۔ ۔ ۔ نویں نسل تے ساڈی تربیت

محمد افضل طاہر وزیرآبادی

ساڈی تربیت تے ساڈی اولاد دی تربیت وچ بڑا فرق آگیا اے جدوں اسی بچے ساں تے ساڈے ماں پیو نے یاگھر دے کسے ہور وڈے نے واج مارنی تے اساں دوڑ کے اوہناں دی گل سننی جے کدی کسے یار نال باہر کدرے نکلنا تے پہلے ماں پیو نوں منانا جے او من جاندے تے ٹر جانا نہیں تے گھر ای رہنا جھوٹ لڑای جھگڑے فراڈ ہوندا سی پر اینا نہیں جنا ہون ہوندا اے اصل اچ ساہنوں اہنے وڈیاں دا ڈر وی ہوندا سی تے اسی اوہناں دی عزت وی کرنے ساں ساڈے دور وچ جے کدی کسے اوپرے بندے یا گلی محلے دے کسے وڈے نے کسے برے کم توں ڈکنا یا چڑک وی لینا تے کدی وی ساڈے وڈیریاں غصہ نہیں سی کیتا بلکہ اوہناں کہنا کہ چنگا ہویا کہ تینوں کسے نے چڑکیا تے وڈیاں اوہدا شکریہ ادا کرنا کہ توں ساڈی اولاد نوں برے کم توں منا کیتااے اولاد دی تربیت وچ کلے ماں ماں پیو دا کردار نہیں ہوندا ایدے وچ گھر دے سارے جی گوانڈی سکول ٹیچر تے بچے دی سوسائٹی دا بڑا اثر ہوندا اے کجھ چیزاں دا وی بڑا کردار ہوندا اے جسراں ساڈے دور اچ کھیڈاں ہوندیاں سن جناں وچ کرکٹ فٹبال کبڈی گلی ڈنڈے ورگیاں ہور گیماں ہوندیاں سن جناں دا ساڈی صحت تے چنگا اثر پیندا سی ساڈہ دور چنگا سی ساڈے ماپیاں ساڈی تربیت چنگی کیتی پر ہون اسیں اپنی نویں نسل دی تربیت کرن وچ ناکام ہوندے نظر آرہے آن اوہدیاں بہت ساریاں وجہ نیں جیناں چوں میں کجھ دساں گا پہلے نمبر تے اسیں آج دے ماں پیو کدی وی اے نہیں چاہندے کہ ساڈے توں علاوہ کوئی وی ساڈے بال نوں کجھ آکھے ایتھوں تک کہ بال دا سکا چاچا تایا دادی یا دادا یا کوئی ہور رشتے دار جے بال نوں کسے پیڑےکم توں وی روکے تےماں پیو منہ بنا لیندے نیں کہ تساں ساڈے بال نوں کیوں روکیا اے حالاں کہ او ساڈے بال دی بہتری لئی ہی روکدے نیں تے ایہ ساڈی ماں پیو دی بیوقوفی اے سانوں سمجھنا چاہیدا اے کہ اوہناں دا وی ساڈے بالاں تے حق اے بلکہ سانوں اوہناں دا احسان مننا چاہیدا اے کہ اوہناں ساڈے بال نوں پیڑے کم توں روکیا۔ہن ساڈے بالاں دا تعلیمی نظام وی پوری طراں بدل گیا اے پہلے بچے استاداں کولوں ڈردے سن ہن استاد بچیاں کولوں ڈردے نیں تے اے ساڈے لئی بڑی بڑی شرم والی گل اے ایسے لئی ساڈی اگلی نسل دے منڈے تعلیم وچ بہت پچھے نیں۔اساں ہن اپنے ہتھیں اپنے بالاں نوں تباہی والے پاسے لا دتا اے تے او اے موبائل اساں جمدے بچے توں لے کے تے وڈے بالاں تک ساریاں نوں موبائل دے آہرے لادتا اے ساڈہ بچا جے رو ریا اے یا کسے شے لئی ضد کر رہیا اے تے اوہدے ہتھ وچ کھڈونا پھڑان دی بجاے اسیں اوہنوں موبائل پھڑا دتا تے فیر ہولی ہولی او موبائل دا عادی ہو گیا تے ایہ عادت ساڈے بالاں لئی اک عذاب اثابت ہو سکدی اے تے ایدا بچیاں تے برا اثر وی پہ سکدا اے موبائل دے غلط استعمال نال ہون والے نقصان توں ہر بندہ واقف اے ایس لئی سانوں ہوش دے ناخن لینے پینے نیں۔موجودہ دور وچ سانوں اپنی بچیاں ول خاص دھیان دین دی لوڑ اے اسیں اپنی بچیاں نوں کدی وی بلاوجہ گھروں باہر نہ نکلن دویے سانوں اپنی سوچ بدلنی پوے گئی کہ بچی جے کر کلی باہر نکل گئی اے یا چھوٹے کپڑے پواہ کہ تے آکھا کوئی گل نہیں ازے بچی اے ہن او دور نہیں رہیا کوئی گل نہیں والا ہن سانوں اپنی بچیاں ولوں ہوشیار رہنا پوے گا جساں کہ ساڈے علم اچ اے کی بچیاں نوں لے کے ساڈے ملک اچ کئی ناخوشگوار واقعات ہو چکے نیں بالاں دی تربیت اچ ساڈی اک ہو بڑی وڈی کمزوری اے او اے کی اسیں اپنے بالاں دی ہر او گل من لینے آں یا ہر او چیز لے دینے آں جیڑی اوہناں دے حق اچ چنگی نہیں ہوندی اپنے بالا ں نال لاڈ ضرور کرو پر اک حد تک جدوں حد توں ودھو گے تے فیر اوہدا نقصان چکنا پوے گا۔آخر تے میں پیر واث شاہ ہوراں دا ایک شعر لکھاں گا
پتر جمدے رکھیے وچ قبضے
دی پین نوں لاڈ لڈاویے نہ
وارث شاہ میاں پنچھی اڈ جانا
خالی پنجرہ گھر وچ لٹکایے نہ
اللہ پاک ساڈیاں بالاں تے آپنا کرم فرماے تے سانوں اپنی اولاد دی بہتر تربیت کرن دی توفیق عطا فرماے آمین