مہینا وار پرچاکاری

رسالا پنج دریا20×30/8 سایز دے 56 کو صفحے اتے مشتمل ہوندا سی جد کہ 1970 وچ ایہنوں عام ڈائجسٹ سایز وچ کر دِتا گیاجہدے صفحے عام طور اتے 112 ہوندے سن جہڑے بعدوں گھٹ کے 96 تے کدی 80 رہ گئے۔ رسالے وچ معیاری ادب چھپدا سی نظماں غزلاں کہانیاں تے مضموناں توں وکھ پڑھنہاراں دے خط وی چھاپے جاندے سن۔ ایس رسالے نے کوئی ویہ سال تیکر ادب تے قاری دا رِشتا جوڑی رکھیا۔
1969 وچ ایس رسالے نے بڑا معرکے دا وارث شاہنمبر شائع کیتا جہڑا دو جلداں اتے مشتمل سی۔
ڈائجسٹ رسالا بنان دے بعد وی خاص نمبر شائع کیتے گئے۔ محمد افضل خاں دی وفات دے بعد اوہناں دے پتر امجد بھٹی نے ایہ رسالا سانبھ لیا۔ ایس دور وچ اوہناں نے فخر زمان نمبر کہانی نمبر تے نویں نظم ورگے موٹے خاص نمبر چھاپے جو کئی کئی سو صفحیاں اتے مشتمل سن۔
1975دے بعد امجد بھٹی کینیڈاچلے گئے تے بعدوں اوہناں دا کوئی اتا پتا نہیں لگیا۔ اوہ اوتھے ای سیٹل ہو گئے سن تے رسالا بند ہو گیا۔
پنجابی ادب نوں پنج دریا دی دین: دوجے پنجابی رسالیاں وانگوں پنج دریا نے وی بہت سارے نویں لکھاری تے نواں ادب پنجابی ادب نوں دِتے۔ پنجابی لکھاریاں تے پڑھنہاراں وچ وادھا ہویا۔ ایہدے نال نال پنجابی زبان وچ پڑھن والی وست (میٹیریل) دی تھوڑ نوں پورا کیتا۔ پنجابی پڑھن والیاں نوں معیاری لکھتاں دِتیاں۔ اج ایہ رسالا بھلی وِسری کہانی بن گیا اے پر اپنے زمانے وچ ایہ ہرمن پسند رسالا سی جہڑا پنجابی زبان تے ادب دی اک چنگی نشانی دے طور تے جانیا جاندا اے۔
مہیناوار لہراں لاہور
پنجابی زبان دی ادبی صحافت وچ لمی زندگی پان والے رسالیاں وچ مہیناوار لہراں دا ناں وی شامل اے۔ ڈاکٹر سید اختر حسین اختر دی یادگار ایہ رسالا اج تیکر نکل رہیا اے۔ سید اختر حسین اختر دا تعلق کوڈیگرام بالا، ریاست دِیر نال سی جہڑی اج کل صوبا خیبرپختونخوا دا اک ضلع اے۔ مادری زبان پشتو رکھن والے اختر حسین اختر نے زندگی دا مڈھ معمولی سرکاری ملازمت توں کیتا۔ اوہ مڈل پاس کر کے نوکری کرن لگ پئے سن۔ 1953 وچ جدوں اجوکے پاکستان دے چار صوبیاں نوں کٹھا کر کے مغربی پاکستان دے ناں نال اِکو صوبا بنا دِتا گیا تاں اختر حسین اختر دی ٹرانسفر وی لاہور ہو گئی۔ ایتھے اوہناں نے میٹرک دے بعد ادیب عالم تے فاضل دے امتحان پاس کیتے تے نال انگریزی دا امتحان دے کے بی اے دی ڈگری لئی۔ اوہناں نے ایم اے کرن مگروں پنجابی واراں دے موضوع اتے مقالا لکھ کے پی ایچ ڈی دی ڈگری لئی۔آپ نے 15مارچ 2011 نوں وفات پائی۔
تعلیم جاری رکھن دے نال نال سید اختر حسین اختر نے 1962 وچ ربانی روڈ، انارکلی لاہور اتے ماڈرن ڈگری کالج دے ناں نال اک ادارا قایم کیتا۔ ایتھے ادیب، عالم تے فاضل دے امتحاناں دی تیاری کروائی جاندی سی۔ مہیناوار لہراں ایسے کالج دا میگزین سی۔ پنجابی سیوک فقیر محمد فقیر ماڈرن ڈگری کالج آوندے رہندے سن۔ اوہناں دے ای مشورے، تے مِل ورتن پاروں لہراں دے نکالے دا فیصلا ہویا۔ رسالے دا ناں وی فقیر ہوراں ای تجویز کیتا سی۔ ایہدا پہلا شمارا مارچ 1965 نوں ساہمنے آیا۔ سایز اوس سمے دے رایج سایز مطابق 20×30/8 سی۔ پنج دریا دی طرز اتے کالج دے پڑھیاراں واسطے لہراں دی سالانا خریداری لازمی سی۔ شروع دور وچ رسالے دے کریڈٹ صفحے اتے سید اختر حسین اختر تے عبدالحمید امر دے نال نال حسین شاد دے ناں چھپدے رہے۔ بعدوں کجھ چر ڈاکٹر انور امین دا ناں وی چھپیا۔1966 ڈاکٹر محمد باقر ہوراں نے ایس رسالے نوں پنجابی ادبی اکیڈمی دی سرپرستی وچ لے لیا پر چھیتی ای ایہدے توں کنارا کش ہو گئے۔
اکتوبر1972 وچ پیپلز پارٹی دی حکومت نے سارے تعلیمی اداریاں نوں قومی تحویل وچ لے لیا جس پاروں ماڈرن ڈگری کالج وی قومی تحویل وچ آ گیا۔ (جاری)