این سی او سی دا مثالی ماڈل

پاکستان وچ صحت دا شعبہ ہمیشہ کمزور رہیا اے بلکہ ہر حکومت نے ہمیشہ صحت تے تعلیم اُتے بوہت گھٹ بجٹ خرچ کیتا اے

قیوم نظامی

کووڈ 19 اک عالمی وبا سی جس نے دنیا دے امیر ترین ترقی یافتہ طاقتور ملکاں نوں وی بے بس کر کے رکھ دتا۔ پاکستان اک غریب مقروض، پس ماندہ ملک اے جس دے عوام اک قوم نہیں بلکہ ہجوم نیں۔ اوہ مختلف زباناں بولدے نیں تے ایہناں دا کلچر تے ثقافت مختلف اے۔ پاکستان سیاسی تے مذہبی حوالے نال وی اک منقسم ملک اے۔ ایہناں حالات وچ پاکستان دے عوام نوں کرونا وبا دے سلسلے وچ اک پیج اُتے لیانا تے ایہناں دے رویاں نوں تبدیل کرنا کوئی آسان کم نہیں سی۔ آئی ایس پی آر پاکستان دا بہترین عسکری ادارہ اے جس نے اپنی مہارت تے صلاحیتاں نوں پوری دنیا توں تسلیم کرایا اے۔ آئی ایس پی آر نے عالمی وبا دا مقابلہ کرن لئی عوامی بیداری تے آگاہی دا مشکل چیلنج قبول کیتا۔ دنیا دے کامیاب تجربیاں دا سنجیدہ مطالعہ کرن دے بعد عوا، رسم و رواج تے مزاج دے مطابق ذرائع ابلاغ اُتے پروپیگنڈا لئی اک جامع پالیسی مرتب کیتی تے قومی صوبائی مقامی ذرائع ابلاغ اُتے کاکامیاب مہم چلا کے عوام نوں ماسک لان، ویکسین لگوان تے دیگر حفاظتی تدبیراں اختیار کرن اُتے آمادہ کیتا تے پاکستان ایس قابل ہو سکیا کہ اموات دی شرح نوں گھٹ رکھ سکے۔ ایس ضمن وچ آئی ایس پی آر دا کردار قابل ستائش اے تے پاکستان دے عوام ایس مثالی ادارے اُتے فخر کردے نیں۔ وفاقی حکومت دی وزارت اطلاعات و نشریات سیاست دی چیمپئن بن کے رہ گئی اے، ایہنوں وی اپنی استعداد تے معیار وچ وادھا کرنا چاہیدا اے۔
صحت صوبائی شعبہ اے، پاکستان وچ صحت دا شعبہ ہمیشہ کمزور رہیا اے بلکہ ہر حکومت نے ہمیشہ صحت تے تعلیم اُتے بوہت گھٹ بجٹ خرچ کیتا اے۔ پاکستان وچ صحت دا کمزور نظام ہر گز ایس قابل نہیں سی کہ عالمی وبا دا مقابلہ کر سکدا تاں وفاقی سطح اُتے این سی او سی دے ناں توں اک مضبوط تے بااختیار ادارہ قائم کیتا گیا جس وچ سول تے عسکری اداریاں تے سارے صوبیاں نوں نمائندگی دتی گئی۔ وزیراعظم عمران خان نے ایس ادارے دی سربراہی وفاقی وزیر منصوبہ بندی اسد عمر نوں دتی جیہڑے کارپوریشنز چلان دا وسیع تجربہ رکھدے نیں تے حب الوطنی دے جذبے نال سرشار نظریاتی سیاست دان نیں۔ اوہناں نے این سی او سی نوں وفاقی وزیر دی حیثیت نال نہیں بلکہ ادارے دے سربراہ دی حیثیت نال چلایا تے ہر فیصلے وچ سارے صوبیاں دے سیاسی تے انتظامی لیڈراں نوں اعتماد وچ لیا ۔ سارے فیصلے صاف شفاف انداز وچ مشاورت نال کیتے گئے۔ اوہناں نے بیورو کریسی اُتے انحصار کرن تے فیصلیاں نوں لال فیتے دا شکار کرن دی بجائے تیز رفتار تے نتیجہ خیز نظام وضع کیتا۔ کرونا دے سلسلے وچ سارا ڈیٹا اکٹھا کیتا گیا۔ سمارٹ لاک ڈائون دی پالیسی اُتے عمل کیتا گیا تاکہ دیہاڑی دار متاثر نہ ہون۔ لاک ڈائون دی وجہ نال جیہڑے غریب تے محنت کش عوام متاثر ہوئے وزیراعظم پاکستان نے ایہناں لئی احساس پروگرام دے تحت ارباں روپئے دے فنڈز جاری کیتے تے ایہناں دے گھراں اُتے اپڑائے گئے جس دی وجہ نال ایہناں نوں ریلیف ملیا تے پاکس تان اک سنگین بحران توں محفوظ رہیا۔ ہسپتالا ں اُتے بوجھ گھٹ کرن لئی سارے وڈے شہراں وچ ویکسین لان تے علاج لئی علیحدہ انتظامات کیتے گئے۔ وینٹیلٹرز دا ذخیرہ موزوں تعداد وچ رکھیا گیا۔اضافی انتظامات ایس قدر شاندار سن کہ سارے شہریاں نے ایہناں انتظاما ت دی تعریف کیتی۔ ڈیٹا بیس حکمت عملی تشکیل دتی گئی تے این سی او سی نے ہر حوالے نال دنیا دے ساہمنے اک مثالی ماڈل پیش کیتا جس نوں پاکستان دے عوام نے اتفاق رائے نال سراہیا تے عالمی رائے عامہ نے وی تعریف کیتی۔ افواج پاکستان نے وی وبا دا مقابلہ کرن لئی حسب روایت قابل تحسین کارکردگی وکھائی۔
این سی او سی دے چیئر مین اسد عمر نے اپنی وزارتی ذمے داریاں وی احسن طریقے نال انجام دتیاں تے ترقیاتی منصوبیاں نوں سست روی دا شکار نہ ہون دتا۔ لیفٹیننٹ جنرل حمود الزماں نے این سی او سی وچ پاک فوج دی نمائندگی کیتی جد کہ ڈاکٹر فیصل سلطان نے وی قابل ستائش کردار ادا کیتا۔ پنجاب دی وزیر صحت ڈاکٹر یاسمین راشد نے کینسر دی بیماری دے باوجود جس جوش جذبے تے ہمدردی نال کم کیتا ایس دی تاریخ وچ مثال گھٹ ای ملدی اے۔ سی این او سی دے بے مثال کامیاب تجربے نال ثابت ہویا کہ جے ادارہ جاتی ذمہ داریاں اہل دیانت دار تے پر عزم بندیاں دے حوالے نال کیتیاں جان تے پاکستان اپنے قومی و عوامی مسائل بہتر طور تے حل کر سکدا اے۔ کاش وزیراعظم عمران خان اپنی ٹیم وچ لوکاں نوں اہلیت تے میرٹ اُتے شامل کردے تے اج ایہناں نوں مختلف نوعیت دی مشکلات دا سامنا نہ کرنا پیندا۔ اوہناں نے کرونا وبا دا مقابلہ جس عزم تے تدبر نال کیتا۔ ایس دا نہ صرف ایہناں دے حامی بلکہ ایہناں دے مخالفین وی اعتراف کردے نیں۔ ایس سلسلے وچ صحت دے شعبہ نال منسلک ڈاکٹر تے دیگر سٹاف دے بندے وی ستائش دے حقدار نیں کہ اوہناں نے اپنی جاناں دی پرواہ نہ کردے ہوئے کرونا دے مریضاں دا علاج کیتا تے ایس سلسلے وچ اپنی جاناں دے نذرانے وی پیش کر دتے۔
پاکستان دے عوام وی خراج تحسین دے مستحق نیں کہ اوہناں نے نظم و ضبط تے صبر دا مظاہرہ کردے ہوئے مشکل حالات دا مقابلہ کیتا تے حکومتاں لئی کوئی مسائل پیدا نہیں کیتے۔ دعا اے کہ اللہ تعالیٰ موذی وبا توں ساری دنیا تے پاکستان دے عوام نوں محفوظ و مامون رکھے تے مزید کسے ازمائش وچ نہ پائے۔
پاکستان وچ قتل و غارت گری دے واقعات ودھدے جا رہے نیں۔ مالا کنڈ وچ پاکستان جاگو تحریک دے نوجوان ضلعی صدر تے سوشل میڈیا ایکٹیوسٹ محمد زادہ آگرہ نوں نامعلوم بندیاں نے قتل کر دتا۔ پاکستان جاگو تحریک دے مرکزی سینئر نائب صدر محترم ظفر صراف مرکزی کوآرڈینیٹر محترم مبشر اقبال خیبر پختونخوا دے سینئر نائب صدر محترم حاجی شفیق رحمان تے دیگر بیدار دوستاں نے مالا کنڈ وچ شہید دے پنڈ جا کے ایہناں دے عزیز و اقارب نال اظہار تعزیت تے اظہار یکجہتی کیتا تے ایہناں نوں یقین دلوایا کہ پاکستان جاگو تحریک انصاف دے حصول لئی تے قاتلاں نوں بے نقاب کرن تے ایہناں نوں کیفر کردار تیکر اپڑان لئی ہر ممکن جدوجہد کرے گی تے محمد زادہ آگرہ دا لہو رائیگاں نہیں جائے گا۔