امجد اسلام امجد تے ترک ایوارڈ

لکھت:عتیق انور راجا

ادھی صدی دا قصہ اے اک دو دن دی گل نہیں۔ جی ایہ فقرہ امجد اسلام امجد صاحب لئی باکل بالکل ٹھیک لگدا اے۔ کجھ لوک کہندے نیں کہ اوہناں نے دنیا بہت ویکھی اے کجھ لوک انج وی بیان کردے نیں کہ دنیا دے بہت سارے لوک ایہناں نوں جاندے نیں پر کجھ لوکاں بارے دنیا اعلان کردی اے کہ اسیں ایہناں صاحب نوں نہ صرف جاننے آں سگوں من دے آں۔ جی ہاں میری مراد ایتھے وی امجد اسلام امجد ای نیں۔لنگھے دسمبر وچ امجد اسلام امجد صاحب نوں ترکی دے شہر استنبول وچ نسیپ فاضل بین الاقوامی ثقافت تے آرٹ ایوارڈ نال نوازیا گیا۔ ترکی دے نال پاکستان دے تعلقات ہمیشہ مثالی رہے نیں تے ایس تقریب وچ امجد صاحب دی علمی و ادبی خدمات دے حوالے نال ترک صدر نے جہڑی تقریر کیتی اوہ بہت اہمیت رکھدی اے تے امجد اسلام امجد دے حوالے نال اوہناں نے جہڑیاں گلاں کیتیاں اوہناں توں پتہ چلدا سی کہ اہل ترک نے امجد صاحب نوں کنی گہرائی نال پڑھیا اے۔ ترکی نے امجد اسلام امجد نوں ایہ ایوارڈ دے کے سانوں احساس دوایا اے کہ تہاڈے ملک وچ اک اجیہا ہیرا موجود اے کہ جہنوں عالمی سطح تے سراہیا جا رہیا اے تے جدوں وی کسے بندے نوں کسے عالمی پلیٹ فارم تے پذیرائی ملدی اے تے اوہ صرف اک بندے دی پذیرائی نہیں ہوندی سگوں پورے ملک دی پذیرائی ہوندی اے تے امجد اسلام امجد نوں ترکی توں ملن والا ایوارڈ دراصل پاکستان نوں ملن والا ایوارڈ اے پاکستان دی ادبی ثقافتی تے علمی بڑائی دا اعتراف اے کہ امجد اسلام امجد صاحب نوں ملن والا ایہ ایوارڈ نہ صرف اوہناں لئی سگوں ایس دیس لئی اعزاز دی گل اے کہ ملک دے کسے بندے دی خدمات تے اوہدی تصانیف دی اہمیت دوجے ملکاں دی نظر وچ وی قابل ستائش بنی اے تے اپہچانی گئی اے۔ اخباراں وچ خبراں لگیاں تے میرے دیس دے علمی و ادبی حلقیاں دے نال نال عوامی سطح تے وی لوک بہت خوش ہوئے۔ بہت سارے تجزیہ نگاراں نے ایہنوں پاک ترک دوستی وچ اک خوشگوار جھونکے دا ناں دتا۔ امجد اسلام امجد دی شاعری دے عربی فارسی ترکی، چینی تے کئی زباناں وچ ترجمے ہو چکے نیں تے دنیا بھر دے لوک اوہناں دی شاعری نوں پڑھنا پسند کردے نیں تے اپنے قلم دی طاقت نال اوہناں نے بہت سارے ملکاں وچ پاکستان دا ناں اُچا کیتا اے۔ جتھے جتھے لوکاں نوں شاعری یاں ڈرامے دا شوق اے اوتھے اوتھے موصوف نوں ہر دلعزیز شاعر تے محبوب لکھاری دی حیثیت حاصل اے کسے مشاعرے وچ اوہناں دی رلت مشاعرے دی کامیابی سمجھی جاندی اے۔ اک چنگے شاعر اک چنگے ڈرامہ نگار اک چنگے مقرر اک چنگے ترجمہ کار دے نال نال اوہ اک بڑے چنگے انسان وی نیں تے اوہناں دی شخصیت وچ دوستی، اپنائیت تے خلوص دا پہلو نظر آندا اے اوہناں دی محفل وچ بیٹھدیاں ای تسیں نکے وڈے تے دوجے طبقاتی فرق نوں بُھل جاندے او۔ شاید ایسے لئی اوہ اک ہر دلعزیز انسان اے کہ اوہ سب نوں نال لے کے چلدے نیں ہلکا پھلا مزاح اوہناں دی شخصیت دی خاص خوبی اے تے جہڑی محفل وچ موجود ہون اوہنوں علم و حکمت دے موتیاں دے نال نال اپنے خوبصورت فقریاں نال چار چاند لاندے وکھائی دیندے نیں۔ اسیں کہہ سکنے آں کہ امجد صاحب نوں جہڑی عزت و شہرت ملی اے اوہ بڑی گھٹ لوکاں دے حصے وچ آندی اے۔ 50ورھیاں تے محیط کیریئر وچ اوہناں نے 40توں ودھ کتاباں لکھیاں نیں۔ ٹی وی لئی ادبی کم کرن تے اوہناں نوں بہت سارے ایوارڈز مل چکے نیں، جہدے وچ پرائیڈ آف پرفارمنس تے ستارہ امتیاز وی شامل نیں۔ امجد صاحب وارث سنے پاکستان ٹیلی ویژن کارپوریشن لئی کئی ڈرامہ سیریز دے مصنف نیں۔ اوہناں نے بہت سارے کالم، ترجمہ، تنقید تے مضامین لکھے نیں جد کہ اوہناں دی مرکزی توجہ اردو نظم رہی۔ ویکھیا گیا اے کہ مشاعرے وچ عموماً شاعر زیادہ تر غزل ای پڑھدے نیں تے سنن والیاںتوں غزل نوں ای زیادہ پذیرائی ملدی اے پر امجد اسلام امجد دا بنیادی تعارف اک نظم گو شاعر دے حوالے نال بن چکی اے تے اوہناں دیاں نظماں دی جہڑی پذیرائی ملی اے اوہ بڑے گھٹ شاعراں دے حصے وچ آئی ہووے گی۔ پسندیدگی دا عالم تے ایہ اے کہ لوک اوہناں توں نظماں دا ناں لے کے فرمائش کرکے سن دے نیں۔ اک نظم کجھ انج اے۔
اگر کبھی میری یاد آئے
تو چاند راتوں کی دلگیر روشنی میں
کسی ستارے کو دیکھ لینا
اگر وہ نخل فلک سے اڑ کر تمہارے قدموں میں آگرے تو
یہ جان لینا وہ استعارہ تھا میرے دل کا
اگر نہ آئے تو
مگر یہ ممکن ہی کیسے ہے کہ تم کسی پر نگاہ ڈالو
تو اس کی دیوار جاں نہ ٹوٹے
وہ اپنی ہستی نہ بھول جائے
اگر کبھی میری یاد آئے
گریز کرتی ہوا کی لہروں پہ ہاتھ رکھنا
میں خوشبوئوں میں تمہیںملوں گا
مجھے گلاب کی پتیوں میں تلاش کرنا
میں اوس قطروں کے آئنوں میںتمہیں ملوں گا