جھنگ دے پنجابی ادب دا تریخی پچھوکڑ

Syed Tahir Shirazi

ایہناں دا کلام ویکھو:
پڑھ پڑھ مورکھ رمز نہ پائیا
داہڑی ہوئیا چٹی
ڈنگی پگڑی آکڑ ٹرنائیں
نظر کیویں ہیئی پھٹی
دانے جھاڑ بنایا بُچڑی
پھر سِرے تے سِٹی
جیویں کیویں عمر ناں راہسی
پھر مٹی دی مٹی
میاں مراد بھٹی (1850ء – 1773ئ) ہوراں جھنگ دے نیڑے ہک تھینہہ کوٹ سلطان اچ جمے۔ سعید بھٹا ہوراں نے ایہناں دا کلام لبھیا تے ”سر سانویں رتی پریت” دے ناں توں چھاپے چاڑھیا۔
چھڈ حرص ہوا اے حارص توں
منگ مست محبت وارث توں
ہک دم نہ ملسی پارس توں
باقی رب ستار اے
میاں ابو لالی (1850ئ، م ) میاں صدیق لالی دے پوترے ھن۔ سی حرفی راہیں اپنے وچار سانجھے کیتے ایہناں دا کلام ”کلیات لالی” وچ ملدا اے۔
ز:زہر پیالا ملیا ہتھ میرے
ہک سک دوا تیری چھک مائے
وچ شہر ساڈے جوگی آ وڑیا
ونج پچھو اڑیو کہڑی فال پائے
پدھ مک گئے، کجھ دن رہندے
جوگی دس گیا مڑ انگ لائے
آ دتی سوہنی کانگ ابو
آ ویکھو سئیو ہُن خط آئے
میاں یوسف لالی (1866ئ) وی میاں صدیق لالی دے پوترے نیں۔ مرزا صاحباں دے قصے نظم دے انگ پیش کیتا۔
ایہناں دے کلام دا نمونہ ویکھو:
عشق پچھے فرہاد نے دتی پتھروں نہر وگا
مجنوں تائیں ماریوس، جنگل وچ سکا
واری آ گئی کھرل دی جہڑی کرے خدا
آیا کول معشوق دے، کھلا سیس نوا
شاہ عظیم (1778ء پ) جہلم تے چنھاں دے وچکارلے علاقے وچہن دے رہون آلے ھن۔ ایہناں نواب مظفر خان تے احمد خان سیال دی پوڑیاں لکھیاں۔ کجھ دوہڑے وی لکھے۔ ایہناں دا کلام ”کلیات شاہ عظیم” دے ناں توں سعید بھٹا ہوراں نے سودھ کے چھاپیا اے۔ (جاری اے)

اپنا تبصرہ گھلو