اپنا اپنا ہیرو

امرجلیل

عام طور تے سمجھیا جاندا اے کہ ساڈا سب دا اپنا اپنا اک ہیرو ہوندا اے پر انج نہیں ہوندا۔ ساڈے اک توں ودھ ہیرو ہوندے نیں معاشرے دے منفی تے مثبت رویاں دی وجہ نال کجھ الفاظ معتبر نہیں سمجھے جاندے۔ اوہ الفاظ اپنا اعتبار کھو بیٹھدے نیں۔ کدی کدی اجہے الفاظ ذلت د ے زمرے وچ آ جاندے نیں مذاق دا کارن بن جاندے نیں۔ بیوی دے بھائی نوں انگریزی وچ کہندے نیں Brother in Law ایس لفظ دا اردو وچ نعم البدل اے سالا‘ تیزی نال بدلدے ہوئے معاشرتی‘ سماجی‘ ثقافتی تے سیاسی حالات دے زیراثر لفظ سالا اپنی ساکھ کھو بیٹھا اے۔ چنگے معنیاں وچ استعمال نہیں ہوندا۔ اسیں پرانے شہر کراچی دے پرانے وسنیک ہن تک لفظ سالا نوں گالھ سمجھنے آں۔ سانوں جے کوئی سالا کہہ دیوے تے اسیں اپنا آپ کھو بیٹھنے آں۔ مرن مارن تے تل جانے آں۔ بالکل ایسے طرح لفظ ہیرو بھاویں خالصتاً انگریزی زبان دا لفظ اے ساڈے ایتھے اپنی ساکھ کھو بیٹھا اے۔ لفظ ہیرو دا مفہوم مینوں پتہ اے پر میں لفظ ہیرو لئی اردو وچ اک لفظ تے مشتمل نعم البدل توں واقف نہیں۔ ایس لئی میں اکثر لفظ ہیرو دے نال تاویل توں کم لینا واں۔ ایہ تمہید میں ضرورت دے تحت لکھی اے۔ مینوں اک غیرمعمولی بندے بارے لکھنا اے۔ اختلاف رائے تہاڈا بنیادی حق اے پر اوہ بندہ میرے لئی ہیرو اے۔
شروع وچ میں عرض کیتا سی کہ ساڈے سب دے اک توں زیادہ ہیرو ہوندے نیں ہیرو توں میری مراد اے پسندیدہ بندہ‘ اک اجیہا بندہ جنہے سانوں متاثر کیتا اک اجیہا بندہ جو اپنے قول و فعل وچ بے مثال لگدا اے۔ اک اجیہا بندہ جو ہر لحاظ نال سب توں وکھرا لگدا اے اوہدا ہسنا وی سانوں چنگا لگدا اے اوہدا رونا وی سانوں چنگا لگدا اے اوہدا بولنا وی سانوں چنگا لگدا اے اوہدا اٹھنا‘ بیٹھنا تے چلنا پھرنا وی سانوں چنگا لگدا اے اسیں اپنے ہیرو نوں اینے انہماک نال پسند کرنے آں کہ اوہدیاں خامیاں وی سانوں وکھائی نہیں دیندیاں اسیں اپنے ہیرو دیاں خوبیاں وچ گواچے رہنے آں۔ اوہ ساڈے دل و دماغ تے سوچ تے چھا جاندا اے ایہ سب کجھ اچانک نہیں ہوندا۔ سنی سنائی حکایتاں تے کوئی بندہ صحیح معنیاں وچ تہاڈا ہیرو نہیں بن سکدا کسے بندے نوں تسیں ایس لئی اپنا ہیرو سمجھدے او کہ اوہ بندہ تہاڈے والد سگوں وڈیریاں دا ہیرو سی۔ ہیرو سانوں ورثے وچ نہیں ملدے کسے ہور دی مثال دین دی تھاں میں اپنی مثال دینا مناسب سمجھنا واں۔ جے اپنا موڈھا ہووے تے فیر دوجے کسے دے موڈھے تے بندوق رکھ کے نہیں چلانی چاہیدی۔ میرے ہیرو وچ مہاتما گوتم بدھ شامل نیں۔ گوتم بدھ میرے والدین دے ہیرو نہیں سن بے انتہا اخلاق‘ نفیس‘ بے مثال وکٹ کیپر بیٹس مین امتیاز احمد میرے ہیرو نیں۔ اوہ میرے والدین دے ہیرو نہیں سن میرے والدین فٹ بال تے والی بال دا کھیڈ پسند کردے سن۔
مخصوص معاشرتی‘ سماجی تے سیاسی پس منظر وچ ہیرو ابھر آئوندے نیں۔ پاکستان بنن دے چھ ست مہینے بعد دنیا دے اعلیٰ کرکٹ کھڈاریاں تے مشتمل ورلڈ ٹیم‘ عالمی ٹیم نوں ہندوستان دے وزیراعظم جواہر لعل نہرو نے خاص دعوت دے کے سدیا سی۔ موقع سی بمبئی دے بریبون کرکٹ سٹڈیم دی سلور جوبلی تقریبات دا‘ ورلڈ الیون نوں پرائم منسٹر الیون دے خلاف چار روزہ میچ کھیڈنا سی۔ ہندوستان دے وزیراعظم جواہر لعل نہرو نے پاکستان دے وزیراعظم لیاقت علی خان اگے درخواست کیتی کہ امتیاز احمد نوں اوہناں دی ٹیم ولوں ورلڈ الیون دی ٹیم دے خلاف کھیڈن لئی ہندوستان گھلو۔ وزیراعظم جواہر لعل نہرو دی ٹیم وچ برصغیر دی تاریخ دے نامور کھڈاری ونومنکڈ‘ وجے مرچنٹ‘ وجے ہزارے‘ لالا امرناتھ‘ مشتاق علی شامل سن۔ میں اودوں کراچی دے این جے وی ہائی سکول وچ پڑھدا سی۔ کرکٹ نال عشق دی ابتدا ہو چکی سی۔ امتیااحمد نے دنیا دے تیز ترین بالراں دے چھکے چھڑا دتے سن۔ ڈان اخبار نے پہلے صفحے تے امتیازاحمد دی وڈی فوٹو چھاپی سی۔ لکھیا سی: Imtiaz Scores 300 Not Out in One Day مطلب امتیاز احمد نے اک دن وچ تن سو رنز بنائے تے ناٹ آئوٹ رہے۔ اودوں امتیاز احمد میری حیاتی وچ ہیرو بن کے ابھرے۔ میراتجسس اوہناں دی ذات نال وابستہ ہو گیا۔ پتہ لگا کہ دوجی جنگ عظیم نے جس طرح بہت کجھ دنیا وچ تباہ کر دتا سی اوسے طرح ان گنت غیرمعمولی لوکاں دی فطری صلاحیت تے خداداد جوہر نوں دنیا دے سامنے ابھر کے آن ای نہیں دتا۔ اوہناں غیرمعمولی باصلاحیت لوکاں وچ جتھے آسٹریلیا دے ڈان بریڈ مین سن اوتھے برصغیر دی ونڈ توں پہلاں امتیاز وی سن۔ باصلاحیت لوکاں لئی چھ سالہ دوجی عالمی جنگ دی ہیبت ناکیاں جیویں گھٹ سن کہ برصغیر دی ونڈ دے نتیجے وچ دنیا نوں موت ورگے سکتے وچ پان والے وحشی فسادات نے برصغیر نوں تباہ و برباد کر دتا۔ شکستہ حال برصغیر وچ ان گنت غیرمعمولی لوک برباد ہو گئے۔ گمنامی وچ گواچ گئے۔ فرقہ وارانہ فسادات دی اگ انج بھڑکی کہ اج تک برصغیر وچ سلگدی رہندی اے۔ وحشتی فسادات توں دور‘ امتیاز احمد اودوں جے آسٹریلیا‘ انگلینڈ یاں ویسٹ انڈیز وچ ہوندے تے اج اوہ بریڈمین‘ لین ہٹن‘ وارل‘ ویکس‘ وانکاٹ تے کیتھ ملر دی صف وچ شامل ہوندے۔ امتیازاحمد دے بارے تفصیل نال فیر کدی لکھاں گا۔ اج مینوں اپنے دوست ہیرو‘ دلیپ کمار دے بارے تہاڈے نال گلاں کرنیاں سن۔ کالم دی گنجائش ربڑ نہیں‘ کھچ کے میں لماں نہیں کر سکدا۔ اگلے کجھ دیہاڑیاں وچ دلیپ کمار دے بارے تہاڈے نال گلاں کراں گا۔ دلیپ کمار نوں میں سدا حیات ناول دی طرح پڑھیا اے کہندے نیں کہ بنگالی ادب دے عظیم کھڈاری مسرت چندرچیٹر جی دا ناول دیوداس جدوں چھپیا سی اودوں اوسے ورھے 1922ء وچ دلیپ کمار دا جنم ہویا سی۔ میں ناول دیوداس کئی واری پڑھیا اے۔ ناول دیوداس تے مبنی دلیپ دی فلم دیوداس میں کئی واری ویکھی اے۔ میرا یقین اے اعتقاد اے کہ دلیپ نے دیوداس بنن لئی جنم لیا سی یاں فیر مسرت چندر نے ناول دیوداس دلیپ لئی لکھیا سی۔٭٭