجموعہ ہوئے جس وچ ایہناں دے تحسینی کلمات شامل نہ ہون۔ پیشوائیاں دے عنوان نال اوہناں نے درجناں کتاباں اُتے مضامین تے آراء لکھیاں جیہڑیاںہُن علیحدہ توں جمع ہو کے چھپن دے مراحل وچ نیں۔ ایہناں دی شخصیت دا اک نہایت اہم پہلواک انج دی بیماری دے نال لمبا سفر اے جس دے ناں توں ای لوک مایوسی تے کم ہمتی دا بُری طرح شکار ہو جاندے نیں۔ اوہناں نے کینسر دے مرض دے نال کم و بیش اک دہائی دی بھرپور زندگی گزاری۔ ایس وچ ایہناں دے معمولات روزوشب وی رواں دواں رہے، علاج دا سلسلہ وی جاری و ساری رہیا تے احباب دی غمی خوشی وچ وی پوری فعالیت نال شریک ہوندے رہے۔ ایہناں دے معالجین وی ایہناں دی ایس بیماری دے نال پرعزم تے متحرک زندگی اُتے بوہت حیران و ششد ر سن۔ جدوں تیکر بیماری نے ایہناں نوں مکمل عاجز نہیں کر دتا اودوں تیکر اوہ معمولات زندگی وچ مکمل گرم جوشی نال سرگرم عمل رہے۔
حفیظ تائب دی شخصیت دا اک ہور بوہت دلچسپ پہلواوہناںدے مختلف مسالک دے وچکار قابل قبول ہونا وی سی۔ مذہبی شناخت دے حامل لوک زیادہ تر اک خاص حلقے دے نمائندہ بن کے ای اپنی زندگی لنگھاندے نیں پر حفیظ تائب دے حلقہ ارادت وچ سارے مکاتب فکر دے لوک شامل سن تے اوہ ایہناں سب لئی محبت دی علامت سن۔ ایس دے نال نال ایہناں دا عوام و خواس وچ یکساں مقبول ہونا وی حیرتاں دے باب کھولدا اے۔ ایہناں دی نعت نگری دی گونج دا دائرہ اہل علم و ادب، علماء و مشائخ، میڈیا و نشریاتی اداریاں، صحافتی و قلم کار برادری دے نال نال عوامی سطح دے نعت دا ذوق رکھن والے کثیر حلقے تیکر ودھیا ہویا سی جتھے ہر پاسے ایہناں نوں احترام و عقیدت نال ویکھیا جاندا سی۔ ایس سارے دے نال نال اسیں آسے پاسے ویکھنے آں کہ کسے وی شعبے وچ عزت تے مقام پان والیاں دے اپنے اعزا وا قارب تے اہل خانہ نال تعلقات اینے چنگے نہیں رہ پاندے۔ حفیظ تائب نے بطور نعت نگار ایس محاذ اُتے وی حضورﷺ دی سیرت توں استفادہ کردے ہوئے کامیابی نال سفر کیتا۔ ایہناں دی اولاد نرینہ نہیں سی پر اپنی بیٹیاں نال بے پناہ محبت کردے۔ بیٹیاں دے سسرال تے دیگر رشتہ داراں وچ کوئی اِنج دا نہیں سی جنہوں ایہناں نال کسے حوالے توں شکر رنجی ہوئے۔بلاشبہ اج دے دور وچ ایہہ بوہت مشکل مرحلہ اے۔ رشتیاں نوں نبھانا تے ایہناں نوں نال لے کے چلنابہت اوکھا کم اے۔ ایہناں دے نکے بھرا عبدالحمید منہاس ایہناں نوں اپنا مرشد تے رہنما گرداندے نیں۔ ایہناں دے نواسے نعمان تائب بڑی محنت نال ایہناں دے کم نوں کتابی شکل وچ محفوظ بنان دا کم نہایت خوش اسلوبی نال سرانجام دے رہے نیں۔ ایہناں دے نعتیہ کلام دے علاوہ ایہناں دی دیگر شاعری، شخصی و موضوعاتی نظماں تے وطن لئی لکھے گئے نغمات بوہت اثر پذیر نیں جنہاں اُتے بوہت گھٹ توجہ دتی گئی اے۔اپنی ایسے شاعری اُتے مشتمل کتاب ، تعبیر نوں اوہناں نے صحافت وچ بے باکی تے حق گوئی دی علامت مرشد مجید نظامی دے ناں کیتا سی۔ نوائے وقت دے ادبی ایڈیشن وچ اوہ، حمد و نعت کی بہاریں، دے عنوان توں سالانہ جائزہ وی لکھدے رہے جیہڑا بوہت محبت نال پڑھیا جاندا سی جس وچ اوہ پورے سال وچ شائع ہون والی کتاباں دا اک تعارفی خاکہ پیش کردے سن۔ نعت دے طالب علماں تے محققین لئی ایہہ اک حوالے دے طور اُتے ویکھیا تے پڑھیا جاندا سی۔ گویا اوہ شخصی اوصاف تے فنی خصائص دے حسن توازن تےحسین امتزاج وچ گندھے ہوئے بندے سن۔ دعا اے اللہ تعالیٰ ایہناں دے درجات بلند فرمائے تے ایہناں دے عقیدت مند بھائی عبدالمجید منہاس نوں صحت و عافیت عطا کرے جیہڑے اج وی اپنے بھائی دا ذکر کردے ہوئے اشکبار ہو جاندے نیں۔
