23 ویں پارے دا خلاصہ

مولانا محمد الیاس گھمن

سورۃ یٰسٓ
ایس سورۃ نوں قرآن کریم دا دل کہندے نیں ۔ صبح ایس نوں پڑھن نال پورے دن دے کم درست رہندے نیں۔ایہناں آیتاں وچ نص قطعی توں نبی اکرم ﷺ دی نبوت نوں ثابت کیتا جا رہیا اے۔ اللہ تعالیٰ بذات خود حکمت نال لبریز قرآن کریم دی قسم کھا کے فرما رہے نیں کہ (اے میرے محبوب !) تسیں یقینا پیغمبراں وچوں او، تہاڈا منصبی فریضہ بیان کیتا گیا کہ تسیں ایہناں لوکاں نوں ڈرائو جنہاں دے باپ دادیاں نوں پہلے نہیں ڈرایا گیا۔ ایس توں مراد مکہ مکرمہ تے ایس دے مضافات نیں کیوں جے ایتھے حضرت ابراہیم و اسماعیل علیہما السلام توں بعد کوئی نبی مبعوث نہیں ہویا۔ پہلے نبی مکرم ﷺ دی رسالت دا بیان سی۔ اگے تن رسولاں دا قصہ بیان کیتا جا رہیا اے۔ قرآن کریم نے صراحت دے نال نہ تے بستی دا تعین کیتا تے نہ ای رسولاں دے ناواں دا۔ البتہ کجھ روایات وچ بستی دا ناں انطا کیہ تے رسولاں دے ناں صادق، صدوق یا شمعون علیہم السلام دسے گئے نیں۔ اللہ تعالیٰ نے پہلے دو رسولاں نوں گھلیا، لوکاں نے ایہناں دی تکذیب کیتی۔ فیر اللہ تعالیٰ نے ایہناں دی تائید و تقویت لئی تیجے رسول نوں گھلیا پر بستی والیاں نے ایہناں دی گل نہ منی تے تکذیب کیتی۔ فیر حبیب نجار دی ہمدردی تے ایس دی شہادت نوں بیان کیتا۔ ’’رجل ‘‘ دا ناں روایات وچ حبیب بن اسماعیل نجا ر دسیا گیا اے، ایہہ بڑھئی دا کم کردے سن۔ اوہناں نے رسولاں دی دعوت اُتے ایمان قبول کر لیا سی، جدوں اوہناں نے شہر والیاں دا ایہہ حال سنیا کہ اوہ رسولاں دے نال اِنج دا سلوک کر رہے نیں تے اوہ نسدے ہوئے شہر وچ آئے تے قوم نوں ہمدردی دے طور اُتے بڑے احسن انداز وچ سمجھایا کہ رسولاں دی گل من لوئو پر قوم نے ایہناں نوں شہید کر دتا۔ شہادت توں بعد اللہ تعالیٰ ولوں حبیب نجار نوں جنت وچ داخلے دی خوشخبری دتی گئی۔ جنت وچ داخلہ تے حشر نشر توں بعد ہوئے گا، البتہ اللہ تعالیٰ ولوں کجھ نیک لوکاں نوں عالم برزخ وچ جنت دی کجھ نعمتاں عطا کر دتیاں جاندیاں نیں، ایسے نوں دخول جنت توں تعبیر فرما دیندے نیں۔ حبیب نجار نے جنت دی نعمتاں ویکھ کے اظہار افسوس کیتا کہ کاش میری قوم نوں پتہ چل جائے کہ مینوں کنہاں نعمتاں نال نوازیا گیا اے !
فیر جدوں قوم دی سرکشی وچ مزید وادھا ہویا تے اللہ تعالیٰ نے ایہناں دی ہلاکت دا فیصلہ فرما دتا۔ فرمایا کہ سانوں کسے قوم نوں ہلاک کرن لئی اسمان توں فرشتیاں نوں نازل کرن دی لوڑ نہیں بس اک چنگھاڑ ای کافی ہوندی اے چنانچہ اک ای فرشتے نے چیخ ماری تے پوری بستی کلیجے پھٹن دی وجہ نال تباہ برباد ہو گئی۔ فیر قیامت دے دن جس ویلے حساب کتاب دا معاملہ ہو رہیا ہوئے گا کفار اوس ویلے اپنے شرک تے کفر دا انکار کر دین گے۔ اللہ تعالیٰ ایہناں دے منہ اُتے مہر لا دین گے۔ مہر لان دا مطلب ایہہ وے کہ منہ نوں پابند کیتا جائے گا کہ اوہ اپنی مرضی نال نہیں بولے گا۔ ایہناں دے ہتھ تے پیراں نوں قوت گویائی عطا فرمان گے تے ہتھ تے پیر ایہناں دے خلاف گواہی دین گے کہ اوہناں نے فلاں فلاں جرم تے گناہ کیتے سن۔ قرآن کریم وچ دوجی تھاں اے کہ اوہ تعجب نال اپنے اعضاء نال مخاطب ہو کے کہن گے کہ تسیں ساڈے خلاف گواہی کیوں دتی؟ ایس دے بعد اللہ تعالیٰ فرما رہے نیں کہ اسیں پیغمبر ﷺنوں شاعری سکھائی تے نہ ای شاعری آپ دے شایان شان اے۔ فیر مشرک دی حماقت نوں بیان کیتا مکہ مکرمہ وچ عاص بن وائل اک مشرک سی۔ ایس نے اک بوسیدہ ہڈی لئی، ایس نوں ریزہ ریزہ کر دتا فیر رسول اکرم ﷺ نوں کہیا: کیہ قیامت دے دن اللہ تعالیٰ ایس نوں وی زندہ کرے گا؟ تے اللہ تعالیٰ نے فرمایا اوہ اپنی پیدائش نوں بھُل گیا؟ اسیں انسان نوں اک نطفے نال بنایا اے جس خدا نے پہلے پیدا کیتا اوہ ای دوبارہ پیدا کرے گا۔ اگے دو درختاں دی مثال دے کے سمجھایا کہ خدا سبز درختاں توں اگ نوں پیدا کردا اے ایس لئی بوسیدہ ہڈی نال دوبارہ پیدا کرنا کیہ مشکل اے؟
سورۃ الصٰفٰت
ایس سورۃ دا ناں ایس دی پہلی آیت توں ماخوذ اے، ایہہ سورۃ مکی اے، ایس وچ اسلام دے بنیادی عقائد توحید و رسالت تے قیامت دا اثبات کیتا گیا اے تے مشرکین دے اک غلط عقیدے ( کہ فرشتے اللہ تعالیٰ دی دھیاں نیں، معاذ اللہ) دی تردید کیتی گئی اے۔ شروع وچ مشرکین دی تردید اے ایتھے اللہ تعالیٰ نے فرشتیاں دی تن قسماں دسیاں نیں۔ قسم اے ایہناں فرشتیاں دی جیہڑے تلاوت کردے نیں ذکر دی۔ایتھے مشرکین دی تردید فرمائی ایس لئی کہ مشرکین مکہ وچوں اک طبقہ ملائکہ دی عبادت کردا سی تے اک طبقہ فرشتیاں نوں اللہ تعالیٰ دیاں بیٹیاں کہندا سی، تے ملائکہ دی قسماں کھا کے ایہہ دسیا کہ معبود برحق صرف اللہ تعالیٰ اے۔ نہ ایس دا کوئی شریک اے تے نہ ای ایہنوں اولاد دی لوڑ اے۔ فیر اہل جنت دا ذکر کیتا کہ اہل جنت نوں رزقِ معلوم ملے گا۔ جنت دے رزق وچ ہلکا جہیا وی شبہ نہیں کہ شاید ملے شاید نہ ملے، نہیں بلکہ یقینا تے دائماً ملے گا۔ دنیا وانگوں نہیں کہ کوئی بندا یقین دے نال نہیں دس سکدا کہ کل مینوں کیہ تے کنہا رزق ملن والا اے۔ جنتی لوک تختیاں اُتے آمنے سامنے بیٹھن گے تے گل بات کرن گے۔ فیر اہل جہنم دا ذکر اے اہل جہنم تے ایہناں دے عذاب دا ذکر اے۔ جہنمیاں نوں زقوم دا درخت جیہڑا نہایت بدبودار، کڑوا اے، بطور خوراک ملے گا۔ اللہ تعالیٰ نے ایس درخت نوں ظالماں لئی ازمائش بنایا اے۔ ایس دے خوشے انج دے ہون گے جویں شیطان دا سر اے فیر اللہ تعالیٰ نے چھ انبیاء (حضرت نوح، حضرت ابراہیم، حضرت موسیٰ، حضرت ہارون، حضرت لوط تے حضرت یونس علیہم السلام) دے قصص تے واقعات نوں بیان کیتا اے۔ نوح علیہ السلام نے اللہ تعالیٰ توں دعا منگی تے اللہ تعالیٰ نے ایہناں دی دعا قبول فرما لئی تے نوح علیہ السلام تے ایہناں دے گھر والیاں نوں دردناک عذاب توں بچا لیا۔ باقی سب ختم ہو گئے۔ طوفان نوح توں بعد زمین اُتے جہیڑی نسلِ انسانی چلی اوہ نوح علیہ السلام دے تن پتراں دی نسل توں اے۔ آپ علیہ السلام دے ایہناں تن پتراں دے ناں ایہہ نیں۔ سام، حام تے یافث۔ حضرت ابراہیم علیہ السلام، حضرت نوح علیہ السلام دے گروہ دے بندے سن، یعنی عقائد اک سن، قوم حضرت ابراہیم علیہ السلام نوں میلے اُتے لیجانا چاہندی سی تے آپ علیہ السلام نے عذر کردے ہوئے فرمایا کہ میں بیمار واں۔ہو سکدا اے حقیقت وچ بیمار ہون یا ایہہ مطلب ہوئے کہ تہاڈے کفر و شرک دی وجہ نال میری طبیعت روحانی طور اُتے خراب اے۔ نہ جان دا مقصد بُتاں نوں توڑنا سی تاکہ ایہناں نوں اپنے بُتاں دی بے بسی داپتہ چل جائے۔ حضرت ابراہیم علیہ السلام دی دعا نال اللہ تعالیٰ نے آپ نوں حضرت اسماعیل علیہ السلام عطا فرمائے۔ آپ نے خواب وچ ویکھیا کہ آپ ایہناں نوں ذبح کر رہے نیں تے پتر توں رائے لئی۔ پتر نے کہیا جو تسیں ویکھیا اے کر لوئو۔ ایہہ اگرچہ خواب سی پر انبیاء علیہم السلام دے خواب وحی ہویا کردے نیں۔ آپ علیہ السلام نے حکم دی تعمیل کیتی پر اللہ تعالیٰ نے جنت تووں مینڈھا گھل دتا، اوہ ذبح ہویا تے حضرت اسماعیل علیہ السلام بچ گئے۔ ایہہ امتحان سی جس وچ حضرت ابراہیم علیہ السلام کامیاب ہوئے۔ حضرت یونس علیہ السلام نینوا بستی وچ مبعوث ہوئے اپنی قوم نوں توحید دی دعوت دتی پر قوم نے نہ منیا۔ آپ علیہ السلام نے فرمایا تن دن توں بعد عذاب آئے گا تے آپ خود ایس بستی توں حکم خداوندی دے آن توں پہلے چلے گئے۔ قوم نے گڑ گڑا کے توبہ کیتی تے اللہ تعالیٰ نے عذاب ٹال دتا۔ آپ علیہ السلام کشتی وچ سوار ہوئے، کشتی بھنور وچ پھس گئی، قرعہ اندازی وچ آپ دا ناں آیا۔ پانی وچ گئے تے مچھلی نے منہ وچ لے لیا فیر کج ویلے یا دناں بعد باہر کڈ دتا۔ کجھ لوکاں نے عصمتِ انبیاء دے خلاف گل کردے ہوئے کہیا کہ آپ علیہ السلام نے فریضہ نبوت وچ کوتاہی کیتی، معاذ اللہ۔ ایس دے بعد مشرکین مکہ دی اک وار فیر تردید کیتی جا رہی اے کہ ایہہ کنج دا انصاف اے کہ اپنے واسطے تے کُڑیاں نوں پسند ای نہیں کردے، شرم دے مارے زندہ دفن کر دیندے نیں جد کہ اللہ تعالیٰ لئی دھیاں ثابت کردے او۔ حالانکہ اللہ تعالیٰ نوں نہ پتراں دی لوڑ اے نہ دھیاں دی۔ اللہ تعالیٰ ایہناں شیواں توں پاک تے منزہ نیں۔ آخر وچ فیر مشرکین و منکرین دی تردید فرمائی۔ مشرکین نے کہیا سی کہ فرشتے اللہ دیاں دھیاں نیں، ایس دی تردید وچ فرمایا کہ اللہ تعالیٰ پاک اے۔
سورۃص
جناب نبی کریم ﷺ نال مشرکین مکہ دے مذاکرات تے فیر ایہناں دی ناکامی دا ذکر اے جناب ابوطالب نبی اکرم ﷺ دے نال رشتے داری دا حق نبھاندے سن۔ ایہناں دی آخری عمر وچ مشرکین ایہناں دے کول آئے تے کہیا کہ آپ اپنے بھتیجے (محمد ﷺ) نوں کہو کہ اوہ ساڈے بُتاں نوں بُرا بھلا نہ کہن تے اسیں ایہناں نوں ایہناں دے دین اسلام اُتے چلن توں منع نہیں کراں گے۔ جدوں جناب ابوطالب نے نبی اکرم ﷺ نال ایہہ گل کیتی تے آپ ﷺ نے فرمایا میں ایہناں نوں اک انج دے کلمے دی دعوت نہ دیواں کہ جس نال پورا عرب و عجم ایہناں دے ساہمنے سرنگوں ہو جائے؟اوہناں نے نے پچھیا اوہ کلمہ کیہ اے؟ آپ ﷺ نے کلمہ توحید پیش کیتا تے اوہناں نے کہیا کہ تعجب اے کہ اسیں سارے خداواں نوں چھڈ کے اک خدا دی عبادت کریئے، ایہہ ساڈے توں نہیں ہو سکدا۔ ایس اُتے اوہ سارے لوک چلے گئے۔ ایس موقعے اُتے سورۃ ص دی ابتدائی آیتاں نازل ہوئیاں۔ فیر حضرت دائود علیہ السلام دا ذکر کیتا حضرت دائود علیہ السلام توں کوئی اجتہادی لغزش ہو گئی سی۔ اللہ تعالیٰ نے دو بندے گھلے جیہڑے دیوار پھلانگ کے حضرت دے کول گئے۔حضرت دائود علیہ السلام اوس ویلے اپنی عبادت گاہ وچ سن۔ اوہناں نے اپنے جھگڑے دا مقدمہ پیش کر کے فیصلہ چاہیا۔ حضرت دائود علیہ السلام نے ایہناں دا فیصلہ فرمایا پر ایس دے نال ای حضرت دائود علیہ السلام نوں اچانک خیال آیا کہ میرا تے امتحان ہو گیا، فوراً اللہ تعالیٰ توں معافی منگی تے سجدے وچ ڈگ گئے، ایتھے کجھ آیتاں وچ ایس واقعے نوں بیان فرمایا گیا اے۔ لغزش کیہ ہوئی سی؟ قرآن کریم ایس معاملے وچ چپ اے۔ ایس لئی سانوں وی کھود کرید کرن دی لوڑ نہیں، فیر حضرت سلیمان علیہ السلام دا ذکر اے حضرت سلیمان علیہ السلام نے جنگ وجہاد لئی عمدہ قسم دے گھوڑے رکھے ہوئے سن، اک دن آپ نے ایہناں گھوڑیاں دا معائنہ کیتا تے اینے مشغول ہوئے کہ نماز عصر قضا ہو گئی۔ آپ نوں بوہت افسوس ہویا، فرمایا ایہناں گھوڑیاں نوں دوبارہ لیائو! فیر اللہ تعالیٰ لئی ایہناں نوں قربان کر دتا۔ فیر حضرت سلیمان علیہ السلام دی حکومت دا ذکر اے کہ اللہ تعالیٰ نے ایہناں نوں ہوائواں، پرندیاں تے جناں اُتے حکومت عطا فرمائی سی، فیر حضرت ایوب علیہ السلام دا ذکر کیتا حضرت ایوب علیہ السلام نوں اک بیماری لاحق ہوئی سی، ایتھے ایہناں دی شفا دا بیان اے۔ آپ نے حکم خداوندی توں زمین اُتے پیر ماریا تے چشمہ جاری ہویا۔ اللہ تعالیٰ نے فرمایا کہ ایس نال نہائو تے ایہنوں پیو۔ صحت مل گئی۔بیماری دی حالت وچ اک وار شیطان حضرت دی اہلیہ نال ملیا کہ میں طبیب واں آپ دے شوہر داعلاج کراں؟ گھر والی نے حامی بھر لئی۔ شیطان نے کہیا میری اک شرط اے کہ جدوں ٹھیک ہو جائو تے آپ نے کہنا اے کہ ایس طبیب نے ایہنوں شفا دتی اے۔ حضرت ایوب علیہ السلام نوں ایہہ واقعہ سنایا تے آپ نوں غصہ آیا کہ اوہ تے شیطان سی۔ آپ علیہ السلام نے قسم کھادی کہ ٹھیک ہو گیا تے تینوں سو چھڑیاں ماراں گا جدوں صحت یاب ہوئے تے پریشان سن کہ قسم پوری کرنا واں تے وفادار بیوی نوں تکلیف ہوئے گی نہیں کردا تے حانث ہونا واں۔ اللہ تعالیٰ نے فرمایا اک سو نکی نکی لکڑیاں دا اک گٹھا لے کے اک ای وار اپنی بیوی نوں مار دیو، قسم پوری ہو جائے گی۔
سورۃ الزمر
ایس سورۃ دے آخر وچ دو گروہواں دا ذکر اے تے زمر دا معنی گروہ اے۔ ایسے مناسبت نال ایس دا ناں ’’الزمر‘‘ رکھیا گیا اے۔ سب توں پہلے مشرکین دے غلط عقیدے دی تردید فرمائی مشرکین ایہہ من دے سن کہ کائنات نوں بنان والے اللہ تعالیٰ نیں۔ پر اوہ بُتاں تے فرشتیاں دی عبادت تے پوجا پاٹ کردے ایس نظریے نال کہ ایہہ خوش ہو کے سانوں اللہ تعالیٰ دے نیڑے کر دین گے تے اللہ تعالیٰ دے ہاں ساڈی سفارش کرن گے۔ ایتھے آخر وچ فیر ایہناں دی تردید کیتی گئی اے کہ عبادت تے خالص اللہ تعالیٰ دا حق اے تے شفاعت لئی دو شرطاں نین: شفاعت کرن والا، اللہ دے کول مقبول ہوئے تے جس دی شفاعت ہونی اے اوہ قابل مغفرت ہوئے۔ ایتھے دونویں شرطاں مفقود نیں تے اوہ سفارش کنج کرن گے؟ ایس پارے وچ اللہ تعالیٰ فقیہہ دی عظمت نوں بیان فرما رہے نیں اللہ تعالیٰ جدوں کسے بندے دا سینہ اسلام لئی کھول دیندے نیں تے اوہ بندا اللہ تعالیٰ ولوں خاص نور تے روشنی اُتے ہوندا اے۔ جدوں ایہہ آیت نازل ہوئی تے صحابہ کرام رضی اللہ عنہم نے پچھیا: یا رسول اللہ ! شرح صدر دا کیہ معنی اے؟ رسول اکرم ﷺ نے فرمایا کہ اللہ ایس بندے دے قلب نوں وسیع فرما دیندے نیں یعنی احکام شریعت نوں سمجھنا فیر ایہناں اُتے عمل کرنا ایس بندے لئی آسان ہو جاندا اے۔صحابہ کرام رضی اللہ عنہم نے ایس دی نشانی پچھی تے فرمایا: جنت ول انسان دا رجوع ہوندا اے، دنیا دے دھوکے توں بچدا اے تے موت دے آن توں پہلے موت دی تیاری کردا اے۔ آخر وچ موحد و مشرک دی مثال بیان کیتی اے: اک غلام مختلف آقائواں دی ملکیت وچ ہوئے تے ہر آقا ایہنوں اپنا اپنا کم کہے تے اوہ غلام پریشانی وچ مبتلا ہوندا اے کہ کس دا کہیا مناں؟ دوجا اوہ غلام اے جیہڑا صرف اک ای آقا دی ملکیت اے ایہنوں کسے قسم دی پریشانی نہیں ہوندی۔ ایسے طرح مشرک کئی خدائواں نوں من دا اے ہن اوہ پریشان اے کدی ایس دے ساہمنے جھکیا ہویا اے تے کدی اُوس دے ساہمنے جھکیا ہویا اے ، ایس نوں یکسوئی میسر نہیں آندی جد کہ موحد صرف اک اللہ تعالیٰ دی عبادت کردا اے، ایسے دی اطاعت کردا اے، ایہنوں یکسوئی حاصل اے۔

اپنا تبصرہ گھلو