ہنہ اُداس ہے، حرف تاباں ہور قلم کہانی دا خالق بلوچستان دا مان

ناں فرید اللہ تے قلمی ناں شیخ فرید اے، 20مارچ 1963ء نوں کولپور بولان چہ پیداہوئوے تے والد صاحب دا ناں بھیکو میاں سی ،او ریلوئے چہ ملازم سن شیخ فرید نیں بلوچستان یونیورسٹی توں ایم اے صحافت کیتا تے علوم شرقیہ چہ اُردو فاضل ہور بی ایڈ نیں عملی زندگی دا آغاز بطور سکول اُستاد کیتا اینہاں دا تعلق قریشی قبیلے دی شاخ نال اے تے اینہاں دے پیو تقسیم ہند توں بعد پاکستان آ گئے سن تے فیر بلوچستان پہنچے اینہاں دے نانقے تے دادقے ہندوستان دے ضلع گجرات دے شہر احمد آباد چہ رہندے سن دادا دا تعلق زمینداری نال سی تے او سونف تے زیرے دا کاروبار کردے سن تے اَج
وِی ایہناں دا پرانا خاندان احمد آباد چی اک اسلامی ادارہ مدرسہ الاسلام چلا رہیا اے ۔ اینہاں دے پیو ریلوے چہ ملازم سن تے ملازمت دے دوران ای اونہاں دا چلنا ہوگئیا شیخ فرید دیاں تن بہناں تے تن ای پرا نیں جیڑے ہن کوئٹہ چہ مقیم نیں ۔شیخ فرید 1980ء توں ادب چہ سرگرم اے ،تے اُوھدوں پروفیسر صابر بولانوی دے نال نو عمری توں پیردا ہوندا سی تے شاعری سکھن دا بڑا چا سی بلکہ او ادب نال چیچا لگائو رکھدا سی تے کئی پروگراماں چہ نعت خوانی وی کردا سی۔وقت نیں اُوس دے جذبے دِی قدر کیتی تے وقت دِی کسوٹی تے سُچا اتریا تے فیر فرید اللہ توں شیخ فرید بن گئیا۔اینہاں نیں بطور بالاں دے لکھاری کم شروع کیتا سی ہن اک سُچا مدبر، دانشور، ادیب، افسانہ نگار ،شاعر تے صحافی بنیا تے ہن ایس معاشرے چہ ادب لئی بڑا کم کر رہیا اے ،اے بلوچستان دے کئی نامور اخباراں دے وچ ادارتی ذمہ داریاں نبھا رہیا اے تے روز نامہ مشرق نال وی کئی سال کم کیتا اینہاں نیں بلوچستان رائٹرز گروپ برگ دے ناں توں اک ادبی تنظیم بنائی تے ہن اوس تنظیم دا ناں بلوچستان رائٹرز گلڈ برگ رکھیا ہویا اے۔
راقم نال شیخ فرید دی واقفیت 1980ء توں اے جیدوں اسی بحیثیت بالاں دے لکھکھ روزنامہ مشرق ہور اک ہور مقامی اخبار چی بالاں دے صحفے لئی اپنی لکھتاں جمع کران جاندے ساں ۔ ایہوئے اے واقفیت جان پہچان ہور فیر 1983,84ء چہ میرے اُستاد جناب عبدالحمید کرد ”مرحوم ” دے کول بیھ کے اسی واقفیت توں دوستی چہ بدل گئی فیر شیخ فرید کئی اخباراں چہ بطور آرٹ ایڈیٹر منسلک ہویا ہور کئی روزنامہ اخباراں چہ کم کردا رہیا 1986ء نوں میں وِی بطور آرٹ ایڈیٹر کم شروع کر دیتا تے تے لکھن لکھان دا شوق روزی چہ بدل گئیا۔
2006ء نوں اینہاں دا پہلا افسانوی پراگہ”ہنہ اُداس ہے” شائع ہویا جیدے چہ 26افسانے شامل سن تے کئی افسانے اینے نیکے نیکے سن کہ او افسانچہ دے زمرے چہ آندے سن ، پر اینہاں افسانیاں دے لکھن آلے دی سوچ توں پتا چلدا اے کہ او تعمیری سوچ دے مالک نیں ۔
اینہوں ادبی حلقیاں چہ بڑا پسند کیتا گئیا بلوچستان دے معروف لکھکھ جناب ڈاکٹر انعام الحق کوثر ”مرحوم ” دی صدارت چہ ایس کتاب کی تقریب رونمائی ہووئی تے شیخ فرید دِی شخصیت تے لوکاں نیں گل بات کیتی۔فیر 2008ء نوں اینہاں دِی دوجی کتاب ”حرف تاباں ” آئی ایس نثری کتاب چہ اینہاں دے کئی اخباراں چہ شائع ہون آلے کالم شامل نیں ،شیخ فرید دا تعلق ہمیش بالاں نال جڑیا رہیا اے او ناصرف اک خوبصورت ذہن دے مالک نیں بلکہ اک اُستاد وِی نیں تے اینہاں دی تعلیمی خدمات وِی بہوت نیں اینہاں نیں بالاں دے ادب لئی بڑا جاندار کم کیتا اے کیونکہ اے آپ وِی بالاں دے لکھکھ رہے نیں ایس لئی بالاں لئی ادب چہ وِی اینہاں نیں کم کر ن دے نال نال اونہاں نوں لکھن دی ترغیب وِی دیتی اے تے اے بالاں دے اک مشہور اخبار ”بچوں کا اخبار” رسالے دے ایڈیٹر وِی رہے نیں
کئی کئی خوبیاں دے مالک شیخ فرید نیں اک ادبی تنظیم بلوچستان رائٹر گروپ برگ دے ناں توں قائم کیتی جیدا ناں ہن بدل کے بلوچستان رائٹرز گلڈ برگ کر دیتا گئیا اے۔ ہن حال ای چہ اینہاں دِی تیجی کتاب ”قلم کہانی ”شائع ہوئی اے اے وِی کئی اخباراں چہ چھپن آلے کالموں تے مشتمل اے۔