توہین پارلیمنٹ ذمہ دار کون ؟

قیوم نظامی

قومی اسمبلی دے حالیہ بجٹ اجلاس دے دوران انج دا شرمناک واقعہ ظہور پذیر ہویا جس دی مثال پاکستان دی پارلیمانی تاریخ وچ نہیں ملدی۔ قومی اسمبلی دے ایوان وچ جنگ دی صورت حال پیدا ہو گئی جدوں حکومتی تے اپوزیشن جماعتاں دے اراکین پارلیمنٹ اک دوجے نال گتھم گتھا ہو گئے۔ بجٹ دی موٹی کتاباں نال اک دوجے نوں زخمی وی کرن لگے۔ صورتحال ایس قدر تشویشناک ہو گئی کہ قومی اسمبلی دے سپیکر نوں پارلیمنٹ دی سکیورٹی فورس نوں طلب کر نا پیا۔ عوام دے منتخب نمائندیاں نے اک دوجے نوں گندی گالیاں دتیاں جنہاں نوں پاکستان دے کروڑاں عوام نے اپنی اکھاں نال ویکھیا تے کناں نال سنیا ۔ جیہڑے اراکین قانون سازی دے ذمہ دار نیں اوہناں نے پارلیمنٹ دے مقدس ایوان وچ آئین قانون تے قواعد و ضوابط نوں ای پرزے پرزے کر دتا تے کھلم کھلا توہین پارلیمنٹ دے مرتکب ہوئے۔ بدقسمتی نال پاکستان ہر حوالے نال زوال پذیر ہو رہیا اے۔ پر افسوس ایس گل دا اے کہ سانوں کوئی احساس زیاں وی نہیں نہ ای پاکستان دا کوئی ادارہ ایس افسوسناک صورت حال دا جائزہ لے رہیا اے۔ قیام پاکستان دے بعد پہلی دستور ساز اسمبلی دے اراکین بڑے باوقار محترم تے اہل سن جنہاں وچ شامل سن۔
قائداعظم محمد علی جناح لیاقت علی خان خواجہ ناظم الدین حسین شہید سہروردی خان عبدالغفار خان سردار شوکت حیات محمد ایوب کھوڑو نواب محمد خان جوگیزئی اے کے فضل الحق فضل الرحمن شائستہ اکرام اللہ جو گندر ناتھ منڈل شیخ کرامت علی فیروز خان نون بیگم شاہ نواز سردار عبدالرب نشتر مولانا شبیر احمد عثمانی مولانا تمیزالدین دین میاں ممتاز دولتانہ نور الامین راج کمار چکروتی- افسوس صد افسوس اج دی پارلیمنٹ وچ کجھ اراکین وی انج دے نہیں جنہاں نوں میرٹ اُتے پہلی دستور ساز اسمبلی دے اراکین دی صف وچ شامل کیتا جا سکے۔ پاکستان دے سارے ادارے تے شعبے زوال دا شکار نیں۔ ایس شرمناک صورت حال دا ذمہ دار پاکستان دا موجودہ سیاسی تے معاشی نظام اےجیہڑا پاکستان دی اخلاقی اقدار نوں تباہ و برباد کر رہیا اے۔ پاکستان دا نظام تعلیم مثالی تے معیاری افراد تخلیق کرن وچ ناکام ہو چکیا اے۔ سیاسی جماعتاں دے قائدین اہلیت صلاحیت تے بصیرت دے حوالے نال بڑے گھٹ معیار دے نیں۔ اوہ اپنی جماعتاں نوں جمہوری اصولاں تے پارلیمانی روایات دے مطابق چلان دے اہل وی نہیں نہ ای ایہناں دی نیت اے۔اوہ امیدواراں نوں پارٹی ٹکٹ دیندے ویلے اہلیت تے صلاحیت تے کردار نہیں ویکھدے بلکہ ایہناں دے اثر و رسوخ تے نوٹاں نوں ویکھدے نیں۔ ایہو وجہ اے کہ بدقسمتی نال انج دے بندے وی پارلیمنٹ وچ پہنچ جاندے نیں جیہڑے پارلیمنٹ دا رکن بنن دے اہل ای نہیں ہوندے تے جے پاکستان وچ آئین تے قانون دی حکمرانی ہوندی تے کئی اراکین اسمبلی پارلیمنٹ دی بجائے جیل وچ ہوندے۔ پارلیمانی جمہوری روایات دے زوال دے ذمہ دار ووٹر وی نیں جیہڑے بغیر سوچے سمجھے لائن وچ با ادب کھڑے ہو کے انج دے امیدوارا نوں وی ووٹ دے دیندے نیں جنہاں دے بارے وچ ایہناں نوں علم ہوندا اے کہ ایہہ امیدوار آئین دے آرٹیکل 62 تے 63 اُتے پورے نہیں اتردے۔ بار بار دھوکا تے فریب کھان دے باوجود پاکستان دے ووٹرز بار بار ایہناں چہریاں نوں ووٹ دیندے آ رہے نیں جیہڑے ایہناں دا خون وی چوسدے نیں تے ایہناں دی جیباں وچوں جمع پونجی وی کڈ لیندے نیں۔ پاکستان دے عوام نوں موجودہ زوال دی ذمہ داری قبول کرنی پئے گی۔ جدوں تیکر اوہ اکھاں بند کر کے فیصلے کر دے رہن گے تے اپنی طاقت تے قوت نوں منظم تے متحد نہیں کرن گے پاکستان دے حالات ایسے طرح زوال پذیر ای رہن گے جنہاں دا خمیازہ خود ایہناں نوں تے ایہناں دی آن والی نسلاں نوں ای بھگتنا پئے گا۔ آزمائش دے ویلے قومی لٹیرے اپنے خاندان سنے پاکستان توں باہر چلے جان گے جس لئی اوہناں نے پہلے ای مکمل انتظامات کر رکھے نیں۔ پاکستان دے سیاستدان انتہائی ڈھٹائی دے نال ایہہ مطالبہ کردے نیں کہ ریاست اُتے پارلیمنٹ دی بالا دستی ہونی چاہیدی اے۔ اوہ ایہہ نہیں سوچدے کہ جس پارلیمنٹ دی اوہ خود ای توہین کردے نیں تے ایس دے وقار نوں مجرو ح کردے نیں تے انج دی پارلیمنٹ ریاست اُتے بالا دستی کنج قائم ہو سکدی اے۔ جس پارلیمنٹ دے اراکین پارلیمنٹ دے وقار دی دھجیاں اڑاندے ہون تے اک دوجے نوں گندی گالیاں دین توں وی گریز نہ کردے ہون اوہ کس منہ دے نال پارلیمنٹ دی بالا دستی دی گل کردے نیں۔
جے پارلیمنٹ دی کارکردگی دا خصوصی آڈٹ کرایا جائے تے ایس دے جیہڑے نتیجے برآمد ہون گے اوہ پوری پاکستانی قوم لئی انتہائی شرمناک تے افسوسناک ہون گے۔ جدوں کسے سیاسی جماعت دی غلطی دی نشاندہی کیتی جاندی اے تے اوہ ایس غلطی نوں تسلیم کر کے شرمسار ہون دی بجائے دوجیاں دی غلطیاں دے پچھے لُکن دی کوشش کردے نیں۔ جدوں تیکر پاکستان دے موجودہ پارلیمانی جمہوری نظام نوں تبدیل نہیں کیتا جاندا تے پارلیمنٹ دے دروازے پاکستان دے باکردار اہل تے بے لوث بندیاں لئی نہیں کھولے جاندے ایس ویلے تیکر پارلیمنٹ دا وقار کدی بحال نہیں ہو سکے گا تے نہ ای پارلیمنٹ دی بالا دستی ریاست اُتے قائم ہو سکدی اے۔ پاکستان دے عوام ای ریاست دا قیمتی اثاثہ تے طاقت نیں جدوں تیکر اوہ اپنی سوچ تبدیل نہیں کردے اوہ خود وی حالات دا ماتم ای کردے رہن گے تے پاکستان خدانخواستہ زوال دی آخری سطح اُتے اپڑ جائے گا کہ ایس دی سلامتی آزادی تے خود مختاری ای خطرے وچ پئے جائے گی۔ انسانی تاریخ انج دی عبرتناک مثالاں نال بھری پئی اے جیہڑی قوماں انھی تقلید کردیاں سن مجرمانہ غفلت دی مرتکب ہوندیاں سن اوہ تباہ و برباد ہو گئیاں۔ پاکستان وچ انج دے بندیاں دی کمی نہیں جیہڑے محب وطن پاکستان تے عوام دوست نیں تے پاکستان دے مستقبل دے بارے وچ فکر مند رہندے نیں انج دے بندیاں نوں اک پلیٹ فارم اُتے متحد تے منظم ہونا پئے گا تاکہ پاکستان وچ مفاد پرست موقع پرست بداخلاق بدکردار تے لوٹ مار کرن والے بندیاں دا رستہ روکیا جا سکے جنہاں دی تعداد کوئی زیادہ نہیں۔ پاکستان دے مفاد پرست تے موقع پرست دو سو خانداناں نوں جے سیاست توں باہر کڈ دتا جائے تے پاکستان دے متوسط تے لوئر مڈل کلاس طبقے لئی ریاستی اداریاں دے دروازے کھول دتے جان تے پاکستان تبدیل وی ہو سکدا اے تے ایس دا مستقبل شاندار تے مضبوط تے مستحکم وی ہو سکدا اے۔ پاکستان دی ترقی خوشحالی تے سلامتی لئی پاکستان دے نوجواناں نوں طبقاتی جدوجہد کرنی پئے گی تے پاکستان دے عوام دی ریاست اُتے بالادستی نوں قائم کرنا پئے گا۔ پارلیمنٹ دے حالیہ شرمناک واقعے دے بعد کسے لیڈر نے اپنی ذمہ داری پوری نہیں کیتی مذمتی بیان وی جاری نہیں کیتا۔ قومی اسمبلی دے اسپیکر نوں فوری نوٹس لیندے ہوئے انج دے اراکین دی رکنیت معطل کرنی چاہیدی سی۔ جنہاں نے پارلیمنٹ دے وقار نوں ناقابل تلافی نقصان اپڑایا۔ پارٹی دے لیڈراں نوں فوری طور اُتے اپنے ایہناں اراکین دی پارٹی رکنیت معطل کر دینی چاہیدی سی۔ سیاسی جماعتاں دے کارکناں نوں وی اپنے لیڈراں نال مطالبہ کرنا چاہیدا سی کہ اوہ انج دے اراکین دے خلاف انضباطی کاروائی کرن۔ چیف جسٹس پاکستان نوں ایس صورت حال دا نوٹس لینا چاہیدا سی۔ اسلام آباد دے عوام نوں ایہناں اراکین دے خلاف پارلیمنٹ دے ساہمنے بھرپور احتجاج کرنا چاہیدا سی۔ افسو س دی گل ایہہ وے کہ اسیں بحیثیت قوم سب ناکام ہوئے نیں تے ساڈی اجتماعی ناکامی ساڈی اجتماعی خود کشی دا سبب وی بن سکدی اے۔ اللہ تعالیٰ پاکستان دا حامی تے ناصر ہوئے تے پاکستانی قوم بیدار تے باشعور کردیوے۔