سکہ رائج الوقت

سکہ رائج الوقت دی اصل حقیقت اودوں کھلدی اے جدوں 1857 دے ساڈے بقول جنگ آزادی تے بقول انگریز حکمران دے غدر دا ارتکاب ہوندا اے اوس ویلے سکہ لکھ کے بادشاہ دے حضور گزارنا تے شدید سوالات دی بوچھاڑ اے تے غالب ایہ سکہ اپنے ناں توں منسوب ہون دی پاداش وچ پنشن توں فارغ کر دتے جاندے نیں کوئی موڈی اخبار سازش توں پکڑ دھکڑ دے زمانیاں وچ مذکورہ سکہ غالب توں منسوب کر دیندا اے تے مرزا نوشہ کم سخنی و کم ابلاغ دے اوس زمانے وچ متذکرہ اخبار دی خبر غلط ثابت کرن لئی دن رات اک کر دیندے نیں مرزا یوسف توں مدد منگدے نیں کہ پہلی واری جتھے چھپیا سی اوہ اخبار مل جاوے تے ایہ پنشن بند کروان والی اخبار نوں جھوٹا قرار دوا کے کمشنر توں دوبارہ اپنی پنشن جاری کروائی جاوے ہن ایہ سکہ وی قارئین دی نظر توں گزارنا ضروری اے اوس ویلے دے اہتمام وچ بادشاہ دے حضور گزارنا کہندے سن کیوں جے ساڈے لوک وی بادشاہ توں گھٹ نہیں ایس لئی ملاحظہ کرو۔
یہ زرذوسکہ کشور ستانی
سراج الدین بہادر شاہ ثانی
فارسی توں بہرہ مند فرنگی کمشنر طلبی کردے نیں تے کہیا کیہ حیلے سنیے ایہ سکہ تے بادشاہ دے تخت پوشی تے کہیا گیا تے بادشاہ آپ شاعر اوہدے پتر شاعر اوہدے نوکر شاعر کسے نے وی کہہ دتا ہووے گا فیر انج وی ایہ تے بہت سارے شاعراں نے مضمون بنھیا اے مارے باندھے یاں رغبت توں کیہ معلوم’ بہرطور کمشنر مصلحتا چپ اے تے اوہ ہفتے بعد جاندے ہوئے پنشن بند تے کہرام شروع مرزا ثابت کرن تے تل جاندے نیں کہ ایہ ہووے نہ ہووے استاد ذوق نے کہیا اے جو لوک ادب دے قاری نہیں اوہناں دی اطلاع لئی استاد ذوق توں مرزا نوشہ دی گہری چپقلش سی۔
غالب چوہدری عبدالغفور سرور نوں اک خط وچ لکھدے نیں جناب چوہدری صاحب اج دا میرا خط کاسہ گدائی اے بعد وچ تفصیل توں ایس اخبار دے پچھلے پرچیاں دا ریکارڈ طلب کردے نیں جہدے توں ایہ ثابت ہووے کہ تخت نشینی دے وقت دو سکے استاد ذوق نے گزارنے سن’ اوہناں وچوں اک ایہہ وے جہدی پاداش وچ اوہناں دی لگی لگائی آمدنی چلی گئی خلعت و دربا روی مٹیا تے ریاست دا نام و نشان وی گیا تریخ دے دوجے حوالیاں توں علاوہ معین الدین حسن خان نے حذنگ غود وچ لکھیا اے کہ لکھنو توں جو اشرفیاں آئیاں اوہناں تے ایہ شعر لکھیا سی:
یہ زرذدسکہ نصرت طرازی
سراج الدین بہادر شاہ غازی
خیر ایہ ان گنت سکے مندرج نیں جو حقیقی تخت نشیناں دے ہاں گزارے جاندے نیں خلعتاں پائیاں جان دربار مسند مناسب نشست تے وظیفے ایہدی برکت نال سن غالب تے اپنے آپ نوں مبرا ثابت نہ کر سکے تے شکوہ کردے رہے کہ بنگ گھر دا اوناں جرم نہیں جناں وڈا جرم دو مصرع بنا دتے گئے۔ تے قارئین ایہہ وے کہ سکہ رائج الوقت ایس ویلے جس کاغذی بادشاہ دا سکہ چل رہیا سی تے ایہدے حواری و مخالف جو بعد وچ ای ہو سکدے سن بڑے اعلیٰ پائے دے ادیب سن ایہدے وچ شک نہیں کہ ادب دے پیراہن وچ وی سخن طرازی خلعت و القاب دی رہین منت رہی حکمران دا قرب باعث نشاط رہیا سر فخر نال بلند رہے اجہے وچ جدوں دہلی دے تخت تے دو دو متوازی حکومتاں چل پئیاں تے شعراء تے ادباء نوں حقیقی کرب چوں گزرنا پیا کہ کہدی پوجا کریئے تے گزشتہ عبارت دے محراب کیوں جے پیشانی توں ہٹائیے فرق ایہہ وے کہ دوجے شعبیاں دے لوکاں نوں ایس طعنہ زنی دا سامنا نہیں جو اج دے ادیب نوں اے منافقت ایہہ وے کہ منیا نہیں جاندا کہ تخت توں قربت دے خواب اداریاں توں کم کڈھوان دے واسطے ویکھے جاندے نیں تے صوفی ہون دے دعوے کیتے جاندے نیں بے نیازی دے جھنڈے گڈے جاندے نیں۔
آخر ایہ انکار کیوں؟ کس لئی شعروادب دے باوا آدماں نے تے کھلم کھلا خوشامد کیتی’ قصیدے لکھے اوہناں تے ناز وی کیتا سارے شعراء اک دوجے توں اگے ودھن لئی کمشنر و فرنگی افسراں لئی بے اندازا قصیدے لکھدے رہے اوہناں دے دفتراں وچ رسائی لئی اڈی چوٹی دے زور لاندے رہے محفل وچ اگے پچھے نشیب و فراز دی نشستاں دا ایناں جھگڑا سی کہ الاماں الحفیظ۔ مولانا ابوالکلام آزاد اک مقالے وچ لکھدے نیں قصیدہ دی مد وچ مرزا غالب دا اک غیرمطبوعہ وغیر مدون قصیدہ در مدح میکوڈ بہادر
کرتا ہے چرخ روز بصد گونہ احترام
فرمانروائے کشورپنجاب کو سلام
ایہدے وچ آخر وچ سخن گسترانہ گل سنو کوئی دربار منعقد ہویا جہدے وچ مرزا صاحب نوں وی سدیا گیا پر اوتھے نشست و ترتیب دا حسن انتظام نہیں سی تے ایس روش نوں بطور خاص وی کیتا جاندا سی اوہناں نوں اک بڑی ادنیٰ صف وچ سیٹ ملی متاسف تے ہوئے گزشتہ محفلاں دی دھول اکھاں وچ سی کہیا:
اس بزم پرفروغ میں اس تیرہ بخت کو
نمبر ملا نشیب میں ازروئے اہتمام
پچھلی دہائی توں صوفی خواتین تے صوفی مرد بہت آ گئے نیں مارکیٹ وچ حالاں ذاتی طور تے ویکھ چکی آں ایہناں ورگا طالع آزما تے موقع پرست کوئی نہ ہووے گا ایہ صوفی اچے رُکھاں تے براجمان نیں پورا شہر چلاندے نیں ہر آن والی گورنمنٹ اوہناں دی ہوندی اے تہاڈی تے ساڈی نہیں تسیں پی ٹی آئی والے ہو بھاویں مینوں پی ایم ایل این سمجھو اسیں سارے مخلص رہے اصل وچ اوہ صوفی طبقہ اے جو ہر دور وچ دربا روچ اکتارا بجاندا اے تے جہدے سُراں دی دھن اینی دلنشین اے کہ حکمران طبقہ مسحور ہو جاندا اے۔
اپنے آپ نوں کنے ای خانیاں وچ پارٹیاں وچ ونڈ لوو کسے توں سانوں کجھ فیض نہ ہووے گا تے اوہ صوفی فقیراں دا بے نیاز رائٹسٹ ٹولا پوری پرات لے اڑے گا ہر دور دے فیضاب ایہو دعوت نودو نیں ایس لئی آپس وچ مت لڑو کہ سکہ رائج الوقت اج دے ابن الوقت دے ہتھ وچ اے مہرتصدیق وی اوہناں دی بادشاہ وی اوہناں دا خلعت وی دربار وی۔ اے نشیبی نشست وچ بیٹھن والیو اپنے آپ نوں ہلکان نہ کرو تہاڈے نصیب وچ لیڈر نہیں رہنما نہیں اپنا راہ آپ لبھو۔٭٭