”کہانی اک ماں دی” دا مکھ وکھالی اکٹھ

پنجابی دے اگھے کہانی کار’ ناول کار’ شاعر تے استاد زاہد حسن ہوراں دے نویں ناول ”کہانی اک ماں دی” دا مکھ وکھالی اکٹھ” انجمن ترقی پسند مصنفین ولوں پاک ٹی ہائوس وچ ہویا۔ جہدی صدارت اجوکے سمے دے اگھے شاعر تے کہانی کار رائے محمد خاں ناصر ہوراں کیتی۔ ناول بارے گل بات آزاد مہدی’ خاور جپا’ رائے محمد حسن’ شہزاد نیر’ امجد طفیل تے صاحب صدارت رائے محمد خاں ناصر ہوراں کیتی۔
اجوکے سمے دے وکھرے سبھادے ناول کار تے کہانی کار آزاد مہدی ہوراں دا آکھناں ایہہ اے جو تخلیقی صنفاں وچوں جو اک صنف تہاڈے توں ویلا’ محنت تے توجہ منگدی ہے اوہ اکو اک صنف ناول ای ہے تے زاہد حسن ہن ایس لئی وی اپناں آپ منوا چکیا ہے جو اوس دو کہانی پراگیاں دے نال نال پنج ناول وی لکھ چکیا ہے۔ اتوں اوس جیہڑا نواں ناول لکھیا ہے گمان ہے جو ایہدے وچ تھوڑے توں ودھ ھڈ بیتی لگدی اے۔ کسے وی لکھن والے واسطے ایہہ سبھ توں اوکھا کم کسے قریبی عزیز نوں یاں اپنے آپ نوں فکشن دا موضوع بنانا ہے۔ میں آپ اج کل اک ناول اپنی دھی بارے لکھ رہیاں تے جس اوکھی صورتحال وچوں لنگھ رہیاں تے میں سمجھداں جو زاہد حسن ایس توں وی اوکھی گھاٹی توں لنلگھ کے آیا ہووے گا۔ خاور جیا ہوراں دا آکھناں آہا جو زاہد حسن ہوریں اج کل گورنمنٹ کالج یونیورسٹی’ لہور وچ میرے ایم فل پنجابی دے کلاس فیلو نیں’ پہلے تاں میں سمجھیا جو شاید اوہ ساڈے استاد نیں پر بعد وچ پتہ چلیا جو نہیں اوہ ساڈے کلاس فیلو ای نیں’ پر ہولی ہولی جدوں ایہناں بارے پتہ لگا جو اوہ تاں ایناں زیادہ کم کر چکے نیں تے اینے زیادہ ایوارڈ حاصل کر چکے نیں۔ مسعود کھدر پوش’ کانگاں’ وارث شاہ ایوارڈ سنے ڈھاہاں ایوورڈ دے وی جیتو نیں۔ ہور تے ہور جی سی دے بی اے آنرز پنجابی وچ اوہناں دا ناول ساڈے کورس دا حصہ اے۔ کنے ای طالبعلم اوہناں اپر تھیس کر چکے نیں تے ہن وی ہور رہے نیں’ رائے محمد حسن اک ذہین تخلیق کار’ استاد تے پارکھ ہون دے نال نال سائو بندے نیں’ انجمن ترقی پسند مصنفین دے چھتر چھاویں ہون والے اجلاس وچ بھرواں مضمون پیش کیتا۔ اوہناں دا آکھناں آہا ”کہانی اک ماں دی” زاہد حسن ہوراں دا پنجواں ناول اے’ ایس توں پاہلوں اوہ چار ناول لکھ چکے نیں۔ ایس ناول نوں پڑھدیاں ہویاں ایہہ ساریاں شیواں محسوس ہوئیاں کہانی اک ماں دی تے دھرتی دا لینڈ سکیپ اک ای ہے۔ صرف ویلے دا فرق اے۔ ساندل بار وچ کالونیل دور تسی دھرتی راہیں ساہمنے آوندا اے جد کہ کہانی اک ماں دی’ آزادی توں بعد ساندل بار دے وسیب نوں لکھاری اپنی ماں دی کہانی راہیں ساہمنے لیاندا اے۔
شہزاد نیر ہوراں دا آکھنا آھا جو زاہد ہوراں پنج چھ مہینے پہلاں مینوں ایہہ ناول دتا آھا’ پنجابی نوں پڑھن دی عادت نہ ہون وجہوں تھوڑاسمے ضرور لگا۔ پر جتھوں تیک پنجابی فکشن بارے میرا مطالعہ اے’ تکنیک تے اسلوب پکھوں ایہہ اک وکھرا ناول اے تے ماں بارے جس سوہنے تے سچجے ڈھنگ نال ایہناں لکھیا اے۔ ایس ایہنوں نویں پنجابی ادب وچ اک خاص مقام دے دتا ہے۔ ھن ایہہ کہانی پنجاب دی تے زاہد دی ماں توں ودھ کے دنیا دی مال دی کہانی بن گئی اے۔ ایس پکھوں ایہہ ناول پنجابی زبان تے ادب وچ اک خاص مقام بنا لوے گا۔
اگھی شاعرہ تے کہانی کار رخشندہ نوید ہوراں موسم دی خرابی وجہوں واٹس ایپ راہیں گھٹ ودھ ویہیہ توں پنجھی منٹ دی تفصیلی گل بات راہیں ایہہ دسیا جو زاہد ہوراں اک انوکھے موضوع اپرہوں بھرویں تے سوہنے ڈھنگ نال ناول لکھیا اے۔ اوہناں جتھے لکھن ڈھنگ وکھرا تے سوہناں اپنایا اے اوتھے ای اوہناں’ کہانی اک ماں دی وچ پنجاب دے پورے وسیب کلچر تے اوہدے وچ پنجابی عورت دے کردار نوں بڑے بھرویں طور تے بیانیا اے۔ میں ماں دے حوالے نال آپ وی اج کل ماں نال رہ رہی تے لکھ رہی آں ایس وجہوں وی سانوں ایہہ ناول وکھرا لگدا اے۔
نامور کہانی کار تے نقاد امجد طفیل ہوراں آکھیا جو زاہد حسن نے مسلسل پنجابی وچ لکھ کے تے چنگا لکھ کے تے اوس لکھے تے کنے ای وڈے تے اہم ایوارڈز لے کے ایہہ منوایا جو ہن اک پنجابی ادیب خاص طور تے پنجابی فکشن رائیٹر دے اوہدے وکھری حیثیت بن چکی اے اوہدا مطالعہ وی ڈونگھا اے تے مشاہدہ وی یقینا اوہ ہور چنگے تے سوہنے ناول لکھے گا۔
نامور شاعر تے کہانی کار رائے محمد خاں ناصر ہوراں دا آکھنا آہا جو میری زاہد ہوراں نال ملاقات گھٹ ودھ باراں سال پہلے ہوئی اوس ویلے وی اوہ اک ادی پنجابی لکھن ہار وانگ جانے جاندے ہائن پر پچھلے یاراں ورھیاں وچ اوس جس طرح فکشن خاص طور تے ناول کاری وچ بڑی محنت تے ادم نال کم کیتا تے ھن اوہ اک منے پرمنے ناول کار کہانی کار’ شاعر تے سوجھوان وجہوں مشہور نیں’ میری نیک تمنا والی تے سدھراں اوہناں نال نیں۔ اوہ آئے دینہ اک وڈا کم کردے تے ساہمنے لیاندے نیں تے حیران کر دیندے نیں۔ مینوں آس اے جو آون والے ویلے وچ ہور وی بہوں ودھیا کم کرن گے۔ میں اج دی تقریب واسطے انجمن ترقی پسند مصنفین دا وی شکر گزار آں۔