2019ء دی رخصتی

لکھت:ڈاکٹر اخترشمار

شام نگر دے ساڈے گوانڈھی بشیر کتیاں والا نال بڑے دناں بعد ملاقات ہوئی۔ علیک سلیک دے بعد میں پچھیا اج کل تہاڈا کتے ویچن دا کاروبار کیویں چل رہیا اے؟ تے جھٹ بولیا! سر لوکاں نوں اپنی روٹی پوری نہیں ہوندی تے کتیاں نوں کتھوں کھوائیے! پہلاں عام لوک وی میرے کولوں کتورے خرید لیندے سن۔ نسلی کتورا پنج ہزار تک فروخت ہو جاندا سی ہن تے خود میرے لئی وی کتیاں دی خوراک پوری کرنا مشکل ہو گئی اے۔ میں کرائے دے مکان وچ رہنا آں۔ ہن بجلی تے گیس دے بل وی پورے نہیں ہوندے مہنگائی نے مت مار رکھی اے۔ بس کوئی حال نہیں۔ تسیں سناؤ کیسی گزر رہی اے تسیں تے ایس علاقے نوں بھل گئے او۔ سنیا اے بحریہ ول جا بیٹھے او۔
میں آکھیا بس ایہ تبدیلیاں تے ہوندیاں رہندیاں نیں تسیں سناؤ! جے کتیاں دا کم ٹھپ کیتا اے تے فیر کیہ کردے او؟ میرا مطلب اے گزر بسر کیویں ہوندی اے؟
بشیر بولیا! سچی دساں۔ میں تحریک انصاف نوں ووٹ دتا سی۔ ہن وی میری ہمدردیاں عمران خان دے نال نیں الیکشن دے دناں وچ تبدیلی دے نعرے لا لا کے میرا وی گلا بیٹھ جاندا اے۔ الحمد للہ حکومت تے ساڈی پارٹی دی آ گئی اے پر…
پر کیہ میں پچھیا! تے ہولی جہیا بولیا! ہن کیہ دساں جی میں شیلٹر ہوم وچ شفٹ ہون دا سوچ رہیا آں دو راتاں بطور تجزبہ گزار کے ویکھیاں نیں۔ ساڈے لیڈر نے گھٹ توں گھٹ بے گھر پردیسی تے مفلوک الحال لوکاں لئی کجھ تے کیتا اے۔ اوتھے بستر ملدا اے کھانا ملدا اے گھر میرا پہلاں ای کرائے دا اے۔ شادی میں نہیں کیتی۔ بڈھی ماں سی پچھلے محرم وچ اللہ نوں پیاری ہو گئی ہن میرا کیہ اے؟ میرے لئی تے گھر دا کرایہ، بجلی تے گیس دے بل دینا اوکھا ہو گیا اے۔ میرے توں ودھ شیلٹر ہوم دا کون مستحق اے۔ تحریک انصاف وچ میرا اک مقامی لیڈڑ بہت خیال کردا اے اوہدی وساطت نال جلد ای شیلٹر ہوم وچ شفٹ ہو جاواں گا۔
میں آکھیا بشیرے گل تے تیری ٹھیک اے۔ بجلی تے گیس دے بل اگلے مہینے 15فیصد ہور زیادہ آیا کرن گے۔ بجلی تے گیس دی قیمتاں وچ پندرہ فیصد وادھا ہون والا اے۔ ہن لوک کتھے جان گے؟ ۔ ایس سردی وچ گیس آندی نہیں بس بل باقاعدگی نال آندا اے۔ پٹرول مہنگا ہو گیا۔ کھان پین دیاں شیواں وی بہت مہنگی ہو چکیاں نیں۔ سنیا اے ہن راشن کارڈ دا نظام وی لیایا جا رہیا اے ہن تے ہر عام بندہ عافیت گاہواں یعنی حکومت دے بنائے گئے شیلٹر ہومز وچ شفٹ ہونا پسند کرے گا۔
افسوسناک گل ایہ اے کہ ساڈے ایتھے 50کروڑ تک کرپشن کسے حد تک جائز قرار دتی جا چکی اے آرڈیننس دے راہیں نیب نوں 50کروڑ کرپشن کرن والیاں نوں پھڑن دی اجازت نہیں ہووے گی، ایس ویلے نیب دے گرفتار کیتے جان والے تقریباً سارے سیاستدان تے بیورو کریٹ چھٹ جان گے۔ ایہ ٹھیک اے کہ 50کروڑ دی کرپشن لئی ایف بی آر ایف آئی اے یاں عدالتاں کم کرن گیاں تے عام بندہ تے ایہناں عدالتاں توں سزا پاندا اے پر وڈے لوک تے پیسے والے ہن وکیل کرن دے بجائے جج کر لیندے نیں اوہ آسانی نال بچ نکلن گے۔ ایہ تاثر اے۔ کرپشن تے چوری چاہوے دھیلے دی ہووے اوہ جرم اے تے ایہدی سزا ضروری اے۔ سزا توں بچان لئی نظام بنانا کوئی مستحسن فیصلہ نہیں۔
کیوں بشیرے توں کیہ کہنا اے؟
بشیر کتیاں والا بولیا: سر گل تے تہاڈی وی دل نوں لگدی اے پر مینوں تے چھت چاہیدی اے، مفت خوراک وی جے اوہ عمران خان مینوں دے رہیا اے تے تسیں وی جان دیو ایہ کہہ کے اوہنے چادر دی بکل ماری تے سلاماںلیکم کہہ کے رخصت ہو گیا۔
میں اوہنوں جاندا ہویا ویکھ رہیا سی انج لگ رہیا سی 2019رخصت ہو رہیا اے۔