تاریخ دا سچ

محمد آصف بھلّی

ایہہ جھوٹ بولن لئی بڑی بے شرمی ، ڈھٹائی تے اخلاقی اعتبار نال دیوالیہ ہون دی لوڑ اے۔ ایس وچ جے پاکستان دشمنی نوں وی شامل کر لیا جائے تے فیر ایہہ ذلیل ترین حرکت کیتی جا سکدی اے کہ اک نام نہاد مورخ تے محقق ہون دا جھوٹا دعویدار ایہہ لکھ چھڈے کہ ’’ انڈیا دے وائسرائے لارڈ لنلتھگو نے ایہہ قرار داد چودھری ظفر اللہ خان توں لکھوائی جنہاں نے اپنا ناں ظاہر نہ کرن دی درخواست کیتی بعد وچ ایہہ مسودہ قائداعظم محمد علی جناح تے برطانوی حکومت دی توثیق دے بعد 23مارچ 1940؁ء نوں مسلم لیگ دے لہور وچ ہون والے جلسہ عام وچ پیش کیتا گیا۔‘‘
ایس توں پہلے اک سیاست دان ولی خان نے اپنی کتاب وچ ایہہ بیہودہ بے بنیاد تے لغو الزام لایا سی کہ لارڈ لنلتھگو نے اپنی ایگزیکٹو کونسل دے ممبر چودھری ظفر للہ خان توں اک قرار داد دا مسودہ تیار کروایا سی جیہڑا قائداعظم نوں وی گھل دتا گیا۔ جیہڑا اوہناں نے قرار داد لہور دی صورت وچ 23 مارچ 1940ء نوں مسلم لیگ دے سالانہ اجلاس وچ منظور کروا لئی۔ ایس بیہودہ تے جھوٹے الزام دا اکو مقصد ایہہ سی کہ قیام پاکستان دی مقدس تحریک تے قائداعظم دی بے مثل قیادت دے حوالے نال پاکستان دی نوجوان نسل نوں گمراہ کیتا جائے۔ ولی خان نے تحریک پاکستان دی تاریخ نوں مسخ کرن دے بڑے جتن کیتے بڑیاں کوششاں کیتیاں پر جوابی دلائل دے بعد ولی خان دی کتاب جھوٹ دا پلندہ ثابت ہوئی۔ ولی خان دی شرمناک جھوٹ دی تردید آپ چودھری ظفر اللہ خان نے وی کر دتی سی۔ پنجاب یونیورسٹی دے شعبہ صحافت وچ میرے استاد پروفیسر وارث میر تے مشہور صحافی منیر احمد منیر ولی خان دے جھوٹ دے بارے وچ تحقیق کرن لئی 23 دسمبر 1981ء نوں چودھری ظفر اللہ خان نال ایہناں دی رہائش گاہ اُتے ملاقات لئی گئے۔ ایس ملاقات وچ ہون والی گل بات نوں منیر احمد منیر نے ریکارڈ وی کیتا۔ چودھری ظفر اللہ خان نے دو ٹوک تے واضح انداز وچ اپنا ایہہ موقف بیان کیتا کہ اوہ وائسرائے دے آئینی مشیر وی سن۔ وائسرائے نے مینوں تقسیم ہند دی مختلف تجویزاں اُتے میری رائے تے تجزیہ منگیا۔ جیہڑا میں دے دتا۔ پر 23مارچ1940؁ء دی قرار داد دی تخلیق یا تحریر نال میرا کوئی تعلق نہیں ۔ چودھری ظفر اللہ خان نے بڑی حیرت دا اظہار کردے ہوئے ایہہ وی کہیا کہ ولی خان مینوں قرار داد لہور دی تخلیق دا جھوٹا کریڈٹ دین اُتے کیوں مصر نیں۔؟
25دسمبر 1981؁ء دے ڈان اخبار دے پہلے صفحے اُتے وی ظفر اللہ خان نے ایس امر دی تردید کیتی کہ اوہناں نے کدی برصغیر دی ونڈ دا کوئی فارمولہ وائسرائے ہند نوں پیش کیتا سی۔ اوہناں نے کہیا کہ ایس گل دا تصور وی نہیں کیتا جا سکدا کہ ایہناں دا کوئی فارمولہ قائداعظم نوں پیش کیتا گیا ہوئے۔ تے قائداعظم نے ایس نوں قبول کر لیا ہوئے جس گل نوں آپ ظفر اللہ خان جھوٹ قرار دے چکے ہون ایس دے باوجود جے کوئی نام نہاد محقق فیر ایہہ دعویٰ کر دیوے کہ قرار داد لہور اصل وچ چودھری ظفر اللہ خان نے لکھی سی تے فیر انج دے محقق دی لاعلمی تے جہالت اُتے ماتم ای کیتا جا سکدا اے۔ جس قرار داد لہور دا اصل محرک لارڈ لنلتھگو نوں قرار دتا جاندا اے کہ اوہناں نے ایہہ قرار داد چودھری ظفراللہ خان توں لکھوائی اوہ وائسرائے 25مارچ 1940؁ء نوں وزیر ہند دے ناں اپنے اک خط وچ لکھدا اے کہ میں جناح دے مطالبات نوں کوئی اہمیت نہیں دیندا جس دے تحت اوہ ہندوستان دے ٹوٹے کرنا چاہندا اے۔ فیر 5 اپریل 1940ء دے خط وچ لارڈ لنلتھگو فیر اپنے موقف نوں دہراندا اے کہ نہ تے اسیں ایس سکیم (پاکستان) نوں قبول کر سکنے آں تے نہ ای اپنے آپ نوں ایس دے نال وابستہ کر سکنے آں۔ کیہ پاکستان دی تاریخ نوں اپنے جھوٹ تے کزب بیانی نال مسخ کرن والیاں نوں ایہہ توفیق نہیں ہوئی کہ اوہ لارڈ لنلتھگو دے ایہہ خط پڑھ لیندے؟ لارڈ لنلتھگو دے ایہناں خطاں دے بعد وی کیہ ایس جھوٹ دی کوئی تھاں ٹھکانا یا گنجائش باقی رہ جاندی اے کہ قرار داد لہور لارڈ لنلتھگو دے کہن اُتے چودھری ظفر اللہ خان نے ڈرافٹ کیتی سی۔ محقق سکالر تے جھوٹے مورخ نوں اپنے بہتان اُتے فیر وی شرم محسوس نہیں ہوئی تے میں ایہناں نوں دعوت دیواں گا کہ اوہ وائسرائے لارڈ لنلتھگو دا 10اپریل 1940؁ء دا ا وہ ٹیلی گرام ای پڑھ لین جیہڑا وزیر ہند دے ناں ارسال کیتا گیا سی۔ ایس وچ لارڈ لنلتھگو نے قرار داد لہور دی سخت مخالفت کردے ہوئے کہیا سی کہ برطانوی حکومت نوں پختہ عزم دے نال غیر مبہم لفظاں وچ ایہہ اعلان کر دینا چاہیدا اے کہ اوہ متحدہ قوم دے تصور اُتے قائم اے تے ہندوستان دی وحدت نوں ختم کرن والی ہر اسکیم دی مخالف اے۔ کیہ ایہہ سارے حوالے ایس دروغ گو محقق تے جعل ساز مورخ دی تکذیب تے تردید لئی کافی نہیں جس نوں لوک ڈاکٹر مبارک علی دے ناں توں جان دے نیں تے جس دے بارے وچ محترم خرم علی شفیق دے ایس جملے دی میں تحسین کرن اُتے مجبور آں۔ خرم علی شفیق لکھدے نیں کہ ’’مبارک علی جنہاں نے تاریخ لکھی اے پر پڑھی نہیں‘‘ ۔میں مبارک علی نوں ایہہ مشورہ دینا چاہنا واں کہ اوہ تاریخ لکھن توں زیادہ تاریخ نوں پڑھن تے ایس دے نال نسبت رکھن والے ریکارڈ پڑھن دا فائدہ ہوندا اے کہ ایس نال نہ صرف پڑھن والے دی اپنی لاعلمی تے جہالت دور ہوندی اے بلکہ فیر بندا جہالت ودھان توں وی گریز کردا اے۔
مینوں پتہ نہیں کہ ڈاکٹر مبارک علی دے باطن وچ ساڈے جان توں وی پیارے پاکستان دے حوالے نال کیوں اینی پلیدی، گندگی تے ناپاکی بھری ہوئی اے کہ اوہ ٹی وی دے اک پروگرام وچ ایہہ کہن توں وی حجاب تے شرمندگی محسوس نہیں کردے کہ جے اوہ 1945-46؁ء دے انتخابات وچ ووٹ دین دے اہل ہوندے تے اوہ قیام پاکستان دے خلاف ووٹ دیندے۔ میں سمجھنا واں کہ جنہاں جماعتاں تے جنہاں مسلمان سیاست داناں نے قیام پاکستان دی سخت مخالفت کیتی سی پر پاکستان دے قیام دے بعد دل توں پاکستان نوں تسلیم کر لیا سی ایہناں نوں سانوں اج قابل مواخذہ نہیں سمجھنا چاہیدا تے نہ سانوں ایہناں دی پاکستان دے نال محبت اُتے شبہ کرن دا حق اپڑدا اے۔پر ایس بندے نوں وی میں قومی مجرم سمجھنا واں کہ جیہڑا 70 یا 75 سال توں پاکستان دا شہری ہوندے ہوئے وی پاکستان دے کسے ٹی وی چینل اُتے ایہہ دانشوری جھاڑ رہیا ہوئے کہ جے اوہ 1945-46؁ء دے انتخابات دے ویلے ووٹ دین دے اہل ہوندا تے اوہ قیام پاکستان دے خلاف ووٹ دیندا۔
آخر بے غیرتی، بے حمیتی تے بے شرمی دی وی کوئی حد ہوندی اے۔ کوئی بھڑوا تے دیوث وی جے اپنے ملک دے نال دل و جان نال پیار کردا اے تے اوہ لائق احترام اے تے انج دی مخلوق نوں میں بھڑووں تے دیوثوں توں وی بدتر خیال کرنا واں جنہاں دی حب الوطنی اپنے ملک نال مشکوک ہوئے۔ کوئی بندا ایہہ نہ سمجھے کہ بھڑوا یا دیوث دے الفاظ استعمال کر کے میں ڈاکٹر مبارک علی نوں گالی دے رہیا واں۔ مبارک علی نوں گالی دین دی مینوں کیہ لوڑ اے جیہڑا بندا قائداعظم نوں انگریزاں دا ایجنٹ تے قرار داد پاکستان نوں انگریز وائسرائے دا چودھری ظفر اللہ خان توں لکھوایا ہویا ڈرافٹ قرار دیندا ہوئے میرے نیڑے ایس بندا دا وجود ای اک دشنام اے۔ بلاثبوت ، بلاتحقیق، بلاجواز تے بغیر کسے وجہ دے جیہڑا بندا قائداعظم دی عظمت کردار اُتے حملہ کردا اے انج دے بدنیت، انج دے بدطینت تے انج دے بدفطرت بندے دے وجود نوں میں گالی نہ سمجھاں تے ہور کیہ سمجھاں۔مسلماناں برصغیر دے سب توں وڈے لیڈر تے مسلم راہنما قائداعظم تے تحریک پاکستان دی سچائیاں دے حوالے نال نوجوان نسلاں دے ذہناں وچ کئی دہائیاں توں بدگمانیاں پیدا کرن والے نوں میں قومی مجرم نہ کہواں تے کیہ کہواں۔ ایس نام نہاد محقق نوں ایہہ وی علم نہیں کہ برصغیر دے مسلماناں لئی اک وکھری ریاست دا مطالبہ قرار داد لہور توں وی دو سال پہلے قائداعظم دی صدارت وچ 10اکتوبر 1938؁ء نوں سندھ مسلم لیگ کانفرنس وچ اک جامع قرار داد دی شکل وچ کیتا جا چکیا سی۔ دو قومی نظریے دی بنیاد اُتے مسلماناں لئی وکھری ریاست تے ہندوئواں (غیر مسلماں) لئی وکھری ریاست دا مطالبہ پیش کرن دا اعزاز آل انڈیا مسلم لیگ توں وی پہلے سندھ مسلم لیگ نوں حاصل ہویا۔ مسلماناں دی اکثریت اُتے مشتمل صوبیاں اُتے مبنی وکھری ریاست دی مکمل آزادی دا جیہڑا مطالبہ قائداعظم دی صدارت وچ کیتا گیا سی قرار داد لہور وی حرف بہ حرف ایس دے مطابق سی۔ قرار داد لہور دا اک جزو وی سندھ مسلم لیگ کانفرنس دی قرار داد توں مختلف نہیں سی۔ نام نہاد محقق مبارک علی دے دعویٰ دے مطابق چودھری ظفر اللہ خان نے جیہڑی قرار داد تحریر کیتی سی اوہ مار چ 1940 دا زمانہ اے۔ سندھ مسلم لیگ دی 1938 وچ منظور کیتی گئی قرار داد دا مبارک علی نوں علم نہیں ورنہ اوہ ایس قرار داد دے حوالے نال وی کوئی وڈا جھوٹ تراش لیندا۔ وائسرائے لارڈ لنلتھگو نے 2 جون 1938 نوں وزیر ہند لارڈزیٹ لینڈ دے ناں اک خط وچ ایہہ وی تحریر کیتا سی کہ اوہناں نے سکندر حیات خان نال ملاقات کیتی اے تے ایس توں مدد منگی اے کہ اوہ قائداعظم نوں کسے طرح فیڈریشن (متحدہ ہندوستان) دی مخالفت توں روکن پر سکندر حیات خان ایس مشن وچ ناکام ہو گیا اے۔ محمد علی جناح اپنا نظریہ تے موقف چھڈ اُتے آمادہ نہیں۔ ایس خط توں وی ثابت ہوندا اے کہ قائداعظم مسلماناں لئی اک آزاد مملکت دے قیام دے حوالے نال اپنے عزم تے ارادے وچ اینے پکے اٹل تے مستحکم سن کہ متحدہ ہندوستان لئی لارڈ لنلتھگو دی ساری کاوشاں اکارت ہو گئیاں تے وائسرائے اپنی بے بسی تے ناکامی دا وزیر ہند دے ناں اپنے خط وچ اعتراف کر رہیا اے۔ 1938؁ء توں لے کے 1940؁ء تیکر تے فیر 1940؁ء توں لے کے 1947؁ء تیکر قائد اعظم دا ای محکم ، آہنی تے ناقابل شکست عزم تے مصمم ارادہ سی جس نے قیام پاکستان نوں ممکن بنا دتا۔ ایہو تاریخ دی سچائی اے۔ کوئی راست باز تے دیانت دار محقق، مورخ تے دانشور تاریخ دے ایس سچ توں انکار نہیں کر سکدا۔