عالمی یوم ماحولیات اُتے اسلام آباد اندر عشرہ بحالی ایکو سسٹم 2021 تا 2030 دا افتتاح

ایس اہم سسٹم دا افتتاح اقوام متحدہ دے سیکرٹری جنرل انتوینو گوتریس تے
وزیراعظم عمران خان دے ہتھوں کروایا گیا

بلال مدثر بٹ

عالمی یوم ماحولیات دے موقعے اُتے پاکستان نے میزبان ملک دی حیثیت نال اقوام متحدہ دے عشرہ برائے ایکو سسٹم بحالی دا باضابطہ افتتاح کر دتا۔ وزیراعظم عمران خان نے اسلام آباد وچ عالمی یوم ماحولیات دی مرکزی تقریب وچ ایس دا افتتاح کیتا۔ اقوام متحدہ دے پلیٹ فارم توں ایکو سسٹم بحالی دی دہائی نوں ورچوئل تقریب وچ لانچ کیتا گیا۔ اقوام متحدہ دے سیکرٹری جنرل انتونیو گوتریس نے ایس تقریب نال خطاب کیتا جس وچ وزیراعظم عمران خان تے دیگر عالمی رہنما وی شامل ہوئے۔ ایس تقریب نوں مختلف ذرائع ابلاغ توں پوری دنیا وچ براہ راست نشر کیتا گیا جرمنی دی چانسلر انجیلا مرکل، وزیراعظم بارباڈوس میاٹلے، چیئر پرسن افریقی یونین تے عالمی شخصیات دے پیغامات پڑھے گئے۔ ایگزیکٹو ڈائریکٹر یو این انوائرمنٹ پروگرام اینگر اینڈرسن نے قدرتی ماحول دے تحفظ تے بحالی دی کوششا ں وچ پاکستان دے قائدانہ کردار دی تعریف کیتی اے۔
اسلام آباد وچ پاکستان دی میزبانی وچ عالمی یوم ماحولیات دی مرکزی تقریب نال خطاب کردے ہوئے وزیراعظم عمران خان نے افسوس دا اظہار کیتا کہ پاکستان اونھاں ملکاں دی لسٹ وچ شامل اے جتھے ماحولیاتی تبدیلی اُتے کدی توجہ نہیں دتی گئی جد کہ کرونا وائرس وانگوں ماحولیاتی تبدیلی دے اثرات نال کسے خطے کسے حدود نوں محفوظ نہیں رکھیا جا سکدا۔ اوہناں نے کہیا کہ ساڈی حکومت آن توں پہلے تیکر پاکستان دی تاریخ وچ صرف 64 کروڑ درخت لائے گئے جدوں خیبر پختونخوا وچ پی ٹی آئی دی حکومت بنی تے اک ارب درخت لان دا فیصلہ کیتا تے ایس توں پہلے کدی کسے حکومت نے انج دا منصوبہ تشکیل نہیں دتا سی۔ وزیراعظم نے کہیا کہ اسیں خیبر پختونخوا وچ پنج ورہے دے اندر اک ارب درخت لائے۔ عمران خان دا کہنا سی کہ ساڈی نظراں دے ساہمنے ملک دے جنگلات نوں ختم کیتا گیا۔ جنگلات دی زمیناں اُتے قبضے کر لئے گئے تے اودوں کسے حکومت نوں کوئی فکر لاحق نہیں سی۔ وزیراعظم عمران خان نے کہیا کہ سانوں اک موقع ملیا کہ اسیں آئندہ 10 ورھے دے دوران ایکو سسٹم نوں بہتر کر لئیے۔ عمران خان نے کہیا کہ اک پاسے ہوس اے تے دوجے پاسے انسانیت تے جدوں ایہناں دے وچکار توازن برقرار نہ رہوے تے کنزیومرازم دی وجہ نال انسانیت نوں نقصان اپڑدا اے۔ اوہناں نے کہیا کہ پاکستان وچ کاربن ڈائی آکسائیڈ دا اخراج اک فیصد توں وی گھٹ اے۔ وزیراعظم نے اقوام متحدہ دے سیکرٹری جنرل دا حوالہ دے کے کہیا کہ اوہناں نے ماحولیاتی تبدیلی پاروں آبی وسائل دی کمی ول اشارہ کیتا تے اج اسیں ویکھنے آں کہ ساڈے ملک وچ صوبے اک دوجے اُتے پانی چوری دا الزام لاندے نیں۔ اوہناں نے کہیا کہ ساڈا 80 فیصد پانی گلیشئر توں آندا اے تے ماحولیاتی تبدیلی پاروں ساڈے گلیشیئر متاثر ہو رہے نیں۔ ایہناں دا کہنا سی کہ کرونا وبا توں اک فائدہ ایہہ ہویا کہ دنیا نوں پتہ چل گیا کہ اوہ اک دوجے توں الگ نہیں، صرف سرحد بند کر دین نال سارے معاملات ٹھیک نہیں رہندے۔ وزیراعظم عمران خان نے کہیا کہ کرونا وائرس وانگوں ماحولیاتی تبدیلی دے اثرات کسے سرحدی حد بندی توں آزاد نیں۔ اوہناں نے کہیا کہ گلوبل وارمنگ دی وجہ نال بالخصوص اوہ ملک جنہاں دے آبی وسائل گلیشیئر نال جڑے نیں اوہ زیادہ متاثر ہون گے تے پاکستان ایہناں وچ شامل اے۔ اوہناں نے کہیا کہ 10 ارب وچوں اک ارب درخت لان دا منصوبہ کامیابی نال ہمکنار ہو چکیا اے جد کہ 9 ارب درخت لان لئی پوری قوم نوں ایس دا احساس کرنا ہوئے گا۔
تقریب نال ورچوئل خطاب دے دوران اقوام متحدہ دے سیکرٹری جنرل انتونیو گوتریس نے کہیا کہ آئندہ 10 ورہے انتہائی اہم نیں جد کہ ماحولیاتی نظام لئی اقوام متحدہ اقدامات کر رہی اے اوہناں نے کہیا کہ بہتر مستقبل لئی انج دے فیصلیاں دی لوڑ اے جیہڑے ماحول دوست بنن دا باعث ہون۔ اوہناں نے اپنے پیغام وچ کہیا کہ ماحولیاتی تبدیلی نوں روکنا فرد واحد دا کم نہیں بلکہ مجموعی کوششاں دے ذریعے ممکن اے جس وچ کاروباری برادری سنے شعبہ ہائے زندگی نال تعلق رکھن والے سارے لوک شامل ہون۔ انتونیو گوتریس نے کہیا کہ پائیدار ترقی لئی جنگلات دا تحفظ تے سمندری حیاتیات دی بقاء بوہت ضروری اے۔ سیکرٹری جنرل نے کہیا کہ ماحولیاتی تبدیلی نوں روکن لئی چکے گئے اقدامات دے تحت ملازمت لئی لکھاں آسامیاں پیدا ہون گیاں۔
اقوام متحدہ دے ماحولیاتی پروگرام نال جڑے ٹیچر فارکلائیسٹ برانچ ایکو سسٹم ڈویژن دے سربراہ ٹم کرسٹو فرسن نے اپنے پیغام وچ کہیا کہ اسیں پاکستانی حکومت دا ماحولیات دے عالمی دن اُتے میزبان بنن اُتے مبارکباد دے نال شکریہ ادا کرنے آں۔ ٹم کرسٹو فرسن نے کہیا کہ حکومت نے جنگلات لا کے تے دیگر ایکوسسٹم بحال کر کے چنگے اقدامات کیتے نیں۔ اوہناں نے کہیا کہ ہجے وی قدرتی سرمایہ نوں ودھان وچ مزید کم کرن دی لوڑ اے۔ ایہناں دا کہنا سی کہ ماحولیاتی تبدیلی دے چیلنج نال نمبڑن لئی عالمی قوانین تے تعاون نوں بہتر بنان دی لوڑ اے۔
عالمی یوم ماحولیات دے موقعے اُتے میزبان دی حیثیت نال اقوام متحدہ دے عشرہ برائے ایکو سسٹم بحالی 2021 تا 2030 دا باضابطہ افتتاح وزیراعظم عمران خان نے کیتا۔ اقوام متحدہ دے پلیٹ فارم توں ایکو سسٹم بحالی نوں ورچوئل تقریب وچ لانچ کیتا گیا۔ ایس تقریب نوں میڈیا دے مختلف پلیٹ فارمز توں پوری دنیا وچ براہ راست نشر کیتا گیا۔ تقریب وچ جرمنی دی چانسلر انجیلا مرکل، وزیراعظم بارباڈوس میاموٹلے، چیئر پرسن افریقی یونین تے صدر جمہوریہ کانگوفیلکس ایلنوئنی دی شرکت دے علاوہ پوپ فرانسس ولوں اقوام متحدہ لئی خیر سگالی دے پیغامات پڑھ کے سنائے گئے۔ ایسے طرح اقوام متحدہ دے جنرل سیکرٹری، ایگزیکٹو ڈائریکٹر یو این انوائرمنٹ پروگرام اینگر اینڈرسن تے ڈائریکٹر جنرل یو این فوڈ اینڈ ایگریکلچر آرگنائزیشن ڈاکٹر ڈانگ یونے شرکت کیتی جد کہ ڈنمارک دے وزرائے ترقیاتی تعاون و ماحولیات تے فن لینڈ دے وزیر ماحولیات و موسمیاتی تبدیلی دے پیغامات وی نشر کیتے گئے۔ تقریب وچ ماحولیات متعلق مختلف شعبیاں وچ کم کرن والی دیگر نمایاں شخصیات نے وی شرکت کیتی۔ ایس عالمی دن دے حوالے نال مباحثیاں مذاکریاں تے دیگر سرگرمیاں دا وی اہتمام کیتا گیا تاکہ قدرتی ماحول دے تحفظ و بحالی دی اہمیت نوں اجاگر کیتا جا سکے۔ ایگزیکٹو ڈائریکٹر یو این انوائرمنٹ پروگرام اینگراینڈرسن نے قدرتی ماحول دے تحفظ تے بحالی دی کوششاں وچ پاکستان دے قائدانہ کردار نوں سراہیا اے۔ اپنے اک ٹویٹ وچ اوہناں نے کہیا کہ پاکستان نے جنگلات دی بحالی دی کوششاں وچ حقیقی قیادت دا مظاہرہ کیتا اے۔ عالمی یوم ماحولیات2021 دی میزبانی کرن لئی پاکستان دے شکر گزار آں۔
پاکستان خطے وچ موسمیاتی تبدیلیاں دے اثرات نال نمبڑن تے ایکوسسٹم دی بحالی لئی متعارف کردہ اپنے منصوبیاں تے ایس وچ ہون والی کامیابیاں نوں اجاگر کر رہیا اے۔ وزیراعظم عمران دے صاف و سرسبز پاکستان ویژن دے تحت موجودہ حکومت نے متعدد وڈے منصوبے شروع کیتے نیں۔ ایہناں وچ سب توں نمایاں ٹین بلین ٹری سونامی پروگرام اے۔ ایس پروگرام دے تحت پورے ملک وچ مجموعی طور اُتے 10 ارب درخت لان دا ہدف مقرر کیتا گیا ایس مقصد دے حصول لئی ملک گیر شجر کاری دے ذریعے اک ارب درخت لائے جا چکے نیں۔ خیبر پختونخوا دے بلین ٹری فارسٹیشن پراجیکٹ دے نتائج نوں عالمی اقتصادی فورم، اقوام متحدہ دا انوائرمنٹ پروگرام، بون چیلنج تے دیگر بین الاقوامی تنظیماں تے ادارے وی تسلیم کر چکے نیں۔ جس دے بعد ٹین بلین ٹری سونامی پروگرام دا آغاز کیتا گیا۔ ٹین بلین ٹری سونامی پروگرام قدرتی ماحول دے تحفظ تے فروغ ، گرین ہائوس گیساں دے اثرات، بے ترتیب سیلاباں، بارشاں تے خشک سالی دی وجوہات وچ کمی لیان دے نال نال حیاتیاتی تنوع دے حوالے نال معاون وسود مند ثابت ہوئے گا۔ ایس وسیع شجر کاری دے پروگرام دے ذریعے جتھے ملک دے سرسبز رقبے وچ وادھا کیتا جا رہیا اے اوتھے لوکاں نوں روزگار دے موقعے وی فراہم کیتے جا رہے نیں۔ ہن تیکر 65 ہزار بندے حکومت دے قدرتی ماحول دے تحفظ و بحالی دے ایجنڈے نال جڑے منصوبیاں نال روزگار حاصل کر چکے نیں تے اگلے کجھ عرصے وچ ایہہ تعداد دو لکھ تیکر اپڑ جائے گی۔
وزیراعظم عمران خان دی حکومت نے ملک وچ ایکو سسٹم دی بحالی دے اقدام دا آغاز کیتا گیا اے جس دا مقصد پاکستان نوں ماحولیاتی لحاظ نال مضبوط تے پائیدار ملک بنانا اے۔ منصوبے دے تحت جنگلات وچ وادھے، حیاتیات دے تحفظ، ماحولیاتی انحطاط دی وجوہات دے سدباب، موسمیاتی تبدیلیاں نال مطابقت پیدا کرن، قومی سطح اُتے متعین اہداف تے ایہناں دے مقاصد توں ہم آہنگ پالیسی ماحول دے ذریعے ماحولیاتی لحاظ نال مضبوط تے پائیدار پاکستان ولوں پیشرفت کیتی جائے گی۔ وزارت موسمیاتی تبدیلی دے مطابق ایسے سلسلے وچ 2030 تیکر ملک وچ انحطاط پذیر جنگلات دے 30 فیصد رقبے، قابل کاشت 5 فیصد اراضی ، چراگاہواں دے 6 فیصد رقبے تے آب گاہواں دے 10 فیصد علاقے دی بحالی وی پروگرام دا حصہ اے۔ ایس توں علاوہ پروگرام دے تحت منصوبیاں دی فنانسنگ دی ضروریات پوری کرن لئی ایکو سسٹم ریسٹوریشن فنڈ دے قیام دا وی فیصلہ کیتا گیا۔ایسے طرح ریچارج پاکستان پروگرام دے تحت فلڈ رسک مینجمنٹ تے موسمیاتی تبدیلی دے خلاف مدافعانہ نظام نوں مضبوط بنان لئی اقدامات کیتے جان گے۔ ایس سلسلے وچ آبی وسائل دے پائیدار انتظام تے موسمیاتی تبدیلیاں دے اثرات پاروں قدرتی آفات دے خطرات نال دو چار آبادیاں دے تحفظ لئی پیشگی اقدامات اُتے توجہ دتی جائے گی۔ ایس منصوبے نال 2030 تیکر تقریباً اک کروڑ دی آبادی نوں فائدہ ہوئے گا۔
کانفرنس دے دوران عالمی یوم ماحولیات دے حوالے نال تصویری نمائش وی لائی گئی ، نمائش دی افتتاحی تقریب نال خطاب وچ وزیر مملکت برائے موسمیاتی تبدیلی زرتاج گل نے کہیا کہ وزیراعظم عمران خان دی قیادت وچ موجودہ حکومت نے قدرتی ماحول دے تحفظ تے بحالی لئی انقلابی اقدامات کیتے نیں جنہاں دا پوری دنیا وچ اعتراف کیتا جا رہیا اے۔ عالمی یوم ماحولیات دی میزبانی پاکستان لئی اعزاز اے، عوام ماحول نوں آلودگی توں پاک رکھن تے قدرتی وسائل دی ترقی لئی حکومتی کوششاں وچ بھرپور ساتھ دین۔ کرونا وائرس دی وجہ نال عالمی یوم ماحولیات دی مناسبت نال ورچوئل تقریبات دا اہتمام کیتا گیا۔ پاکستان تحریک انصاف دی حکومت نے وزیراعظم عمران خان دے صاف و سرسبز پاکستان دے ویژن دے تحت ملک وچ ماحولیات دے شعبہ دی ترقی لئی انقلابی اقدامات کیتے نیں جس دے اعتراف وچ اقوام متحدہ دے پروگرام برائے ماحولیات دے تحت 5 جون نوں عالمی یوم ماحولیات دی میزبانی کرنا پاکستان لئی اعزاز اے۔ ساڈی حکومت نے ملک دے سرسبز رقبے وچ وادھے لئی ٹین بلین ٹری سونامی پروگرام سنے قدرتی ماحول دی بحالی دے ایکو ریسٹوریشن پراجیکٹ، جنگلی حیات دے تحفظ، کلائسیٹ سمارٹ زراعت دی ترقی، آلودگی دی روک تھام لئی پولی تھین بیگز اُتے پابندی تے بجلی نال چلن والی گڈیاں نوں متعارف کران جہے وڈے پالیسی اقدامات چُکے نیں۔ زرتاج گل نے کہیا کہ سانوں فخر اے کہ ساڈی حکومت نے تن سال وچ اوہ کم کیتے نیں جیہڑے پچھلے 70 سالاں دی تاریخ وچ نہیں ہو سکے سن۔
اوہناں نے دسیا کہ موسمیاتی تبدیلیاں توں پیدا ہون والے حالات توں مطابقت پیدا کرن دی کوششاں دے سلسلے وچ پاکستان نے نیشنل ایڈاپٹیشن پلان دے عمل دا آغاز کیتا اے۔ ایس پلان دے تحت موسمیاتی تبدیلیاں دے اثرات نال نمبڑن دی استعداد نوں فروغ دتا جائے گا۔ وزارت موسمیا تی تبدیلی دے مطابق ایس مقصد لئی فطرت اُتے مبنی حل تے ایکوسسٹم ایڈاپٹیشن دے طریقیاں نوں بروئے کار لیایا جا رہیا اے۔ نیشنل ایڈاپٹیشن پلان پراسیس پاکستان ولوں پہلے توں شروع کردہ فطرت اُتے مبنی طریقیاں بشمول ٹین بلین ٹری سونامی پروگرام، ایکوسسٹم دی بحالی تے ریچارج پاکستان جہے منصوبیاں دی بنیاد اُتے ترتیب دتا جائے گا۔ جس دا مقصد پاکستان نوں صاف تے سرسبز بنان دی کوششاں وچ پورے ملک دے لوکاں نوں شامل کرنا اے۔ ایس پروگرام دے تحت صفائی ستھرائی، ویسٹ مینجمنٹ تے شجر کاری دے ذریعے شہر ی لائف سٹائل نوں بہتر بنان لئی اقدامات کیتے جا رہے نیں۔ آلودگی توں پاک ماحول تے شجر کاری دی کوششاں وچ بھرپور حصہ لے کے پاکستان نوں آن والی نسلاں لئی محفوظ ملک بنایا جا سکدا اے۔